27
Pilato anu Jesús iyuaibun Judas eiskain tenexeketan mawanikiaki, na janchadan
(Mr 15.1; Lc 23.1-2; Jn 18.28-32)
1 Janua penaya Diosbe nukunabu janchaxunika xanen ibubu inun judio xanen ibu betsabu icha jaska wakin Jesús tenantikidi yubakaxun
2 Jesús menexxun romano xanen ibu Pilato anu iyuaibun
3 Judasin jatu achimabidana Jesús tenankatsi ikaibu uinkin unankin shinain jawen nuikin ja 30 pei jexe Diosbe nukunabu janchaxunika xanen ibubu inun xanen ibu betsabun inanshinabu ana jatu inanun, iwanan,
4 jatu yuikin:
—Jesús juni pepabiaken jau man tenanun chakabu shinankin en matu achimashinaki. Na pei man ea inanshinadan, en ana jaska jayakatsi ikamaki— jatu wa
jawen pei ana bikatsi ikama jabun Judas yuikin:
—Min chakabushina nun jawen nuiamaki. Min nuku jaska wamashinadan, minaki— akabu
5 janua juinti nishmajaidai keyutan janu Templo jikiti xui xexekaian nitan ja pei jexe putakin sa atan kainkaini ka dispiwen tenexeketan dunua mawanikiaki.
6 Ja pei jexe sa abaina Diosbe nukunabu janchaxunika xanen ibubun tupitan yuinamei:
—Na peiwen juni achishinxun nun jatu tenanmai kaiwen taexun Dios kenwankin janu inankuinti bauki nun jaska jaki nanetidumaki, ja pei jimiwen iduma keskadan— itan
7 ¿jawen jawa jaska wananxanpa? ika yuinamei yubakakin shinantan Jerusalén anu bai bea mawabu medibi janu jatu maiwati wanun, iwanan, mai kenti wanikan bai ja 30 pei jexewen bikin ibu wanibukiaki.
8 Jaska wanibu na jabiatiandi kenakin: “Jimi Baiki”, nun wamiski.
9-10 Jaska Diosun jancha yuixunika Jeremíasin bebunkidi jatu yuikin: “Jabun 30 pei jexe bixun mai kenti wanikan bai bikin jaska Israelbun jawen kadu yubashina jawen pakakin ibu waxankanikiki, akin Diosun ea yuia en matu yuixuki”, jatu waxun keneniki. Jabiaskadi kaneama menekin Judasin peiwen bai bikin ibu wanibukiaki.
Pilaton jau Jesús unanti wanun janu iyunibukiaki, na janchadan
(Mr 15.2-20; Lc 23.3-5, 13-25; Jn 18.33–19.16)
11 Janua romano xanen ibu Pilato anu Jesús iyuabu kainkidan tsauxun yukakin:
—¿Miadan, min judio xanen ibubu binu keyuamen?— aka
Jesúsun yuikin:
—Jawaikika! Jabiadi min ea yuiaii— akaya
12 Diosbe nukunabu janchaxunika xanen ibubu inun xanen ibu betsabun jakidi yuikin chani tibi chiteaibun Jesúsun jawa yuiama niken
13 Pilaton ana yukakin:
—Ja mikidi betsa betsapa chakabu yuiaibudan, ¿min jawa ninkamamen?— aka
14 Jesúsun jawa jancha betsa yuiama niken:
—Jabaa! ¿Jaskai janchamamen? —itan Pilato jadakidi shinantimawa
Jesús jau tenanunbun Pilaton yununikiaki, na janchadan
(Mr 15.6-20; Lc 23.13-25; Jn 18.38–19.16)
15 romano soldadobun jatu achixun bichimabu badi tibi ja Pascua nawaibutian jau bestichai taxninun ja romano xanen ibu Pilaton beyawen taexun maen katuaya jatu kainmaxunpakemisken
16 jabiatiandi juni betsa detenameti unan keyuai Barrabás achixun bichimabun
17-18 janua Diosbe nukunabu janchaxunika xanen ibubu Jesúski chani chakai jaki sinatakin jaska waxun maematima maemanun ixun iyuabu Pilaton unankin mae anua dasibi ichabu jatu yukakin:
—¿Jadatu man bechipaiai, ja en matu taxnimaxunaidan? ¿Barrabásmenkain? ¿Jesús Diosun Katua Mesías kenamisbudaka?— jatu wai
19 janu Pilato gobernador tsauti anu tsaudiaken jawen ainen jancha bumakin yuikin:
—Jesúswen taea en nama chakashinaii. Jaskawen taexun ja juni pepa jawa jatubetans jakidi chakabu yuikin jawa yunuyamawe— aka juxun jawen tsumapan yuixunbiaya
20 Pilato ninkamama june Diosbe nukunabu janchaxunika xanen ibubu inun xanen ibu betsabun yudan kaian Jesúski jatu sinatajaidamakin yunukin:
