Wosheetso Yohans Gitl Wosho
Kindo
Yohans woshts wosh gitltso b́ guut'e wosheets eenasho Yohansn wotat b́ guut'ewwere marat'ets máágenunat bnana'uwotsshe. Etoonwere at'biyi ikutsi Ik' mowunat bitsi ash ashuwotsnsh woto k'ayaatse, dan k'awunan b́ guut'e boatsatsewo boshunetwok'o boosh gawiyona, kootets daniruwotsatsnat bodaniyatse boatso korbodek'etuwok'owee.
Jamon mas'aafan b́detstso
Kindo 1-3
Shuno jamoniyere dambe 4-6
Kootets daniyrwots danatse ats kotiy jango 7-11
B́ jamo 12-13
1
1 Tiyoke eenashoke, marat'ets moogenunat b nana'otsnsh, Tí s'uzi b́woteftsere ar dants jamwotswere iti shunfne.
2 Aranwere no dagotse fa'onat shino maantsisho dúre dúron noonton beetwoniye.
3 Ik'o nihonat b́ naay Iyesus Krstotsoke s'aatona, mihretiyona, jenonwere, aronat shunon noonton wotowe.
Aronat shuni jangon
4 N nana'uwotsitse ik ikuwotsi niho noon bí azaztsok'on arikeewon kup'at boere t datstsotse ayidek'at gene'owere.
5 Moo genee, andoor oona neesha, neesh t guut'irwan tzazi handr ark'aye, and t guut'irwan «No ats atsewo shunewone» etts shintson dek't nowooke teshts tzaziyoniye.
6 Ari shuna eto Ik' tzaziyo fina etee. Tzaziymanwere shintson it shishtsok'on «Shunon beewere,» ettsoniye.
7 Iyesus ash wotat meetson b́ be'etsok'o amanerawwots ash sheeliyru aywots datsanatse tuurne. Mank'o ashaan ant'elcirwonat Krstosi k'efirwoniye.
8 Itmó it k'awntso s'eenon dek'osh kup'ore, it fintso b́ t'afrawok'o korde'ere.
9 Krstos danits danaats s'ap'de'er beerawo bíatsnowere wokar ametuwonton Ik'o aaliye, Krstos danits danaats s'ap'de beet ashontonmó Nihonat Nayon bíntoniye bofa'oni.
10 Dan han b́deshawo konwor itok b́wetitkawotiyal it meyits kindshk'ayere, dab́ jamonor bín aatk'ayere.
11 Bín jam aatit asho bínton gond fino kaytsoni b́wotiti.
S'uwaatsi jamó
12 Itsh guut'osh t geyirwo ay keewo detsfe, wotowa eree jamo dabdayon wosho geeratse, Maniyere itok borr noonon itn keewiye tgeyiriye, manwere noshunewo s'een b́ wotituwok'o geeyatniye.
13 N mish marat'etsu nana'uwots neesh jamo woshernee.