49
Cacopo yachiminaton, hui'ninpita nontërinso'
1 Nani shinpita noya ya'huëcaiso marë' sha'huitohuachina, Cacoposo' ya'ipi hui'ninpita amatërin. Huë'pachinara itapon:
“Amasha ya'carico conparo'sa'.
Ma'sona a'na tahuëri onpocamaso', carinquëma sha'huichinquëma natanco'.
2 Canpitaso hui'nahuëpitanquëma'.
Caso Cacopoco niporahuë', Israiro itërinaco anta'.
Carima sha'huitaranquëma ni'ton, natanco'.
3 ‘Quëmaso' Nopino, paninanquën.
Chiníquën nisoco, ya'nan hui'nahuananquënso'.
Chini chiníquën nanantaton, noya noya nicamaso' ninan.
4 Inapocamaso nipiranhuë', co huachi inapoaranhuë'.
I' pa'pi chinii' nipachina, co onpo asanoirëhuë'.
Ina pochachin nicaton cosonanëhuë monshitëran,’ itërin.
5 ‘Simion, Nihui, canpitaso, napopináchin cancantërama'.
A'napita ma'sha onpotamaso marë' nisha nisha ohuararama'.
6 Niyontonamaquë, ama onporo tëranta ya'noisohuë'.
No'huitatoma piyapi tëparama'.
Co natantonquëmahuë' nicatoma', tororo'sa nishitëtëntëntërama'.
7 Tanan ni'niro'sa pochin no'huitërama'.
Napopiramahuë', co onporonta inachachin nisápomahuë'.
Carima ya'ipi Israiro nacionquë, ayanquëmiataranquëma',’ itërin.
8 ‘Quëmaso' Cota, iyaparinpita pa'yataponën.
Inimiconënpita minsëra'piapon.
Iyaparinpita quëran huarë' moshaponën.
9 Quëmaso' conpa masho, Cota itëranquën.
Pa'pinia'hua pochin chinimiatëran.
Mapintahuaton pa'pini' pë'inihuachina,
mónsho mónsho tërarinquëran quëhuënin huachi.
Panca pa'pini' pochin ninan.
¡Pa'pini' chinotaso', co incari tëranta apisarinhuë'!
Inapochachin quëmanta inimiconënpita nitaponën.
10 Co inso tëranta hua'an quëran, quëmaso' Cota, ocoiarinënhuë'.
Huara së'quëranso co insonta mataponënhuë'.
Hua'anën chachin o'maquë huarë' co nanitapaponënhuë'.
Ina o'mahuachin, ya'ipi naciono'sari natëpona huachi.
11 Cotaso notohuaro' oparohuanaton, mora'huanënta', co apiratarinhuë'.
Inaquë capacaso marë' a'sonpitërapon.
Huinoquë chachin a'morinso pë'sapon.
¡Opa huayo no'huiquënquë chachin, inapotapon!
12 Ya'pirinpitanta', huino quëran quëhua quëhuashin ninin.
Natëquënpitanta', sho'shoi' quëran huiri huiríchin ninin,’ itërin.
13 ‘Quëmaso' Saporono, marë yonsan parti ya'huapon.
Panca nancharo'sa nonshinanëna ya'huërinquë, ya'huëapon.
No'panënso', Sitonquë huarë' naniarin,’ itërin.
14 ‘Quëmaso' Isacaro, chiníquën mora pochin nisaran.
Pë'tahua pëiro'saquë pë'pëtëranquëranchin chinotaran.
15 “¡Noyachi iso no'pa' paya! Yashi yashin chinochachináchin,” tëcapon.
Co pahuërëpirinënhuë', noya cancantaton patron marë' sacataran,’ itërin.
16 ‘Quëmaso Tano, quëmaora huëntonënquë ya'huëpisopita catahuaran.
Nanan ya'huëtohuachina', anoyatacaiso catahuaran.
A'napita Israiro huëntono'sa pochachin nisaran.
17 Ya'huan yaquëtëtërinso pochin nisaran.
Inaso', ira pirayan yamorin quëtëtacaso marë'.
Cahuario tocanën quëtëhuachina, piyapi ya'mitërinso', anotapon.
Inapochachin quëmanta', inimicoro'sa nitaran,’ ” itërin Cacopori hui'ninpita nontaton.
18 Ina quëran Cacoposo' Yosë nontaton tapon:
“¡Sinioro, quëmaso' nicha'ësaranco tënahuë!” itërin.
