54
A scolval Dios sc'anchaji
Ayic sb'itan jun b'it tic vin̈ cuchb'um yic b'it, a yamc'ab' ay sch'an̈al sc'anchaji. Sb'it jun tic vin̈aj David, ayic ix c'och eb' aj Zif, ix yalan eb' d'a vin̈aj Saúl: A d'a sat co luum sc'ub'ejel sb'a vin̈aj David, xchi eb'.
1 Ach in Diosal, colin icha ajnac alan d'ayin. Colin yujto syal uuj smasanil.
2 Ach in Diosal, ab' in lesal tic. Ac'cot tz'eyan a chiquin d'a tas svala'.
3 Yujto a eb' anima man̈ vojtacoc tz'och ajc'olal d'ayin, aton eb' comonn̈ej tz'ac'an chucal d'a yetanimail. Sgana eb' to tzin chami. Malaj elc'och d'a eb'.
4 Palta jun, tic val a ach ayachoch ved'oc. Tic val uuj pitzan in.
5 A schucal eb' ayoch ajc'olal chi' d'ayin ol meltzajoch d'a yib'an̈ uuj. Mamin, satcanel eb' yujto tzac'n̈ejelc'och tas tzala'.
6 Mamin Jehová, ol vac' in silab' d'ayach d'a yol vico', ol ach in b'itani yujto vach' ach,
7 yujto ix in a colel d'a smasanil vilc'olal. Ix vilan scan eb' ajc'ool d'ayin d'a yalan̈ uuj.