Ekistos
Kapas akom
I. Iten ei puk: Ekistos, wewen towu.
II. Chon makei ei puk: Moses.
III. Itelapemongen ei puk: Ngasala.
IV. Kapas aüchean ei puk: Uruwon ekewe chon Israel seni fansoun än Josef mäla tori fansoun ewe imwenfel a kaütä.
V. Masouen ei puk Ekistos: Lon ei puk a mak ewe pworaus mi aüchea usun pworausen uruwon ekewe aramasen Israel, usun ar towu seni Isip, ia aramas ra nöüniir amanau ie. A wor 4 kinikin mi aüchea lon ei puk Ekistos:
1 Usun än ekewe chon Ipru ngasala seni än chon Isip nöüniir amanau.
2. Ar sai ngeni ewe chuk Sinai.
3. Än Kot pwon ngeni nöün aramas seni won ewe chuk Sinai, pwal usun an ngeniir ekewe allük, pwe repwe tongeni alefila lefilen mine a pwüng me mine a pwüngingau, allük mi afata pwüngün lefilen aramas me aramas me allükün lamalam. Ekei allük repwe tümwünü lon unusen manauer.
4. Usun kaütän ewe imwenfel fän iten chon Israel me pisekin lon, pwal ekewe allük fän iten ekewe souasor me allük usun ar repwe fel ngeni Kot. Nge mine a kon aüchea seni meinisin me lon ei puk, usun met Kot a föri, lupwen a angasala nöün kewe aramas ir amanau, pwal usun an föri eu mwü seniir mi wor ar apilükülük lon ekewe fansoun repwe feito. Lon unusen ei puk a pworaus usun Moses, ewe aramas Kot a filätä pwe epwe emwenawu nöün aramas seni Isip. Ewe kinikin aramas ra kon silei me lon ei puk ekewe Engol Allük, a mak lon sopun 20.
VI. Tettelin masouen ei puk:
Ekewe chon Israel ra ngasala seni lon Isip 1.1–15.21
1. Usun än chon Isip nöüniir amanau 1.1-22
2. Pworausen än Moses uputiu, an sü seni Isip me an liwinsefäl 2.1–4.31
3. Moses me Aaron ra pälüeni ewe kingen Isip 5.1–11.10
4. Ewe Pasofer me än chon Israel towu seni Isip 12.1–15.21
Än chon Israel sai seni ewe Setipar tori ewe chuk Sinai 15.22–18.27
Ewe allük me ewe pwon 19.1–24.18
Ewe imwenfel me ekewe allük usun ar repwe fel ngeni Kot 25.1–40.38
1
Än chon Israel riaföü lon Isip
1.1-22
1 Iwe, ikkei iten nöün Jakop kewe mwän ra etala Isip, eman me eman fiti an famili:
2 Rupen, Simeon, Lefi me Juta,
3 Isakar, Sepulon me Peniamin,
4 Tan, Naftali, Kat me Aser.
5 Iwe, mwirimwirin Jakop kewe meinisin ükükün fik aramas, nge Josef a fen nom Isip.
6 Mürin, Josef me pwin kana ra mäla, pwal pilor meinisin.
7 Nge ekewe chon Israel ra fokun up o chomongola, ra chochoola o fokun pöchökülela pwe ewe fanü Isip a ti rer.
8 Mürin a seikitä eman kingen Isip mi fö, esap silei usun Josef.
9 Iwe, ewe king a üreni nöün kewe aramas, “Ekei aramasen Israel ra kon chomong o pöchökül senikich.
10 Ou etto, sipwe le sorongaueer pwe resap chüen chomongola. Pun ika maun epwe torikich, repwe eti chon oputach le fiu ngenikich, repwe pwal sü seni fanüach.”
11 Iei mine ra filätä chon nemeni ekewe aramasen Israel, pwe repwe ariaföüür ren angangochou le aüetä än Farao telinimwen iseis iter Pitom me Rameses.
12 Nge usun lapalan ar riaföü, iei usun pwal chomongolar me chochoolar won ewe fanü. Iei popun ekewe chon Isip ra fokun niueiti chon Israel.
13 Iwe, ekewe chon Isip ra nöüniir amanau
14 o fokun eweiresiir ren angangochou. Ra wisen angang ngeni pwülüpar o föri pilak, ra pwal föri chomong sokun angangen lemal. Nge lon ar angang meinisin ra chök nöüniir amanau.
15 Mürin, ewe kingen Isip a üreni Sifra me Pua, ekewe ruoman chon afamw,
16 “Lupwen oua afamwa ekewe fin Ipru, oupwe nengeniöchü nöür. Pun ika eman ät, oupwe ni, nge ika eman nengin, oupwe amanaua.”
17 Nge ekewe chon afamw ra niueiti Kot. Iei mine resap apwönüetä än ewe kingen Isip allük, nge ra fen amanaua ekewe ät.
18 Iwe, ewe kingen Isip a körato ekewe chon afamw o aisiniir, “Pwota oua föri iei usun pwe oua amanaua ekewe ät?”
19 Iwe, ekewe chon afamw ra üreni Farao, “Pun ekewe fin Ipru resap wewe ngeni ekewe fin Isip, pwe ra pöchökül o nöünöükai mwen eman chon afamw epwe toriir.”
20 Iwe, Kot a afeiöchü ekewe chon afamw. Nge ekewe aramasen Israel ra chomongola o pöchökülela.
21 Pokiten ekewe chon afamw ra niueiti Kot, i a fang ngeniir püsin nöür.
22 Mürin, Farao a allük ngeni nöün aramas meinisin, “Iteiten ät mi uputiu ngeni chon Ipru oupwe atururolong lon ewe chanpupu Nil, nge iteiten nengin oupwe amanaueer.”