12
1 <δ> Ê toomwo me a dragon
1 Pwo a inenaado na te nihe ubwo, na e tuie ne he miiden: ê toomwo na tawiieng ko a téale. Ke a wole, ke e haahi ni an. Ke e pwobo ha a kuron na pwo ko ni ceni na 12.
2 E o te ju téele piâbeele ewa, ke e é ko ni picani ko piâbeele ewa.
3 Pwo a céiu inenaado na e tuie ne mwo he miiden: a dragon na te junihe ubwo nang, ke megele nang pwohewii a miû. Ke 7 ni punin, ke 10 ni gi ten, ke é pwo ni pétaapwo punin, ke e mu pwon ni kuron.
4 Ke é ko a tubwon, ke e baléhi a céiu duaa ceni mu he miiden, ke e tahi ole pwo bwohemwo. Ke e cuwo ânebuhe ê toomwo na me e piâbeele ewa, beme e wii a naîn, hemepie e âbeele.
5 Ke e picile pa cuwo nahi aiu wo êgi toomwo. Ke e bo pihuôhi ati ni bele wo panaa, ko a bwaja toki ten.
Ke me e pituie, ke te celuimieng kuti koja ali dragon, ne pele Padué, ne pwo a atebwo he daame ten.
6 Ke e cela nge ha a melé wo êgi toomwo. É lang he na e piwâamihi a amu ten nelang wo Padué, beme cileeng nelang, he na 1260 ni tan.
E pwopa ne kon wo Michel
7 Ke é mulang, ke pwo a pa ne he miiden. Wo Michel me ni *âcélo ten, ke lé pwopa ne ko ali dragon me ni duéé ten.
8 Ke time uce pwo niihe ali dragon, be te tice mwomwon delé me lé mu he miiden.
9 Ke ali dragon ubwo, ke tahieng ole pwomwo. Be pali bwien he li bécéiuhe tan, a niin pie ‘pa apipé ne konye’, ai wo *Caatana, ‘pa acubwonikenye’. Ke e pipwohuô te a bwohemwo ati. Ke tahieng ole pwo bwohemwo, woélé me ni âcélo ten.
10 Ke é téne a pwocihe na ubwo na e âbé mu he miiden, na e pii pie:
«É jenaa, ke a benaamwon
na e *celuimi wo Padué.
É jenaa, ke e daame
ko a junuun.
E habwii a mwomwon den
wo pa *Mesia.
Be e caa tahi ole Caatana,
pana e pipé ne ko ni béénye,
he ni tan ke ni bwén.
11 Kehe lé piwéden kojaeng,
ko a cewéhe pa *Nahi Muto;
ko a pwooti na lé *pajuujuhi.
Be time uce piwâ jélé,
me lé patupwo ni mulihelé,
ke me lé mele me den.
12 Geé pipwodéén,
wogewé a miiden,
ke wogewé na geé mu hen!
Apwohi a bwohemwo me a jié!
Be e oté céiikewé wo Caatana.
Kehe e te junihe okéé,
be e caa te temehi pie,
caa tice benaamwon den.»
E tai êgi toomwo na ali dragon
13 Ke me e alihi na ali dragon pie, caa tahieng ole pwo bwohemwo, ke e tai êgi toomwo li e picile pali cuwo nahi aiu.
14 Ke wo êgi toomwo, ke e hegi lupwo puui a bwaaoléé na te junihe ubwo nang. Ke e téé kojaeng nge ha a melé, ha a duaan na caa piwâamihi me den, ne ité koja a bwien. Ke e bo hegi ni wiinaado nelang he na cié ni jo, ke pwo a behin.
15 Ke wo pali bwien, ke e puutihi a tabe na pwohewii a tabe he éémwa céi êgi toomwo, beme cetieng.
16 Kehe icehi ana e picani te êgi toomwo na a pule, ke e tehi a pwon, ke e nemihi ali tabe.
17 Ke e te junihe okéé kuti na ali dragon, ne ko êgi toomwo, ke e â pwopa ne ko ni nehi naîn. Ninaa, ke nina lé piténedehi ni pihuô te Padué, ke lé pajuuju Iésu.
18 Ke e te cuwo ticepwon ali dragon.