12
Genye tai cumang pwohewii Iésu
1 Caa pajuujuhi ne tenye ni céihi te lépwona lé ânebuhenye, lépwona te junihe hiwon jélé. A mulihelé, ke a béhabwiinen denye. Ke mepie wonaa, wogewé lépwo bééng, ke wâé heme genye pétaabwon ati ni âneule na lé pacuwohi ni bwo téte tenye. Genye necu ni ta na e imwikenye! Ke genye cumang, beme genye te téte die ha anebwén kon.
2 Genye ome Iésu cehi, be weeng na e céihi tenye, mu ha atabuhi kon, ke weeng na e wéihi, beme o hején die ha a pwonehin. Ke e hegi a penem den, ne ha a bwo uca ten. Ke e te nihe mu he ni picani, ke e mele ne ko a *kuricé: a bwo mele na pwo me tanim. Kehe icehi ana e pwo me piticenaado ne ko a tanim naa, be e niimihi a bwo pipwodéén den, ne ha anebwén kon. Ke wo Padué, ke e caa neeng me e tebwo pwo juin [beme e pihuôhi ati ni naado].
3 Wâé heme genye niimihi a bwo picani ten ne ko ni apulie ta na lé te nihe pwotahinaado ne kon. Be mepie wonaa, ke o time genye uce pwoemaan, ke me nye patupwo [ni céihi tenye].
E punekenye be eânimen denye
4 [É temehi pie, lé pwopa ne kowé wo lépwo apulie ta, pwohewii ali lé pwo te Kériso, ke geé te junihe mu he ni picani kon.] Kehe icehi ana mwo time geé uce téele [pwohewii Kériso] die ko ace bwo mele tewé!
5 Ke a céiu mwo, kona geé caa pineuhi pie, e pii kowé pie, wogewé ni naîn, ke e punekewé [ko a bwo mu tewé he ni téé me ni picani]? Be e pii pie:
Pa ju naîng wé,
go tabemi Padaame na e punekewé.
Go nemwo pwo me pita tem.
6 E pune ati ni ju naîn.
E pune ati lépwona
eânimen delé.
Proverbes 3.11−12
7-8 É mu ko anaa, na geé hegi ehi ni pune te Padué, he e huôhi ne tewé ni naado. Be e wonaa te ati ni naîn. Be he woo pace ewa celi time e uce ne pune ten wo pace caa ten? Ke mepie time e uce wonaa tewé wo Padué, ke a bwopiinen pie wogewé, ke time uce ni ju naîn.
9 Ke mepie genye paciiti ni caa tenye ne éni pwo bwohemwo, nina lé punekenye me pwopweehi ne konye, ke o te nihe wâé mwo heme genye hegi, beme e pwopweehi ne konye wo Padué Caa tenye, na e jeda he miiden. Ke e o mu konye *a ju mulip.
10 Be wo lépwo caa tenye, ke lé te punekenye me éewo konye ha a cuwo benaamwon na te ju bahin, âcehi nina nimelé kon, me ni âniimihinaado telé. Kehe icehi ana wo Padué, ke e huôhi ne tenye ke e punekenye, beme e picani tenye [dieli mwo]. Be wâé ten heme genye â ni apulie ten na wâé genye, ke iitihi, ke hején pwohewiieng.
11 A juuju pie, time uce wâé tenye a cuwo benaamwon na genye mu he ni pihuô me ni pune tenye. Kehe icehi ana mepie genye hegi ehi, me picani ne kon, ke é alecehen, ke e o bo pwo ce cemenye celi o nihe wâé. Be genye o bo ni apulie ko a péém: nina lé te pwo nina wâé, ke mwomwon.
Go cuwoda!
12 Anaa na [é muko pii tewé pie]:
[Go cuwoda!]
Go pamwoiuhi lupwo im!
Hane ce niihe lupwo am na éjén!
13 Go â ha a pwaaden na mwomwon!
Go nemwo padep kojan!
[Pwo taaci nina wâé!]
Beme o ne tem mwo ace niihem,
wogo pa tebwa!
Ke go engen mwomwon!
Go te cuwo ko piténede Padué!
14 [Weengi ni pihuô tong me dewé]: Geé hane me geé mulie ha a péém me ni apulie ati. Ke geé mulie ha a mulie na wâé te Padué. Be o te junihe pwocoon me geé ali Padaame, hemepie time geé uce wonaa.
15 Geé pipwocile! Geé nemwo piâ ité koja a *pipwoééhe tice ja kon de Padué [be koli time geé bo uce hegi ni adéihi ten]. Ke geé piwéa kowé, me pipwoiipikewé, be koli e bo ne waan ne kowé ace céiu ta, na pwohewii a meté na ta. Ke e epin ko engen, ke e ne ni acehin na maga.
