4
Eb' yin̈tilal Judá
1 A eb' vin̈ yin̈tilal vin̈aj Judá, aton eb' vin̈ tic d'a stzolal: Vin̈aj Fares, vin̈aj Hezrón, vin̈aj Carmi, vin̈aj Hur yed' vin̈aj Sobal.
2 A vin̈aj Sobal chi' smam vin̈aj Reaía, smam icham vin̈aj Jahat. Axo vin̈aj Jahat chi' smam vin̈aj Ahumai yed' vin̈aj Lahad. A yin̈tilal eb' vin̈ ix cajnaj d'a Zora.
3-4 A vin̈aj Hur sb'ab'el yune' ix Efrata yed' vin̈aj Caleb. A eb' vin̈ yin̈tilal vin̈ ix b'ab'laj cajnaj d'a chon̈ab' Belén. Ay oxvan̈ eb' vin̈ yuninal vin̈, aton vin̈aj Etam, vin̈aj Penuel yed' vin̈aj Ezer. A vin̈aj Etam smam vin̈aj Jezreel, vin̈aj Isma, vin̈aj Ibdas yed' ix Haze-lelponi. A vin̈aj Penuel chi' ix b'ab'laj cajnaj d'a chon̈ab' Gedor, axo vin̈aj Ezer chi' ix b'ab'laj cajnaj d'a chon̈ab' Husa.
5 Axo vin̈aj Asur ix b'ab'laj cajnaj d'a chon̈ab' Tecoa, chavan̈ eb' ix yetb'eyum vin̈: Aton ix Hela yed' ix Naara.
6 Axo eb' vin̈ yuninal vin̈ yed' ix Naara chi', aton vin̈aj Ahusam, vin̈aj Hefer, vin̈aj Temeni yed' vin̈aj Ahastari.
7 Axo eb' vin̈ yuninal vin̈ yed' ix Hela chi', aton vin̈aj Seret, vin̈aj Jezoar yed' vin̈aj Etnán.
8 Axo vin̈aj Cos smam vin̈aj Anub yed' vin̈aj Sobeba. D'a yin̈tilal vin̈aj Cos chi' ix cot vin̈aj Aharhel, yuninal vin̈aj Harum.
9 Ay jun vin̈ scuchan Jabes, te nivan yelc'och vin̈ d'a scal eb' sc'ab'yoc. A ix snun vin̈ ix ac'an scuch Jabes, yujto ix yal ix: Te ya ix in ec' yuj jun vune' ix alji tic, xchi ix.
10 A vin̈aj Jabes chi', ix och vin̈ ejmelal d'a sDiosal Israel, ix yalan vin̈ d'ay: Tzin c'an d'ayach Mamin to tzac' a vach'c'olal d'a vib'an̈, yic nivan tz'aj in macb'en, to tzach och ved'oc tzin a colanel d'a chucal, yic vach' max vab' syail, xchi vin̈ d'a slesal chi'. Ix yac'an Dios masanil tas ix sc'an vin̈ chi'.
11 A vin̈aj Quelub yuc'tac vin̈aj Súa, a vin̈ smam vin̈aj Mehir, axo vin̈aj Mehir chi', smam vin̈aj Estón.
12 Axo vin̈aj Estón chi' ay oxvan̈ yuninal vin̈: Aton vin̈aj Bet-rafa, vin̈aj Paseah yed' vin̈aj Tehina. A vin̈aj Tehina chi' ix b'ab'laj cajnaj d'a chon̈ab' Nahas. A eb' yin̈tilal eb' vin̈ oxvan̈ chi' ec'nac cajan d'a Reca.
13 Axo vin̈aj Cenaz ay chavan̈ yuninal vin̈: Aton vin̈aj Otoniel yed' vin̈aj Seraías. Chavan̈ pax eb' vin̈ yuninal vin̈aj Otoniel chi', aton vin̈aj Hatat yed' vin̈aj Meonotai.
14 A vin̈aj Meonotai chi' smam vin̈aj Ofra. Axo vin̈aj Seraías chi' smam vin̈aj Joab, aton vin̈ ix b'ab'laj cajnaj d'a ac'lic Carisim. Icha chi' sb'i jun lugar chi', yujto ata' cajan eb' anima jelan sb'oan tastac.
