Wosheetso P'awlos Wosho
Rom Ashuwots Maants
Kindo
Wosh na'o P'awlos wosho Rom ashuwots maants gúút'etso P'awlos Romitse fa'a Ik' moo s'ilosh bí'ettsotse k'ande'er bín bo kotetwok'o woshosha. P'awlos Romitse fa'a amantsuwotston muk' aawosh b́ finiyakon bín bo te'úwe Spen maants amosha b́ tesh, Krstiyani imneti jangosh P'awlos t'iwints b́dek'tsonat krstiyaniwots bo beewotse finats bo jitsitu krstaniwoti danuwots jango ik ikon beezt guut're, P'awlos woshts wosho s'eenon b́datseyir woshanitsne.
P'awlos Romitse fa'a amantsuwotssh b́ jamo b́ t'intsiyakon boosh Ik'o b́ k'onitwok'onowere b́ jangiyihakoon b́ woshman detstso (1:17) «Ik'oke daatsets kááwu woto amanona, amanosha wotiyalo dooshishiyon be'ere» etiru aap'o b́wottsok'owo kitsirwe.
Haniyere okoon P'awlos asaabiyan gawintsdek'tni b́ guut', ayhudiwotsi wotowa Ik' ash woterawwotsi ash jamwots morrosh keewek bowottsotse Ik'onton maneyo boosh geyife, ashuwots Ik'onton manewosh bofalitwere Iyesus Kerstosn amanaarniye, Ik'onton bo need'iyit ik wot handraan b́dowetwonwere handr be b́wottsok'o P'awlos gawintsdek'tni b́kitsiri. Amantso Ik'oke jeeno detsetwe, Ik'i shayiro morronat k'iri angaatse nas'o keshetuwe, K'ot. 5 tuut 8 P'awlos Ik'i nemonat amantsuwots beyotse finit Ik'i shayiri ango eeg k'alosh b́wottsok'o kitsiruwe, Manats dabt P'awlos «Ik'o ash naarosh b́ gedtsotse ayhudiwotsnat Ik'i ash woterawwots aawuk'oneya ik woto bofaliti?» ett aatetsmansh aanidek'osho etiruwe.
Ando aaniyi P'awlos b́kitstsok'on ayhudiwots Iyesusi dek'o bo k'azonwere Ik'o b́ beezke, manbwotwere Iyesus Krstos weeron Ik'o b́ kitsts kashet deero ash naar jamo b́daatsituwo woshoshe. Wotowa eree ayhudiwots Iyesusi bodek'et dúro b́weetuwok'owo P'awlos amanefe, b́s'uwatsnowere P'awlos krstiyani beyo awuk'o beyo b́geyituwok'o, bítsnor amantsuwots boatsatseyosh bodetsts gonkewon shuni weerats sha'o boosh b́geyituwok'oniye b́ iziri, Ik'osh fini jango, krstiyaniwots bodaatsi jangonat bo atsatseyosh bodetsts jishi keewi jangona, ash asaabiyon tuutson aatet keewwotsnowere ik ikon b́ iziri.
Jamon mas'aafan b́detstso
Mas'afanitse ááwu wotts asaabiyots kindo 1:1-17
Kasho ash na'osh geyik b́wottsok'o 1:18—3:20
Ik'o b́kashiyi weero 3:21—4:25
Krstosn daatset handr beyo 5:1—8:39
Ik'o Isra'elsh b́detstso 9:1—11:36
Krstiyaniwotssh fin geyit fino 12:1—15:13
S'uwaatsi jamo 15:14—16:27
1
1 Iyesus Krstossh guuts wottso woshosh s'egetsoke, Ik'i doo shishiyo daniyosh marat'etso P'awlosoke wosheets wosho.
2 Doo shishiyanwere Ik'o nebiyiwots weeron S'ayn mas'aafotse shin shin jangiyets aap'oniye.
3 Doo shishiyonuwere Ik'i na'o b́ naaron Dawit naarotse b́shuweetsok'o kitsitkee,
4 Mank'owere no doonz Iyesus Krstos b́ S'ayin shayiron k'irotse b́tuwon Ik' na'a b́wottsok'o bíangi eenon b́daneyi.
5 Krstos shúúts jangosh Ik' ash Woteraw jamwots bo amanituwok'onat boaletwok'o woshosh b́ weeron wosh na'o wotosh noon betsit s'aato dek'rone.
6 Itwoor Iyesus Krstosk itwotituwok'o Ik'o b́ s'eegts jirwots taalots itne.
7 Eshe Romitse beyiru, Ik'o iti b́ shuntswotsnat b́jiro it wotituwok'o itn s'eegts jamwotso!
Noo nih Ik'oknat nodoonz Iyesus Krstos s'aatonat jeenon itsh wotowe.
P'awlo Roomi ams'iilo b́geetsok'o
8 It imneti shúútso dats jamats b́shishetsotse, jamoniyere shinon Iyesus Krstos weeron it únets jangosh Izar Izeweri údituwe.