—Barrabás jau nuku taxnimaxuntan Jesús jau jatu tenanmanun yunukanwen— jatu waibu mae anuabun ninkaibun
21 Pilaton ana jatu yukakin:
—Ja juni dabedan, ¿jadatu man bechipaiai? jawa meama ja en matu taxnimaxunaidan— jatu wa
jabundi Pilato yuikin:
—Barrabás nuku axunwen— iake iakeaibun
22 Pilaton ana jatu yukakin:
—Jesús Mesías Cristo kenamisbudan, ¿jadan, jaska wapa?— jatu wa
dasibibun yuikin:
—Cruzki nuku mastaxunwen— iake iakeaibun
23 ana Pilaton jatu yukakin:
—¿Natunan, jawa chakabuwashinamen?— jatu wa
ana unanxubima jancha kushipawen yuikin:
—Cruzki nuku mastaxunwen— jawenchains ikaibun
24 Pilaton jancha jawa ninkama ana keketikubainaibun jabun shinan jatu mae wamatiduma Pilaton unankin jatu unanti wanun, iwanan, jawen soldado yunua unpax bexuan yudan kaianen bedubi mepanukin jatu yuikin:
—Na juni pepa en jatu tenanmakatsi ikama matu unanmanun ika en mepanuaii. Matun man jaska yunuai bestiwen taea mawatiduki— jatu wa
25 ja yuda dasibibun yuikin:
—Peki. Nuku inun nukun bakebun nun yunuaiwen besti jau mawanunwen— akabu
26 januxun Pilaton jatu daewakin Barrabás jatu taxnimaxuntan Jesús jatu kusha kusha amatan jau jiki mastatanunbun jawen soldadobu yunua
27 januxun xanen ibu Pilaton jiwe ewapa jemaintin anu soldadobun Jesús iyuxun soldado jabus jaki xukui kexebauntan
28 januxun Jesúsun tadi pekatan kaxe wakin xanen ibun bemakia tadi tashijaida Jesús sawematan
29 janua muxa maiti waxun maimatan jawen meken yusiudi ji sidi jawen xanen ibun mestenti keska tsumamatan janua jaki kaxei ja bebun danti itan yuikin:
—Judio xanen ibu kayabidan, min miaki— atan atankin
30 jaki kemu michukin jabias ji sidiwen tsumamabuwen makush makush atan
31 kaxe wai jaki beyusi keyutan bemakia tadi tashijaida pekatan jawen tadi kayabis sawemabainkin cruzki mastanun, iwanan, jaki mastai kanun, iwanan, cruz iamatan xadamabainkin iyuaibun
Cruzki Jesús mastanibukiaki, na janchadan
(Mr 15.21-32; Lc 23.26-43; Jn 19.17-27)
32 janua juni betsa Simón jawen mae Cirene anua juaiki nukuxun Jesúsun cruz jau iaxunyubainun soldabobun yunua iaxunbainaya
33 Gólgota anu Jesús jadi iyukin mapematan, jaska yuidan, Buxka Xau Mati anudan,
34 vino isin nemati dau muka jusia amabu metan danankin akamaken
35 januxun cruz bexuki Jesús mastaxun nichintan januxun soldadobun jawen beyustiwen maemanankin jawen tadi paxkanun iwanan: “¿Tsuan dukun jawen tadi bimenkain? Akanwen”, ikin Jesúsun tadi paxkakin menetan
36 janua jau mawanun Jesús kexea tsauxun uiainbun
37 jabiatiandi jawen unanti ji bexa tuaxki kenekin: “Nadan, judiobun Xanen Ibu Jesúski”, Pilaton aka buxun Jesús mamaki mastadiabun
38 jabianudi jabe juni yumetsu dabedi cruz dabeki mastaxun betsa jawen yusiudi nichinxun betsa jawen yusmaudi akabun
39 janua juni betsabun ichakin dainbaini budi budi ikin
40 yuikin:
—Uinwen. “Dios kenwanti mishki Templo tekekin pudekin keyutan xaba dabe inun besti kaya en ana benixanaii”, min ishianki. Min ja kushipa jayadan, jaska min Diosun bakemenkain ja cruz anua mimebi paxai butudiwe, mawamadan— akaibun
41 Diosbe nukunabu janchaxunika xanen ibubu inun, Diosun jancha kenenibu yusinananmisbu inun, judio xanen ibu betsabudi Jesúski kaxekin yuikin:
42-43 —Juni betsabu medabewabiamis jamebi paxatidumaki. Jaskakenan, jaska Israelbun Xanen Ibu Cristo kayamenkain cruz anua butuai uinkin na jabiatian nun ikunwantiduki. Dios ikunwain jakidi janchakunkainshinaki. Natiandi Dios benimakin jau medabewanunwen, paxawakinan, jaska waya nukundi nun ikunwainan— ikaibun
44 juni yumetsu dabe jabe mastabundi Jesús ichadianibukiaki.