16-17 Ke geé pipwocile mwo, beme o te tice mu kowé celi lé pipule hauli. Ke a céiu mwo, ke me time geé uce pipwohewii a bwomu te Ésaü ânebun. Be genye tai temehi a jepule kon. Be te pa cuwon, na eten ni *adéihi te caa ten. Ke e icuhi [haulihi te pa ciéén] ne ko a tami wiinaado na te céiu! Ke é alecehen, [ke e bwo alihi ana e pwo] ke e pimiibule ke é, ne he pwahamii caa ten, beme e ilehi kojaeng mwo ni adéihi ten. Kehe icehi ana caa time uce jan. Ke caa time e uce hegieng wo caa ten. Anaa na me geé pipwocile! Ke geé pwo me wâé tewé ni naado [ne ha a Mwametau] te Padué!
Genye piâmwonuhi a juwole iitihi
18 Wogewé lépwo bééng, genye caa piâmwonuhi a juwole na time uce jan me genye ti kon [me alihi ko lupwo naamiinye]. Mepwo é ne ko lépwo ukéiu tenye, lépwo *Isaraéla ânebun, [ke te nihe mwotilé] he li lé piâmwonuhi a juwole Sinaï, [beme lé o hegi ni patén de Padué]. Be lé alihi nelang a duwele miû me a bwén, me a melepiing. Ke e ti kolé a dan-he-duéé.
19-20 Ke lé téne a pwocuu tutu. Ke e pacihelé [wo Padué] ha a pwocihe na nihe ubwo: [Iitihi me geé â pwo a juwole ce!] Pace wota, me pace apulie celi e ti kon, ke o taunueng ko péi!Exode 19.12−13
Ke [te junihe mwoti lépwo Isaraéla] ke lé toii da céiieng pie: «Éé! Go cuwo, go Padaame!» Be time uce jan me lé téneeng,
21 die ko *Moosé mwo, [pa apihuô telé]. Be caamadaim kon, ke éjén nang ko a bwo mwotieng.
22-23 Mepwo é ne konye, ke genye pipwodéén, me genye piâmwonuhi a juwole *Sion, me a pwomwo ubwo na e jeda he miiden. Be te é *Iérusaléma [na mwo coho] a amu te Padué na e mulip. Ke genye ko cuwo ha amu te pa atauti ati ne ni apulie. Ke pwia ni pwonimenye, be wogenye lépwo ju naî Padué, wogenye na caa tii ni niinye ne he miiden [beme etenye ni adéihi ten]. Ke genye o tai pimu ibu me nina lé caa mele ânebun, nina wâé te Padué jélé: ati lépwoli e pwo me mwomwon jélé me hején jélé ne he pwahamiin. Ke lé aujenikenye ni *âcélo na te junihe hiwon jélé, na time uce jan me genye pinelé.
24 Ke genye âbé céii Iésu, pali e pébé céiikenye a *piapwo na mwo coho [li e caa pwo wo Padué] me denye. Ke e caa pacuwohi wo Iésu, ko a bwo tée na a cewéhen [he li e mele me denye]. Ke a cewéhen, ke te nihe pwojunuun koja a cewéhe Abel.
25 Anaa na me geé pipwocile, be koli muhi tewé me geé piténede Padué, na e ko pacihekewé! Be li pwocoon me lé cela ko a cuhinaado wo lépwo watihenye, lépwo Isaraéla, he li lé bitelé koja Moosé. Ke wo Moosé, ke te pa apulie pwo bwohemwo. Ke o bo woté ace cuhinaado te ati lépwona lé bitelé koja Padué, na e jeda he miiden?!
26 Be li [é ne pwo a juwole Sinaï] he li e pwo me gun a bwohemwo ko a pwocihe ten, ke e caa pii tenye pie: É bo pwo me gun mwo a bwohemwo ati. Ke time uce a bwohemwo cehi, kehe o te a miiden mwo!Aggé 2.6
27 A bwopiinen pie: O tieden a bwohemwo me ati nina lé mu pwon, be ni naado na e ne wo Padué. Kehe te icehi ni naado na lé mu pelen, na lé o tee mu dieli mwo.
A Mwametau na time o uce gun
28 Genye caa hegi [a atebwo ne ha] a Mwametau ten na time uce gun! Anaa na wâé heme genye nihe pwo-olé ten, me pipaunueng. Ke genye penem den ko a mulip na iitihi ke wâé ten. Ke genye te nihe pwoiitihi ten,
29 be wo Padué henye, ke e pwohewii a miû na e pwo me éle tieden ati ni naado!