17
Ataiꞌa, Ilaidiya sa Fakalahe
1 Kin 17:1
1 Tisibi dogana hesana Ilaidiya, Gileyada nuꞌuna yai ya gogogo, ya libalau Ahaba lebena iyen,
E liba dudulai Isalaela edi Guyau yo edi Yaubada E fafadebasae matana yai mate haba bolima fisa ibege usa yo kipwala bwasuludi, ya lau ee–, ana sigana yau E liba.
Yo fede hige usa yo hige kalahe boliman lofalofa.
Hwabuhwabu Selafata yai
1 Kin 17:8-24
8 Habahim Guyau ya libalau Ilaidiya lisina. Iyen,
9 Itete na u lau Selafata yai u miya, Sidon taonna sadaina yai. Hwabuhwabu hesa amainiya E faliba haba ya fakalahem.
10 Yo fede Ilaidiya ya lau Selafata. Fuyanna ya mahano lau, hwabu oyagi ya tanotano gogo ya ita taon aba luhuluhu launa yai. Yo fede ya yoga lau lisina iyen,
Aee–, ibe gonowana hoꞌowa begana huliu yai wa leyama be agu E nom.
11 Ya laulau hoꞌowa ana halulu na ya yoga fuyo iyen,
Aee–, fwalawa agu begana hinaga u abi.
12 Hwabu ya libalau Ilaidiya lisina iyen,
Wananaha Guyau em Yaubada ya mwahumwahuli na hesana yai E falibam mate hige agu fwalawa. Agu fwalawa ni, nima gogo esega yo oliwe masina begana wananaha fuhena yai. Oyagi E tanotano gogo te, bena E lau luma be ma natugu ama anꞌan ofiꞌofina E gabu be ꞌe an. Na mulina haba ꞌe miyamiya moho ee–, ꞌe peꞌi.
13-14 In moho Ilaidiya ya libalau kaihwabu lisina iyen,
Tabu u ꞌwasabu! Guyau Isalaela edi Yaubada ya liba iyen, “Fwalawa huliuna yo oliwe masina fuhena ibege i ofi ee–, Guyau usa ya leyama be tanohi ya faꞌwau!” Be u lau luma na somo wa libaen, u ginauli watan. Bwaiꞌibwaꞌina bena fwalawa agu begana wa ginauli. Habahim somo ota fahina begana, ma natum ami wa gabu.
15 Yo fede ya lau luma be somo Ilaidiya ya faliba mate ya ginauli watan. Habahim, Ilaidiya yo waihin ma natuna, lahai ouꞌouli mate adi kalahe,
16 doha haꞌa Guyau ya liba fasunuma Ilaidiya lisina yai fuyanna iyen,
Fwalawa huliuna yo oliwe masina fuhena ibege ti ofi.
17 Fuya hesa, waihin ni natuna ya lepa. Ana lepa ya falaꞌi be ya peꞌi.
18 Yo fede ya libalau Ilaidiya lisina iyen,
Aee–, um Yaubada ena peloweta! Sidohana be wa ginauli doha ite lisigu yai? Wa laoma ite bena egu heyaya wa faꞌitagu logena natugu wa wunui?
19 Na Ilaidiya ya libalau lisina iyen,
Natum u leyama.
Ilaidiya gwama wa, silanna ya abi hwabu nimana yai be ya hasaen bili, be ya faꞌota lidiyen Ilaidiya ena aba enoꞌeno yai.
20 Habahim ma alina laꞌilaꞌina ya lauꞌuꞌula lau Guyau lisina iyen,
Aee–, Guyau, egu Yaubada! Sidohana be hwabu te wa fakamkamna? Ya tauꞌulu be lebena yai E miya, na aho natuna wa kamfunuhi be ya peꞌi?
21 Yo fede Ilaidiya, silan ya hoba tawan ma faihona, na ya tan Guyau lisina iyen,
Aee–, Guyau, egu Yaubada! Gwama te u famwahuli fuyoi.
22 Guyau mate Ilaidiya ena tan ya atahi yo fede gwama ya mwahuli fuyo,
23 be Ilaidiya ya bahe lidiyen tinana ya felen, na iyen,
Wa ita. Natum ya mwahuli!
24 Waihin ya libalau Ilaidiya lisina iyen,
Aho te E siba um Yaubada ena peloweta be somo wa libalibaedi mate wananaha Guyau ya libalibawa lisim.