Jesús mawanikiaki, na janchadan
(Mr 15.33-41; Lc 23.44-49; Jn 19.28-30)
45 Janua badi manananbibiaken badi nuka meshua itsa daka manaibun ma badi nai puchinin dakaken bepenakainaya
46 jabiatiandi Jesúsun jui kushipawen yuikin:
—Elí, Elí, ¿lemá sabactani?— ikidan juni kuin janchadan, “En Diosuun, en Diosuun, ¿jaskakin min ea jeneamen?” ikaya
47 ja naman jatidi mapuxun betsabun ninkatan yuikin:
—Ninkakanwen, Diosun jancha yuixunika Elías kenaikikidan— ikaibun
48 janua ja naman mapuabu betsa kushikidan janu jawen tsiniti vino muka pu atan tawaki ustanxun bexun amanun, iwanan, sananxunaya
49 betsabun nemakin yuikin:
—Jaska wama jeneyuwe, Elíasin butekin paxawayuimenkainan— akaibun
50 janua Jesús ana unanxubima bis itan mawaya
51 jabiatiandi Templo medan tadi dintu wakin kebenibu jamebi manaundia dis iki keyuaya mai pacha sakuaya mishkipanwan bepunibu maei dabekeaya
52 janua janu maiwati tanpe xabakabiaya jabun Dios ikunwain mawanibu Diosun jatu bestenwan
53 Jesús bestendiamawen taea jabu dukun kainbaini Jerusalén ja mae medibi anu jikiabu januxun yuda ichapabun jatu uinibuki.
54 Janua romano capitán inun jabun Jesús mekekin mai pacha sakui betsa betsai uin datejaidakin yuikin:
—Chanima kayaki. Na junidan, Diosun bakeki— ikaibun
55-56 janua ainbuaibun Galilea anuxun duawakin Jesús chibanmisbu María Magdalena inun Santiago inun Josén ewa María betsa inun Zebedeon juni bake dabetan ewadi Jesús mawai jabu benanta nixun uindianibuki.
Jesús mawa maiwanibukiaki, na janchadan
(Mr 15.42-47; Lc 23.50-56; Jn 19.38-42)
57 Janua ma badi kaya judio betsa mabu pai paimaya jawen kena José Arimatea anua kainitun Jesús ikunwankin chibankubainshinatun
58 ana jawaki dateama Pilato anu kaxun Jesús maiwakatsi jawen yuda yuka jau Josén butetan butanun Pilaton jaska yunua
59 kaxun Josén jawenabubetan butetan tadi juxupawen dayabutan buaibun
60 ainbu dabetan jatu chibainbun jawen yuda bakebainkin bukin jawen bai neki mishki kini bena jatu amaima anu Jesús datantan mishki beputi ewapawen beputan buaibun
61 jabianudi María Magdalena inun María betsa maiwati tanpe anu ja bebun niti ika tsauxun dasibi uinibukiaki.
Jesúsun yuda jau yumetsuyamanunbun soldadobu kexemanibukiaki, na janchadan
62 maiwashinabu judiobun juindukuntitian Diosbe nukunabu janchaxunika xanen ibubu inun fariseobu Pilato anu jabe janchanun ika bua ichaxun
63 yuikin:
—Xanen ibuun, ja juni chani chakakin mawadiama janchai nun ninkamisdan: “Mawa xaba dabe inun besti kaya en ana bestenxanaii”, ishian nuku yuishinabu nun shinaiin.
64 Jaskawen taexun xaba dabe inun besti binudiama maiwashinabu jau kexexun meke pewanunbun min soldadobu yunuwe. Min jatu jaska wamamaken meshu medan jawen tsumabu bexun jawen yuda june tsekabain butan chipu yudan kaian yuikin: “Nukun Xanen Ibu ma nuku bestenxun kainshinaki”, iwanan, dasibibu jatu padantidubuki. Jaska wakin jawen chani jancha jatu pikumatidubuki— akabu
65 Pilaton jatu yuikin:
—Na soldadobu man jayaki. Matudi maiwashinabu anu jatube buxun jatu pewamatankanwen, jau jaska yumetsuyamanunbunan— jatu wa
66 buxun jawen beputi mishkiki juni betsan bepean unanti shadawakin jawen unanti dispiki tsamintan puntekin bewexetan jau mekekin uinunbun soldadobu yunukin kexematan benibukiaki.