4
1 Wo Padué, ke e caa mi pii [te ni watihenye] pie: «É bo péékewé nge ha amwaale [me a péém] na é caa pipwopweehi me dewé.» Ke ana e caa mi pii, ke e caa cuwo me denye jenaa. Ke anaa, me genye pipwocile, be koli e bo tauti ce béén mu konye wo Padué, be e bo pii pie, time lé bo uce tuie nge ha amwaale ten.
2 Be caa te patemehi tenye a pwooti na wâé [ko a amwaale naa] pwohewiilé. Kehe icehi ana woélé, ke te tice ceme a pwooti na lé téne, mu ko ana time lé uce hegi ko a céihi.
3 [Weengaa a watihen me] e pii wo Padué pie:
É okéé ne kolé, ke é patemehi pie:
O time lé bo uce tuie
nge ha amwaale tong,
[a péém] na é caa pwopweehi!
Psaume 95.11
Tehi ne tenye a amwaale naa
Kehe icehi ana wogenye na nye céihi, ke genye o hegi a ju mwaale me a péém de Padué [na e caa nebwén ko pwopweehi wo Padué ha atabuhi kon]. Be ati ni âniimihinaado ten ne ko ni penem na e bo pacuwohi, ke caa hején, ânebuhe a bwo tabuhi na a bwohemwo.
4 Genye te pine mwo ne ha a céiu duaan ne he ni tii iitihi [li e pwo wo Padué, ha atabuhi kon]. Be caa tii pie: E mwaale wo Padué ha a bé7 he ni tan, alecehe ni penem na e pwo.Genèse 2.2
[Weengaa a bé7 he ni tan ha a naadenitan.]
5 Genye mwojuia ne mwo ko a niide a tii, li e pii pie:
O time lé bo uce tuie
nge ha amwaale tong,
[a péém] na é caa pwopweehi!
Psaume 95.11
6 [Me genye pine anaa, ke genye te temehi pie] te pwo amwaale [me a péém] na e caa pwopweehi wo Padué. Ke genye caa alihi pie, ni béén na lé caa mi hegi a pwooti na wâé [ko a amwaale naa] ke time lé uce taa hen, be time lé uce piténedeeng.
7 Ke anaa kuti, na e ne a céiu tan wo Padué [beme lé o hegi a ju péém den wo lépwo béé apulie]. Ke a tan naa, ke “é jenaa”! Ke ali e pii, ne ha ali niide a tii, ne he ni tii iitihi pie:
Me geé téne a pwoto te Padué
ha a tan jenaa,
ke geé piténedehi!
Psaume 95.7−8
Ke a pwooti naa, ke caa junihe bwolihi, ke wo pa daame *Davita na e pwaadeniin mwobé [ne ko a bwo engen de ni ukéiu tenye ne ha a melé].
8 Ana genye alihi pie, a amwaale [me a péém] ke time uce a amu li e péélé nge hen wo Iosua. Be mepie wonaa, ke wieli time e bo uce cihe mwo ko ace céiu tan wo Padué.
9-10 É mu ko anaa, ke pwo amwaale [me a péém] tenye, ni apulie te Padué. Ke genye o taa hen, ke genye o bobe mwaale koja a penem denye. Ke genye o pwohewii Padué, li e mwaale ha a bé7 he ni tan [alecehe a bwo pwo nen den a bwohemwo].
11 Mepie wonaa, ke wâé heme genye hane ne he ni ju pwonimenye me genye hegi a ju péém de Padué. Ke genye nemwo pioi ko ni watihenye [lépwo *Isaraéla] be li lé cibe. Be wo pana time e uce piténede Padué, ke e piâ ité.
A pwooti te Padué ke a teua
12 A pwooti te Padué, ke te nihe pwojunuun, beme e penem konye. Be e pwohewii a teua, na te nihe ânyee lupwo piduaan, be e tahagéi die ko ni acipetééhi konye, ke é die ko ni béle he duunye. Be e gaale die ko ana nimenye kon, me a âniimihinaado na e ha aduwo, ne he ni pwonimenye. Ke e [pwo me pwéélang kolé, me] tautilé.
13 Be te tice ace céiu naado, me pace apulie celi e ha aduwo ne ko Padué. Be weeng na e nelé ati, ke e te temehi a bwopwonen ne kolé. Ke te weeng kuti, na genye bo cuwo he pwahamiin, me habwii ten ati ni penem na genye pwo.
wo iésu ke pa apipépwooti hadeniinye me padué
(Pwahamii tii: 4.14―10.18)
E te temehi a bwo tice niihenye
14 [É ko pii tewé pie] wo Iésu, pa *Naî Padué, ke pa *apwoâpwailo ubwo tenye, na e caa taa he miiden [beme pa apipépwooti hadeniinye me Padué]. É mu ko anaa, na wâé heme genye imwi mangihi a céihi tenye ne kon.
15 Time uce pa apwoâpwailo na e ité kojakenye, be e te temehi ehi a bwo tice niihenye, be te tacebwénieng, ne ko ati nina tacebwénikenye kon. Kehe icehi ana time e uce tupwo ne hen, ke time e uce pwo celi ta.
16 É mu ko anaa kuti, na me time uce piwâ genye, me genye âbé ne he pwahamii Padué, Padaame [na e pwaadeniin bé wo Iésu]. Be genye o bo hegi a *pipwoééhe tice ja kon den. Ke e bo picani tenye [wogenye na tice niihenye] ke e bo te nihe pwo celi wâé ne konye, ha a benaamwon den.