15 Axo vin̈aj Caleb yuninal vin̈aj Jefone ay oxvan̈ eb' vin̈ yuninal vin̈: Aton vin̈aj Iru, vin̈aj Ela yed' vin̈aj Naam. A vin̈aj Ela chi' smam vin̈aj Cenaz.
16 Axo vin̈aj Jahalelel ay chan̈van̈ eb' vin̈ yuninal vin̈: Aton vin̈aj Zif, vin̈aj Zifa, vin̈aj Tirías yed' vin̈aj Asareel.
17-18 A vin̈aj Esdras ay chan̈van̈ yuninal vin̈: Aton vin̈aj Jeter, vin̈aj Mered, vin̈aj Efer yed' vin̈aj Jalón. A vin̈aj Mered chi', ix yic'laj sb'a vin̈ yed' ix Bitia, yisil vin̈ sreyal Egipto. Axo yalyuninal vin̈ yed' ix, aton ix María, vin̈aj Samai yed' vin̈aj Isba. A vin̈aj Isba chi' ix b'ab'laj cajnaj d'a chon̈ab' Estemoa. Axo junxo ix yetb'eyum vin̈aj Mered chi', aj Judá ix. Oxvan̈ yuninal vin̈ yed' ix, aton vin̈aj Jered, vin̈aj Heber yed' vin̈aj Jecutiel. A vin̈aj Jered chi' ix b'ab'laj cajnaj d'a chon̈ab' Gedor, axo vin̈aj Heber, a d'a chon̈ab' Soco ix b'ab'laj cajnaj vin̈. Axo pax vin̈aj Jecutiel chi', a d'a chon̈ab' Zanoa ix b'ab'laj cajnaj vin̈.
19 A vin̈aj Hodías ix yic'laj sb'a vin̈ yed' ix yanab' vin̈aj Naham. D'a yin̈tilal eb' ix cot eb' garmita, ix cajnaj eb' d'a Keila. An̈eja' d'a yin̈tilal vin̈aj Hodías chi' ix cot eb' maacateo, axo d'a Estemoa ix cajnaj eb'.
20 A vin̈aj Simón chan̈van̈ yuninal vin̈: Aton vin̈aj Amnón, vin̈aj Rina, vin̈aj Ben-hanán yed' vin̈aj Tilón.
Axo vin̈aj Isi ay chavan̈ yuninal vin̈: Aton vin̈aj Zohet yed' vin̈aj Benzohet.
21-22 Axo eb' vin̈ yin̈tilal vin̈aj Sela yuninal vin̈aj Judá, aton eb' vin̈ tic: Vin̈aj Er, vin̈ b'ab'laj cajnajnac d'a Leca yed' vin̈aj Laada, vin̈ b'ab'laj cajnajnac d'a Maresa, smam yicham eb' sch'alan c'apac lino d'a chon̈ab' Bet-asbea. An̈ejtona' vin̈aj Er chi' smam vin̈aj Joacim yed' eb' anima cajan d'a Cozeba yed' vin̈aj Joás yed' vin̈aj Saraf. A vin̈aj Joás yed' vin̈aj Saraf, ix yic'laj sb'a eb' vin̈ yed' chavan̈ eb' ix aj Moab. Slajvi chi' smeltzajnacxi eb' vin̈ d'a Belén, icha chi' yaj stz'ib'chajcan d'a peca'.
23 A juntzan̈ eb' chi' tz'acum eb'. A d'a Netaim yed' d'a Gedera cajan eb', yac'nac servil vin̈ rey eb'.
Eb' yin̈tilal Simeón
24 A vin̈aj Simeón ovan̈ eb' vin̈ yuninal vin̈: Aton vin̈aj Nemuel, vin̈aj Jamín, vin̈aj Jarib, vin̈aj Zera yed' vin̈aj Saúl.
