37
Siyada Kokoyagidi Gonna
Isikiyeli 37:1-14
1 Guyau ena gigibwali hewagu yai be Yaluwana yai ya lawegu gon hesa atipuna yai, na amainiya mate dodoga siyadadi ya mohafu.
2 Ya foyahigu E leu yo E sae gonna yai ni, na siyada kokoyagidi boludi E itadi nuꞌu ya wala otaꞌen.
3 Ya fatiꞌoigu iyen,
Tanoꞌubu dogana! Siyada ni, gonowadi sa mwahuli, e higeꞌe?
Na alinana E bui yawa,
Guyau Yaubada, um ibom wa sibai.
4 Habahim ya falibagu iyen,
Siyadadi u liba pelowetaidi uwe, Siyada kokoyagidi! Guyau ena liba hola au atahi!
5 Guyau Yaubada ya libawa lisimiu doha ite: “Haba yahafuwa E felemiu be ami mwahuli fuyo.”
6 Bwaꞌibwaꞌina haba wanowano galamiu yo fisihomiu E fasusudi. Ai mulina haba ꞌwapimiu E fapatu. Habahim yahafuwa E felemiu be ami mwahuli fuyo na haba ami sibai mate Yau, Guyau.
7 Yo fede somo ya falibagu E lau watan be E liba peloweta. Hola ma libalibagu na E atahi: Siyada sa faikalekaleledi na sa faisusu fuyoꞌidi.
8 Ma maimaineneigu, na wanowano gala, fisiho yo ꞌwapi E itadi sa taumahata siyada yai. In moho hige yahafuwadi.
9 Yo fede ya falibagu iyen, “Tanoꞌubu dogana! Yahafuwa u liba pelowetai doha ite: ‘Guyau Yaubada iyen, “Hwayahwayau tefa mahudoꞌina yai au towama be au yahafuwa lau silan ni lisidi, be haba sa mwahuli fuyo.”
10 Yo fede somo ya falibagu E lau watan. Hwayahwayau E liba pelowetaidi be yahafuwa silan ya luhufidi. Makai! Ma esega! Na sa mwahuli fuyo, ma lau obiyodi, itaꞌitadi doha tau hiyala pwaluna laꞌilaꞌi.
11 Habahim ya libama iyen,
Tanoꞌubu dogana! Isalaela dodogadi mate doha siyada ni. Sa liba tiyen, “Siyadada sa kokoyagi yo hige eda sunuma. Guyau ya tomo afuleda.”
12 Be egu dodoga u liba pelowetaidi uwe, “Guyau Yaubada ya liba doha ite: Ma! Boꞌusamiu haba E soꞌedi be E kamfahimiu na haba E fafuyomiu Isalaela Nuꞌuna.
13 Ai lahaina boꞌusamiu E soꞌedi be E fakalamahanomiu haba ami sibai mate, Yau, Guyau.
14 Haba Yaluwagu E tole ai lisimiu be ami mwahuli fuyo yo emi ai nuꞌu wananahana haba ami gogo, na haba ami sibai mate Yau, Guyau. E libaen. Somo E libaen mate E ginauli watan.”