19 A'napita hui'ninpitanta yonquiaton taantarin:
“ ‘Quëmaso Caro, matararoro'sa huënton ya'contarinquën.
Quëmariso napoaponahuë', nita'atahuaton imasaran,’ itërin.
20 ‘Quëmaso' Asiri, noya noya cosharo ya'huëtarinquën capacaso'.
Copirnoro'sa ca'ninso pochin ca'sápon.
Napoaton quëmari quëtohuatan inapitanta ca'sapi,’ itërin.
21 ‘Quëmaso' Nipitari, co camainënquënso costaponhuë'.
Tanan yo, noyanpia'huaráchin hua'huinpitarë' pa'ninso pochin nisaran.
Inapochachin quëmá quëran pipipisopitanta',
na'a nisahuatona', noyanpia'huaráchin nicapona',’ itërin.
22 ‘Quëmaso Cosi, i'sha yonsanquë huayo huanirinso pochin ninan.
Inaso' huayo pa'pi notohuaro' nitërin. Së'paquënpitanta', paira pa'tërin.
23 Pë'chinan camayoro'sa', no'huirinquën.
No'huitënën pë'chinan shinërëquë yaohuaninën.
Napotatënën, co noya quëran ya'huëchináchinhuë nitarinën.
24 Quëmaso nipirinhuë', chini chiníquën tanpatëran.
Pë'chinanënquë inimicoro'sa të'yanantohuatan, co pacoitaranhuë'.
Yosë imarahuëso', chini chiníquën nanantërin.
¡Ina catahuarinquën inimicoro'sa minsëaran!
Sinioroso' ohuica hua'anën pochin ni'ton, a'pairinco.
¡Ina chachin quëmanta a'paiatënquën catahuarinquën!
25 Yosënëhuë chachin, catahuapënquën.
Inaso', ya'ipi nanitapaton catahuapënquën.
Ina nohuanton, o'nanpachina catahuainquën.
Acoporonta i' ya'huërinso', ina nohuanton pipiton catahuainquën.
Pë'tahuanëmapita, sanapinëmapita, inapitanta huaihuachina catahuain.
26 Tata mashocoro'sa iráca, noya ya'huëca'huaso marë' sha'huitërinaco.
Carinquënso', ipora noya noya sha'huitaranquën.
Motopiro'sa ya'huërárinso ta'huantaquë huarë', Yosë catahuaráponquën.
A'napita iyanpita quëran, noya noya nicatënquën huayonanquën.
Napoaton së'huamotorahuatënquën quëma marë' Yosë nontërahuë,’ itërin.
27 ‘Quëmaso' Mincamin, pa'pi mapinton tanan ni'nira pochin nicapon.
Tashiramiachin inaso mapintahuaton, ca'miatërin.
Naporo' i'huanahuanquë chachin pë'sotërinsonta', a'napitari ca'papi.
Inapochachin quëmanta', yaata'huantëransopita nitaran.
Inapotahuaton ma'shanënanta', nipatomatapoma',’ ” itërin.
28 Ina pochin Cacopo shonca cato hui'ninpita noya ya'huëcaiso marë' sha'huitërin. Inapita quëran shonca cato Israiro huëntono'sa pipipi.
Cacopo chimininso'
29 A'na tahuëri Cacoposo', hui'nipita camairin: “Co hua'quiya quëranhuë' chiminarahuë huachi. Chiminpato, shimashonëhuëpita pa'pitopiso pirayan po'moontaco. Iti huënton piyapi, Ipron itopisori, ina no'paso' hua'anëntopirinhuë'.
30 Maquipiraquë nanin ya'huërinso yonquiato napotarahuë. Inaso', Canaan parti ya'huërin. Mamiri notënanquë ya'huërin. Ina no'pa' mini iráca tata mashoco Apraan nipa'pitacaiso marë' pa'anin. Ina pirayan no'pa' ya'huërinsorë chachin naporo Ipron pa'antërin.
31 Inaquë Sara, Apraan, inapita chiminpachinara ya'conpi. Tata Isaco, mama Nipica inapitanta inaquë chachin ya'conpi. Inaquë canta', sa'ahuë Nia itërahuëso ya'conin.
32 Ina no'paso' naninë chachin, Iti huënton piyapi'sa pa'antopi,” itërin.
33 Cacoposo' hui'ninpita camairinso tonitohuachina, pë'saranënquë quëhuëantarin. Quëhuënaso chachin, chiminin huachi.