Ri rucaꞌn carta ri xutzꞌibꞌaj ri apóstol San Juan
Ri apóstol Juan xutzꞌibꞌaj va carta va y xutak-el cha jun ixok ri runiman ri Cristo (versículo 1). Ri Juan xratamaj quivach ri ral ri ixok reꞌ y xratamaj jeꞌ chi quiniman ri Dios y rumareꞌ xutak-el va carta va (versículo 4). Va carta va nuꞌej ri chica chi cꞌaslien niquicꞌuaj ri quiniman chic ri Dios. Nuꞌej chi cof caꞌcꞌujieꞌ chupan ri ketzij y ticꞌujieꞌ ri amor pa tak cánima. Nuꞌej jeꞌ chica chi man tiquiyaꞌ quixiquin chica ri xa man ketzij ta chi i-rusamajiel ri Dios.
Ri versículos 1-4, ri Juan nuꞌon saludar ri ixok y ri ru-familia ri choj chica xutzꞌibꞌaj ri carta.
Ri versículos 5-11 nuꞌej chirij ri amor y nuꞌej chiquij ri falsos maestros y ri niquicꞌut.
Y ri versículos 12-13, ri Juan nuqꞌuis ri ru-carta riqꞌuin jun saludo.
1
Ri saludo
1 Inreꞌ Juan, ri anciano chiquicajol ri hermanos, nitzꞌibꞌaj-el va carta va chava atreꞌ hermana ri at-choꞌn ruma ri Dios, y chica jeꞌ ri aval. Can ketzij nquixvajoꞌ. Y man joꞌc ta inreꞌ ri najoꞌn ivichin, xa can nquixcajoꞌ jeꞌ ri nicꞌaj chic ri cataꞌn chic ri ketzij.
2 Y ruma cꞌo ri ketzij riqꞌuin kánima, rumareꞌ nquixkajoꞌ. Y ri ketzij xticꞌujieꞌ kiqꞌuin richin nojiel tiempo.
3 Ja ta ri favor, ri misericordia y ri paz ri nuyaꞌ ri Katataꞌ Dios y ri Ajaf Jesucristo ri Rucꞌajuol ri Dios, ticꞌujieꞌ riqꞌuin ivánima. Can nojiel reꞌ xtiyoꞌx chiva, ruma iyoꞌn ivánima riqꞌuin ri ketzij y ruma jeꞌ can ntivajo-iviꞌ.
Quixcꞌujieꞌ chupan ri xucꞌut ri Jesucristo
4 Inreꞌ altíra xiquicuot antok xaꞌnvil nicꞌaj chiquivach ri aval chi quicꞌuan ri ketzij, can incheꞌl nuꞌej ri ru-mandamiento ri Katataꞌ Dios chika.
5 Y vacame hermana, nicꞌutuj favor chava chi tabꞌanaꞌ ri nuꞌej ri Cristo, chi can kajo-kiꞌ konojiel. Y ri mandamiento reꞌ man cꞌacꞌacꞌ ta, xa jareꞌ ri eꞌn-pa chika antok xkanimaj ri Cristo.
6 Y ri amor cava, chi nakaꞌan incheꞌl nuꞌej ri ru-mandamientos ri Dios. Ruma ri ru-mandamiento nuꞌej chi kajo-kiꞌ. Y ixreꞌ ivataꞌn chi quireꞌ nuꞌej, ruma quireꞌ xꞌeꞌx chiva antok xinimaj ri Cristo.
7 Iqꞌuiy ri ncaꞌbꞌano maña i-bꞌanak choch-ulief ri ncaꞌeꞌn chi antok ri Jesucristo xpa vaveꞌ choch-ulief, man xuoc ta vinak incheꞌl ojreꞌ. Y ri jun ri niꞌeꞌn quireꞌ chirij ri Jesucristo, jareꞌ ri nibꞌano maña y jajaꞌ ri anticristo.
8 Pero ixreꞌ tibꞌanaꞌ cuenta-iviꞌ, chi quireꞌ man jun xtisach can cha ri rajal ri isamaj ri xtiyoꞌx chiva, y can nojiel xtiyoꞌx chiva.
9 Chica-na ri ntiel-el chupan ri xucꞌut can ri Cristo, y xa nuyaꞌ can, xa manak ri Dios riqꞌuin. Pero ri man nuyaꞌ ta can ri xucꞌut ri Cristo, can cꞌo ri Katataꞌ Dios y ri Rucꞌajuol riqꞌuin.
10 Xa cꞌo jun xtalka chiꞌivachuoch y man ja ta ri chꞌabꞌal ri xucꞌut ri Cristo ri rucꞌamun-pa chiva, man ticusaj-oc chiꞌivachuoch, ni man jaꞌal tiꞌan recibir.
11 Ruma xa xtiꞌan recibir jaꞌal, can xtivakaliej jeꞌ ixreꞌ nojiel ri itziel tak kax ri ncaꞌruꞌon ri jun reꞌ.
Ri Juan nrajoꞌ niꞌa quiqꞌuin ri hermanos
12 Y cꞌo qꞌuiy ri nivajoꞌ niꞌej chiva. Pero man nivajoꞌ ta nitzꞌibꞌaj más chupan va carta va. Ruma can nirayij nquibꞌaka iviqꞌuin chi nquitzijuon chiva, chi quireꞌ ri kánima can xtiquicuot.
13 Ri i-ral ri avachꞌalal, ri choꞌn jeꞌ ruma ri Dios, niquitak-el jun saludo chava. Amén.