3
Iyesus Museyiye bogo b́wottsok'o
1 Darotse iti s'eegetsman kayitu wotts S'ayin amantsuwotso! no imneti kahni naashwots k'aab'onat Ik'o woshtso Iyesusats it aawo gerde'ere.
2 Muse Ik' maa jamatse amanek b́ teshtsok'o Iyesuswere bín naashits Ik'osh amaneke b́ teshi.
3 Maa agtso mooniyere bog mango b́detstsok'owa Iyesus Museyiyere bogts mango daatso bísh geyife.
4 Maa ik iko bín agts asho detsfe, jam keewo agtsonmó Ik'oniye.
5 Shinomaants keewu geyit keewosh gaw b́wotitwok'o Muse Ik'i maa jamatse amanek guutse b́teshi.
6 Krstosmó Ik'o maantse amanetso b́wot na'ok'o wotatniye, b́moonwere noone, b́ moo nowotitwere bí'ats no amanit keewonat arikon bín detsfone err bín noit'irwo nojangtso kup'ide desh nodek'oree.
Ik'i ashuwotssh boatso bo kotetwok'o keewetso
7 Eshe S'ayin shayiro bí'etirwok'on
«Hambets b́ k'ááro it shishor
8 Worwotse taan it fador ti'ats it tuutsok'o
It nibo k'aztsi woshk'ayere,
9 Hansh it nihots taan bo fadi taanton bo weed'eyi
Hab natosh tk'altsonowere bobek'i» etfe Ik'oni.
10 «Mansh man dúri s'ootwotsi t fayere,
‹Bonibo jam aawo b́sheliri,
T weerindonowere danatsne› ti eti.»
11 Aaninwere,
« ‹Taa boosh ti imet kashdek'et beyok b́ jamon kindratsnee!› etaat
Fayat taarre.»
12 Ti eshwotso! ititse beyat beyiru Ik'atse wokit gondonat amaneraw nibo b́ deshawok'o it atso korde'ere.
13 Eshe, ititse morron dasheyar b́ nibo k'aztsi b́ woshrawok'o «Hambetsa» et s'eegets aawo b́ befetsosh aaw aawon it atsatsewo izewere.
14 Shin shin no detstso no imnetiyo b́s'uwi aawo b́borfetsosh kup'de deshnodek'etka wotiyal Krstosnton bano kayitwotsi wotitwone.
15 Manwere «Hambets b́ k'ááro it shishor
Weri gondi dúrmanor it k'altsinaaro it nibo k'aztsi woshk'ayere»
et keewetsok'one.
16 Wotowa bako b́ k'ááro boshishyakon gondat k'aztsmanots konotsne boteshi? Boon Muse jishdek't Gbs'itse dek' b́keshtswotsiwoshná?
17 Ik'o nibo hab nati s'eeno k'úúnit teshtswots konotsne? Morro finat boere boduuno worwotse dihit oortswotsiwoshna?
18 Eshe bísh aleratse eteets manotsi b́ wotiyalabako «T kashdek'i beyok kindratste» et boats b́ taartswots konotsne bo teshi?
19 Eshe kindo bomaaw amano bok'aztsatse tuutson b́ woto bek'rone.