☰ Pii Beetihi 4
4
Lé pipaunu Padué ne he miiden
1  +É ne alecehe ni naado naa, ke é alihi mwo a céiu naado. É alihi ne jeda he miiden a pomwa na tehi. Ke é téne mwo ali pwocihe, li pwohewii a pati tutu. Ke e pii tong pie: «Go taabé éni, beme é habwii tem ni naado na o te ju téele tuie.»
2  +Ke e ole kong a *Jenen Iitihi, ke é alihi a atebwo jeda he miiden, ke é ali Padaame he e ko tebwo pwon. 3  +Ke te junihe wâé nang, ne ha a wâé ten, be pwodaadiin, pwohewii ni péi na pun bupwi ke megele, na te junihe ubwo a cuhin*. Ke e aujenihi a atebwo na a aduwoho, na pwomelaan pwohewii a péi émeraude.
Lépwo 24 ukéiu
4  +Aujenihi a atebwo he daame, ke é alihi ni béé atebwo na 24; na lé ko tebwo pwon wo lépwo ukéiu na 24 jélé, na lé cuwohe ni epwén na pwojo, ke lé pwobo he ni kuron na mwani megele. 5  +Ni ilehi, ke a huu he a tikekele, ke lé wie mu ko ali atebwo. Ke é ânebuhe a atebwo naa, ke 7 ni mwomiû na tole. Ke weengaa [ni inenaado ko] a Jenen Iitihi te Padué. 6  +Ke é alihi ne mwo lang, a jié, na te junihe bwakenu.
Lépwo âcélo na paa jélé
É ha awiemen, ke é aujenihi a atebwo he daame, ke lé cuwo lang wo lépwo âcélo na paa jélé†, na lé pwohewii ni wota, na hiwon ni naamiilé ânebun ke é alecehelé. 7 Pa bécéiuhen, ke pwohewii ni liô †; pa béalohen, ke pwohewii ni nahi paaci; pa béciéhen, ke e pé ana pwohewii ni pwahamii apulie; pa bépaahen, ke pwohewii a bwaaoléé‡ heme e téé. 8  +Muko pétaapwo pi 6 telé ni puuilé. Ke pwo ni naamiilé ati, pwo ni puuilé, ke é haahi ni puuilé. Ke bwén, ke pwang, ke lé tee pwonyebi, ke lé pii pie:
«E iitihi! E iitihi!
E iitihi wo Padaame,
be weeng Padué.
Te junihe pwo niihen
ne ko ati ni naado.
Be weeng jenaa,
ke weeng ânebun,
ke e te mu dieli mwo!»
 
9 Lé pwonyebi beme lé pipwoun, me pipwo-olé te pana e ko tebwo pwo a atebwo he daame, pana e *mulie dieli mwo. 10  +Ke ati he ni benaamwon na lé pipwoun den hen, ke lé tidihi jililé he pwahamiin wo lépwoli 24 ukéiu. Ke lé pipaunu pana e mulie dieli mwo. Ke lé tahi ni kuron delé ne he pwahamiin, ke lé pii ten pie:
11 «Wogo Padaame, Padué heme,
ke wogo pana jan me pipaunuko
ne ha *a wâé tem,
me a junuum.
Wogo pana go tabuhi
ati ni naado.
Wogo na go pacuwohi
ana te nimem kon!»
+ 4:1 4.1 Pii Beetihi 1.1,10 + 4:2 4.2 Ésaïe 6.1 + 4:3 4.3 Ézékiel 1.28 * 4:3 4.3 Péi na pun bupwi ke megele—Péi ‘jaspe’ me ‘sardoine’. + 4:4 4.4 Pii Beetihi 3.18 + 4:5 4.5 Ézékiel 1.13; Zakari 4.2; Pii Beetihi 1.4, 8.5, 11.19, 16.18 + 4:6 4.6 Ézékiel 1.5−10,22, 10.14 † 4:6 4.6 Lépwo âcélo na paa jélé—Grek: Êtres vivants. Pwocoon me nye pii pie, pwohewii ace de. Wieli te pipwohewii ni wota, ai ni apulie, ai ni âcélo, ai ni jenen. ‡ 4:7 4.7 Liô—Lion; Bwaaoléé—Aigle. + 4:8 4.8 Ésaïe 6.2,3; Ézékiel 1.18, 10.12 + 4:10 4.10 Pii Beetihi 7.10,15, 19.4
☰