25 A eb' vin̈ yin̈tilal vin̈aj Saúl chi' d'a stzolal: Vin̈aj Salum, vin̈aj Mibsam, vin̈aj Misma.
26 Axo eb' vin̈ yin̈tilal vin̈aj Misma chi', aton vin̈aj Hamuel, vin̈aj Zacur yed' vin̈aj Simei.
27 A eb' vin̈ yuninal vin̈aj Simei chi', 16 eb' vin̈, vacvan̈ pax eb' ix yisil vin̈. Axo pax eb' vin̈ sc'ab'yoc vin̈, malaj val yuninal eb' vin̈, yuj chi' maj q'uib' sb'isul eb' vin̈ icha yin̈tilal Judá.
28-31 A eb' yin̈tilal Simeón chi' ix cajnaj eb' d'a juntzan̈ lugar tic: D'a Beerseba, d'a Molada, d'a Hazar-sual, d'a Bilha, d'a Esem, d'a Tolad, d'a Betuel, d'a Horma, d'a Siclag, d'a Bet-marcabot, d'a Hazar-susim, d'a Bet-birai yed' d'a Saaraim. Ata' cajan eb' masanto yic ix och vin̈aj David reyal.
32 Ayto pax oyexo schon̈ab' eb': Aton Etam, Aín, Rimón, Toquén yed' Asán,
33 yed' masanil yaldeail juntzan̈ chon̈ab' chi' masanto d'a chon̈ab' Baal. Aton juntzan̈ chon̈ab' chi' b'aj cajan eb' yed' yin̈tilal icha yaj stz'ib'chajcani.
34-38 Ayic ix q'uib' sb'isul eb' yin̈tilal Simeón chi', aton eb' vin̈ tic yajal yaj d'a scal eb': Vin̈aj Mesobab, vin̈aj Jamlec, vin̈aj Josías (yuninal vin̈aj Amasías), vin̈aj Joel, vin̈aj Jehú (yuninal vin̈aj Josibías, axo vin̈aj Josibías chi' yuninal vin̈aj Seraías, axo vin̈aj Seraías chi' yuninal vin̈aj Asiel) yed' pax vin̈aj Elioenai, vin̈aj Jaacoba, vin̈aj Jesohaía, vin̈aj Asaías, vin̈aj Adiel, vin̈aj Jesimiel, vin̈aj Benaía yed' vin̈aj Ziza. (A vin̈ smam vin̈aj Ziza chi' aton vin̈aj Sifi, yuninal vin̈aj Alón, yuninal vin̈aj Jedaías, yuninal vin̈aj Simri yuninal vin̈aj Semaías).
39 Yujto ix q'uib' sb'isul eb', yuj chi' ix b'at eb' d'a stojolal b'aj tz'em c'u, ix c'och eb' d'a slac'anil chon̈ab' Gedor. Ix sayan eb' b'aj sva noc' smolb'etzal noc' d'a stojolal b'aj sjavi c'u, d'a jun ch'olan b'aj scan jun chon̈ab' chi'.
40 Ata' ix ilchaj an̈ an̈c'ultac te yaax yuj eb', te vach' an̈, te ay pax an̈. Te levan yec' jun lum luum chi', junc'olal yajec' eb', malaj tas tz'ic'an eb', aton ta' ec'nac cajan eb' yin̈tilal Cam d'a peca'.
41 A d'a stiempoal vin̈aj Ezequías sreyal Judá, ata' ix javi juntzan̈ eb' toxo ix b'inaj sb'i tic. A eb' satjinaquel eb' anima cajan ta' yed' scampamento eb' yed' spat eb'. Juneln̈ej ix satel eb' smasanil. Axo eb' ix cajnajcan d'a slum eb' chi', yujto te ay svael noc' smolb'etzal noc' eb'.
42 An̈ejtona', ay pax 500-xo eb' vin̈ vinac d'a yin̈tilal Simeón chi' ix c'och cajan d'a lum tzalquixtac d'a yol yic Seir. Axo eb' vin̈ yuninal vin̈aj Isi, aton vin̈aj Pelatías, vin̈aj Nearías, vin̈aj Refaías yed' vin̈aj Uziel ayoch yajaliloc eb'.
43 A eb' ix satanel eb' amalecita aytoec' ta'. Axo eb' ix cajnajcan ta'.