☰ Cang 5
5
Geé bo mu he ni picani!
1 Wogewé lépwona pwo dewé, wâé heme geé te nihe é me ubwo, wonaa mu ko ni picani na e o bo tuie ne kowé! 2  +Be o muti ni dewé, ke lé o wii ni epwénewé ne ni ma. 3 Ke o paale ni mwani tewé, ke lé bo cihe da me pipé ne kowé. Ke bo wii a ééwé, pwohewii ne ko a miû. Be geé caa taineibuhi ni mwani bépwo na a bwohemwo ce na o bo tieden*! 4  +Ke time geé uce pwocuhi lépwo apenem dewé, ke lé tee ilehi kojakewé a cuhilé. Ke e téne wo Padaame, pana te junihe pwojunuun ne ko ati ni naado.
5  +Geé mulie ne pwo a bwohemwo ha a tuume tewé ne ko ni naamuuwé. Geé te pwo nina te nimewé kon. Geé te junihe wiinaado ehi, heme ko pwo ni apulie na lé metihi menele†. 6 Ke geé caa ne a cuhinaado te pana mwomwon nang‡, die ko a bwo taunueng, ke time e uce pipwopain.
Bénebwéne pwooti
Geé cumang ne he ni picani
7  +Ni bééng, geé cumang heme geé ucéihi a bwo mwojuia mwobé te Padaame. Be wo pa apenem ko âdaanu, ke e ucéihi a benaamwon ko tii âdaanu, ke e ucéihi die ha a bwo tuie te ni bécéiuhe ute, ke ni bénebwéne ute§. 8  +Ke wogewé mwo, me mu mang ni pwonimewé heme geé ucéihi, be o caa e mwonu a bwo âbé te Padaame.
9 Geé nemwo pipii lépwo béén, beme time e uce tautikewé wo Padué: Be neko pa atautinaado he e caa ko cuwo he pomwa! 10 Ni bééng, geé pipwohewii lépwo *péroféta na lé cihe ne he nii Padaame. Be lé te cumang ne he ni picani.
11  +Genye pii pie, lé pituume ne nina lé mu he ni picani. Be geé caa te temehi a jepule ko a bwo uca te Job, ke geé caa te temehi ni *adéihi na e ne ten alecehen wo Padaame. Be wo Padaame, ke te junihe wâé nang, ke e pipwoééhenye.
12  +Ni bééng, geé nemwo *piapwo da he a miiden, ai a bwohemwo, ai é ne ko ace céiu piapwo. Kehe me geé pii pie «éa», ke te éa, ke me geé pii pie «ûhu», ke te ûhu, beme time e uce tautikewé wo Padué.
A pwopwoiitihi te pa acéihi
13 Kona e mu he ni picani wo pace pibééwé? Wâé heme e pwoiitihi. Pwo paceli e pituume? Wâé heme e pwonyebi, beme e pipaunu Padaame. 14  +Pwo pace mu hadeniiwé celi cunu nang? Ke wâé heme e tode lépwo apihuô te ni acéihi, beme lé pwoiitihi ne kon, heme lé ko ne huîin a huile* ne he nii Padaame.
15  +Be a pwoiitihi ne ha a céihi, ke o bo celuimi pana cunu nang, ke e bo pwo me wâé nang† wo Padaame. Ke é hemepie e pwo celi ta, ke e bo pineueng wo Padué.
16 Geé pipii tewé nina geé pwo na ta, ke geé pipwoiitihi ne kowé, beme wâé gewé mu he ni cunu kowé. Be a pwoiitihi te pana mwomwon nang, ke te junihe pwo a junuun.
17  +Wo *Élia [pa péroféta ânebun] ke pa apulie pwohewiikenye. Ke e te junihe pwoiitihi beme time e uce ute, ke time uce ute ne pwo a bwohemwo, he na 3 ni jo ke 6 ni wole. 18  +Ke é alecehen, ke e pwoiitihi mwo, ke te ute kuti, ke [te wâé mwo] a bwohemwo, ke pwo mwo ni âdaanu.
Pé mwobé lépwo bééwé
19  +Ni bééng, hemepie pwo pace mu hadeniiwé celi e caa junihe â ité koja a juuju, ke me e pééeng mwobé wo pace céiu. 20  +Ke me geé temehi pie: Pana e bo pé mwobé pana e pipatieden, ke e bo celuimi a mulihen mu ha amele, ke wo Padué, ke e bo pétaabwon ati ni ta pwo ten‡.
+ 5:2 5.2 Mataio 6.19 * 5:3 5.3 Dernière phrase—ai Geé tai ne ko a bénebwéne Tan [na e bo tauti ni apulie hen wo Padué]. + 5:4 5.4 Deutéronome 24.14−15 + 5:5 5.5 Luka 16.25 † 5:5 5.5 Dernière phrase—ai Geé pwohewii ni wota na cile me géréén ânebuhe a bwo taunuhi nen me wii. ‡ 5:6 5.6 Pana mwomwon nang—Ocine ko ati nina pwoééhelé, na pwocoon me lé pipwopailé. + 5:7 5.7 Deutéronome 11.14; Jérémie 5.24 § 5:7 5.7 Ni bécéiuhe ute, ke ni bénebwéne ute—Pwo lupwo benaamwon ha a jo na céiu ko a ute ne Isaraéla. + 5:8 5.8 Roma 13.11−12; 1 Pétéru 4.7 + 5:11 5.11 Exode 34.6; Job 1.21−22, 2.10; Psaume 103.8 + 5:12 5.12 Mataio 5.34−37 + 5:14 5.14 Maréko 6.13 * 5:14 5.14 Lé ko ne huîin a huile—Wo lépwo Juif, ke lé puu lépwona cunu jélé ko duhi olive heme lé pwoiitihi telé. + 5:15 5.15 Maréko 16.18 † 5:15 5.15 Me wâé nang—Grek: Me e cuwoda mwo. + 5:17 5.17 1 Rois 17.1, 18.1 + 5:18 5.18 1 Rois 18.42−45 + 5:19 5.19 Galat 6.1 + 5:20 5.20 Proverbes 10.12; 1 Pétéru 4.8 ‡ 5:20 5.20 Ati ni ta pwo ten—Grek: Hiwon ni ta pwo.
☰