A béalohe tii
te
Ioane
Atabuhi ko a tii
Woo na e tii a tii ce?
Wo Ioane. Omehi Atabuhi ko a tii 1 Ioane.
E tii éniile?
Ha awieme a jo 85 me 100.
E tii me dee?
Te ê céiu toomwo na pii kon pie Kiria, a ocine ko lépwo acéihi ha a céiu duaan. Wieli lépwo acéihi na lé mu pitapitilé ne pele Gaïus. (Omehi Atabuhi ko a tii 3 Ioane.) Be é ha a benaamwon naa, ke hiwon ni apulie na lé pwotahi ne ko ni acéihi ne ko Kériso. É mu ko anaa, na time uce nimen me e pipatemehi ni ju niilé ne ha a tii.
É ko ade na e tii?
E tii a bécéiuhe tii ten, 1 Ioane, he e paténe lépwo acéihi ko lépwona lé pacémunilé ko ni pwooti na gele. Ke e tii mwo, be wo lépwonaa, ke lé ko piengen mu ha a céiu duaan, nge ha a céiu duaan, beme lé pipwohuô te lépwo acéihi (1.10−11).
Ade ace âne a tii ce?
Lupwo pwooti na junaado ne ha a tii ce (me ati ni tii te Ioane), ke a juuju, me a pipwoééhe. A juuju, ke e âbé mu ko Kériso me a pwooti kon (1.1−4). Omehi mwo a juuju ne ha a Niinaado (Vocabulaire) ha anebwén ko a tii. Heme nye mulie ne ha a juuju, ke o habwii ne ha a pipwoééhe tenye (1.5), ke genye o temehi lépwo apwocémun na lé pipwohuô, ke time genye o uce picani telé ne he ni penem delé (1.10−11).
A bwomune a tii 2 Ioane
Pipwobwocu (1.1−3)
Mulie ha a juuju me a pipwoééhe (1.4−6)
Lépwo apipune agele (1.7−11)
Bépinelé (1.12−13)
1
Pipwobwocu
1 Tii te [Ioane] pa ukéiu ne ha a céihi, ne te ê toomwo na e pipégalieng wo Padué, me ni naîn. Te nihe eânimung dewé, ke time uce woéo cehi, kehe tai nina lé temehi a *juuju.
2 Eânimeme tewé, wonaa mu ko a juuju na e konye, na e o te mu konye dieli mwo.
3 Me e mu pelenye a *pipwoééhe tice ja kon, ke a péém, ke a *adéihi, mu pele Padué Caa, me Iésu *Kériso pa Naîn, ne ha a juuju ke a pipwoééhe!
Mulie ha a juuju me a pipwoééhe
4 Te nihe ubwo a pipwodéén dong he é too ni béé naîm, na lé engen ha a juuju, âcehi a patén na e ne tenye wo Caa.
5 É jenaa, go êje, ke weengi ana é ilehi: Me pieânimenye tenye! Time uce a patén na mwo coho na é tii me dem, be ana genye caa te hegi ha atabuhi kon.
6 Be a pipwoééhe, ke me genye âcehi ni patén de Padué. Wonaa a patén na caa picaa tewé ha atabuhi kon: Geé pwo me pieânimewé tewé!
Lépwo apipune agele
7 Hiwon ni apulie na lé pipwohuô, na lé âbé ne pwo a bwohemwo, ke muhi telé me lé mwomwohi pie wo Iésu Kériso [ke pa *Mesia na] e âbé ha a éé apulie. Woélé ni apipwohuô ke ni acubwoni Kériso.
8 Geé pipwocilekewé, beme time geé uce patieden ni acehi ni penem dewé, kehe me geé hegi a cuhin na hején.
9 Wo paceli e piâ ité koja a pwaaden, ke me time e uce mu ko ni cémun de Kériso, ke te time uce e kon wo Padué. Kehe wo paceli e mu ko ni cémun de Kériso, ke e kon wo Caa me pa Naîn.
10 Mepie pwo paceli e âbé ne pelewé, ke me te tieden kon a cémun de Kériso, ke geé nemwo hegieng ne pelewé, ke geé nemwo pwobwocu ten.
11 Be wo pana e hegieng, ke e hegi mwo ni naado na ta na e pwo.
Bépinelé
12 Hiwon ni naado na me é pii tewé, kehe time uce nimung me é tii ne he tii. Be é niimihi pie é bo âdé ne pelewé, ke me genye picihe ibu, ne ha a pipwodéén na hején.
13 Lé niimiko ni naî ê béém na e pipégalieng wo Padué, ke lé pwobwocu tem.