☰ 2 Timoti 4
4
1 Aimo Yeisu Keliso ginayewa-vagilena ke yana ebaveimeya ginasena, ada yawayawadiyavo ke alialikadiyavo gina vevonayavugidi.† Taidei faina gavonavonavagadoneni Banae ke Yaubada matadiya taidei anafaiweya. 2 Yaubada yana vona una lulumamalena. Kai wagainiya tova-nai iwakana o kai keke, oye alauboda bademowa kikidewadewa ke afaiweya una lumamala. Wa ya vewala dewadewa ke wa ya atuvefaila lakaina kaliva yadi dewa koyona faidiya una kivetuvetunudi, una vonavona asevatudi, ada badi nuwanuwadi koyona ina kiveyabi-vagaina ani una vonavona vagadonedi toyogina ke ina segena.† 3 Tova moyaina una vewavewaledi anafaiweya, faina aimo tova gielaelai wagaine kaliva keke nuwanuwadi vewala velemoena ina nogala,† aku aiyada badi yadi luvadiga faina tovewala fwayafwayadiyavo ina leleledi e ada gavavewala yadi nuwanuwa koyona analauboda, tainei ina venogalena. 4 Ada Yaubada yana nuwanuwa velemoena ananogala ina dibusoyogena, e aku kaliva yadi nainaiya tainei vona kavokavovo ani wagaidiya ina awaegedi. 5 Aku oyeni ani tova moyaina tauni ya dewa una itaveyabidi velemoena. Ada vita moyaina wagaidiya una atuvefaila, Yeisu Keliso anavaleya iwakana una lulumamalena ke kaliva ina awaegedi Banae wagaine, ada gavagugai Yaubada giveleni, analauboda una gugaiyedi.
Paulo tauna analutovona faina giifufu.
6 Taidei anafaiweya gavonavona wagainiya faina galutovonina vaita yaku tova bademowa givelilivana-mowa ke babi taidei gana miyasegena. Anafaiweya vebolavoi anawaini iiwana Yaubada yana vebolavoi wagaine,† kadu anafaiweya Iya bademowa iiwaiwaku.† 7 Iya Keliso faine bademowa gavediwe ke gaviya iwakana galugaviyayena. Tomadu yana vemadu giluyabuna anafaiweya, Iya bademowa gavediwe ke yaku vemadu galuyabuna. Keliso anavetumagana-nai bademowa gaitaveyabina. 8 E ada yegayegana anakedukedu kaikaiwabuna bademowa ise-vagaina faikuya.† Kauveya Banae Tovevonayavuga tunutunugina ani aimo yadayada-nai wagaine akukedukedu-nai gina veleku. Ada keke Iya akukaibe gina veleku, aku kaduwe gavega moyaidi Banae inuwakabubuyena ke yana yegemona iveitabodabodena ani badi nodi.
9 Timoti, nuwanuwaku una vediwe ke una maduelai wagaikuya. 10 Faina Kelesani ginau Galetiya, ada Taito† ginau Dalimatiya. Ada Dimasi† babi taidei ananuwanuwa ani nuwana givaina, e ada giota-yabuyabuku ke ginau Tesalonaika. 11 Aku Luke gagana nodi amiyamiya. Malika una vagaule nodi wanaelai, faina banae akutoleme lakaina yaku gugai wagaine.† 12 Tikiko† bademowa gaimili ginau Efeso. 13 Tova-nai unaelai aga akunuya badobadona gase-vagaina Kalipo yana manuweya Tolowasi-deya† ani una vaina, ada kaduwe nuwanuwaku lakaina buki uwalugedi, aku velemoena buki-dina sifi kwafilidi wagaine ibubudi ani una aliyedi.
14 Aku Alekisanida† banae kainumu aditoibubuna ani vita moyaina giveleku. Kauveya aimo gina lufata yana gugai adilauboda anafaiweya. 15 Ada o kaduwe gilubodani tauni una itaveyabini kaliva-nai wagaine, faina banae yada vewala givenibainena velemoena.
16 Iya akuvevonayavuga nagona wagaine ani keke tamo gaito gida awabababala faikuya. Au matatabudi iota-yabuyabuku. Gaveola Yaubada yadi koyona gina venuwaegau. 17 Badi iota-yabuyabuku aku Kauveya gimididi lilivakuya ada toyogina giveleku,† e ada Iya akufaiweya Yeisu valeyana matatabuna gana awatalatalainena badi keke meIsileli moyaidi wagaidiya ke adifaiweya ina nogalina. Ada Yaubada yana lemeya etoyavuga ganuwagana laiyoni** awadiya-deya. 18 Kauveya gina kibababaleku vita seyana seyana wagaidiya, ada gina aliyeku iwakana yana ebaveimeya gabama wagaine. Banae anayegana kana kikilakaina tova matatabuna keke ginaavai. Ika, anafaiweya.
Paulo yana vetalakafoi.
19 Yaku nuwakabubu Filisila ke Akwila wagaidiya,† ada kaduwe badi imiyamiya Onesifolo yana manuweya ani wagaidiya.† 20 Elasito† gimiya Kolinita wagaine, ada Tolofimasi giveoga faina Milito-deya gamadusegena. 21 Una galuvaluva-mowa ada una maduelai idedeku muliya-yo yagugula anatova gina vevuvu. Yubulo, Pudeni, Laino ke Kalodiya ada kaduwe tubuiyadeyavo tovetumagana matatabudi yadi nuwakabubu wagainiya.
22 Timoti, Kauveya gina kwayabuni. Oyeni ke tovetumagana matatabuna nodi yana nuwadogeya wana miyamiya. Ika, anafaiweya.
Iyayeku Paulo
† 4:1 Gug 10:42, Lom 14:9 † 4:2 Gug 20:20,31 † 4:3 1Tim 4:1 † 4:6 Eba 35:14, Iyeg 29:40-41, 30:9, Naba 4:7, 15:5 † 4:6 Fip 2:17 † 4:8 1Kol 9:25, 1Pi 5:4, Ive 2:10 † 4:10 2Kol 8:23, Gal 2:3, Tai 1:4 † 4:10 Kol 4:14, Fim 24 † 4:11 Gug 15:37-39 † 4:12 Efes 6:21 † 4:13 Gug 20:6 † 4:14 1Tim 1:20 † 4:17 Gug 23:11, 27:23 ** 4:17 Tayuwe tova-nai wagaine Loma anatoveimeya lakaina ani tova moyaina Keliso anatovetumaganayavo givevematavulogidi. Yana tolugaviya gina veimeyedi ke tovetumagana ina lutunetunedi ina nauwedi fafali ivewagana ‘Kolisiyamu’ wagaine, ada wadedeku laiyoni ina luvealikadi. † 4:19 Gug 18:2-3 † 4:19 2Tim 1:16-17 † 4:20 Gug 19:22, Lom 16:23
☰