9 Jam aawo Ik'o tk'onor itn t gawiruwok'o b́ naay jangosh keewiruwo doo shishiyo daniyosh t nib s'eenon bísh t finiruwu Ik'o taash tgaawoniye.
10 Ando dabr s'uwanatse itok wosh Ik' shuno b́ wotere t weerindo b́káátsituwok'o jam aawo Ik'o t k'oniri.
11 Imnetiyats it kup'ituwok'o itn woshituwo shayiri imo itsh betsosho, itn bek'osh tewuniruwe.
12 Man ti etiruwere taa it imnetiyon, itwere t imnetiyon no atsatsewo nokup'itwok'owe.
13 Ti eshuwotso! k'osh k'osh Ik' ash woterawwotsitse ay amantsuwotsi tdatstsok'o mank'o ititsnoru shuwo daatsosh geeyatniye tteshi, ernmó itok wosh ay aawo tk'anere andish b́borfetso taash k'ano b́k'aztsok'o it danetwok'o geefe.
14 Salat'antswotsi wotowa salat'anerawotsi wotowa dantsuwotsi wotowa danawu ashuwotsi daniyo fal k'ayaatse.
15 Eshe itsh Romn beyiruwotssh doo shishiyo daniyosh tewuniruwe.
Doo shishi aap'o Ik'i ango b́woto
16 Taa doo shishi aap'on jitseratse, doo shishi aap'o shino ayhudiyotssh, bíyats aanat Ik' ash woterawwotssh, Mank'o amants ash jamwotsi kashiyosh falit Ik'i angoniye.
17 Kááwu wotituwo imnetiyon kasho daatsituwe ett guut'ere, Ik'i kááw woto doo shishyon b́be'etsotse b́ jamon asho kááw b́ wotit imnetiyone.
Ash na'i gondfino
18 Ashuwots bogondon aro b́daneerawok'owe bok'aliri, Ik'onowere shato bo k'ztsotse bo gondi jangosh jametsats daaratse Ik' fayo be'etuwe.
19 Boon b́ sezituwere Ik' jango dano boosh b́ geyituwok'o Ik'o b́tookon b́kitsre dant boteshtsotsne.
20 Datso bíazetson tuut ashuwotssh be'erawo Ik'i doyo, manuwere dúre dúri bí angonat Izar Izeweri b́woton bí bíazts keewwots weeron sháánt b́be'eyirwonat t'iwintsosh ashuwots bot'afits t'afiyosh bo etetuwo deshatsne.
21 Bowere Ik'o dant bísh wotit mangonat údon imatsne, bohasabiyon woterawo bowoti t'iwintsraw bonibo t'alu b́wtsi,
22 «Dantsuwots noone» ett dartsuwotsi bowoti.
23 Besherawu Ik'o mangiyoniyere beshit asho aro wotts ariyetso, Kafon, awd tuf detsts gizuwotsn, datsatse geetseyiru dins'otswots aron arit finetsuwotssh mango boími.
24 Mansh boatsatsewo botook atsats jitsit fino bok'alitwok'o Ik'o kimon s'eents bonib tewunosh keewetswotsi bowotitwok'o k'azb́k'iri.
25 Man b́wotuwere Ik' aro kooton bowonitsosh, aztso shegro azeetso boik'itsonat bísh guuts bowottsoshe, Ik'onmó dúre dúrosh údeke! Amen.
26 Ashuwots man bok'altsotse Ik'o Woteraw wic'ets tewunosh beshidek't boon bí imi, bo mááts máátsuwots dab azeewon daneets gonkewo daneerawu gonkeyi naaron woni bok'ri.
27 Mank'o nungushuwotswere daneets gonkewo máátsuwotswotsnton wosho k'azt boatsatsewo bogúsiyon bomis'i, mansh nungushuwots nungushonton jitsits keewo bofini, bo sheeltsi jangosho boosh wotit fayo bomeetson bodek'i.
28 Ashuwots Ik' dano geyo bok'aztsotse wic'ets keewo bo finituwok'o Ik'o Woteraw nibosh beshidek't imb́k'ri.
29 Mansha morron, gondon, jaalon, weerigondon, okooron, kashúd'on, shid'eyon, dirshon, gond tewunon s'eent, ando oonetswotsiye,
30 Ash shúúts t'afiyruwots, Ik'o shit'iruwots, ash ketiyiruwots, mishetswots, noona boguwotsi etiruwots, gond finosh malo geyiruwots, bonih indosh azazerawwots,
31 T'iwintsde'awwots, keewetso gakiruwots, shuno deshawwots, maac'kup'uwotsiye.
32 «Keewanotsi k'aliru jamwots k'ire boosh wotiti» etiru Ik'o nemo danfetstniye jaman bok'aliri, k'al mec'ro woterawon, man k'alirwotsnowere bokup'iri.