Kalata yakwa
YAKOBO
UBULONDOLOSI
Ikitabo kyakwa Yakobo kyalembelwe ku muntu wesina lya Yakobo. Uyu Yakobo ni munyina wakwa Yesu, ulya wali intungulusi mulukuta lwa pakutampa kabili ali mukilye kya mu Yerusalemu (Imili 15.13). Umutumwa Polo nao amwitile ukuti, “Ikisinte” kya lukuta muli Galatiya 2.9. Abamasambililo basumina ukuti ikitabo kyakwa Yakobo kyalembelwe Lintu imyaka amakumi yasano tayalakumana panuma Yesu afyalwa. Apo Yakobo ali nintungulusi mulukuta lwamu Yerusalemu, alembele ikitabo ninsi aleikala mulya mwine.
Yakobo alembele ikitabo kyakwe “Ku mikowa ikumi limo na sibili isyasalangana ikyalo kyonse” (1.1). Amasambililo yamuli Yakobo yabomba ku bena Klistu bonse lelo ifi abomfesye amasiwi yakuti Imikowa ikumi limo na sibili kilangilila ukuti Yakobo alelembela abena Klistu aba Yuda. Pantu iki kitabo kyali nokusabankana amabumba yaba kabelenga, pantu kyalandile pa fikomo ifingi. Yakobo atontele pabwampano bwaba pa kitetekelo ne milimo. Ikitetekelo kyakine kikamonekela mu milimo (2.17). Kabili alandile na pakulakindamikapo abanonka 2.1-4 nokutweba ukuti tulengelela muli fintu tulanda 3.1-12.
Fyatantama ngefi
Yakobo aposya bakabelenga bakwe mu 1.1
Ikyakonkapo akoselesya abena Klistu ukulasipikisya amafya mu (1 na 2 na 7)
Elo alanda na pafyo kyalinga ikitetekelo ukumonekela mu milimo mu (2 vs 1 na 26).
Panuma yaifyo alanda na pamaka amasiwi yakwata mu 3.1-12.
Yakobo alondole ifyo amano yakwa Lesa yapusana na mano yapesonde 3.13—4.10.
Ikyakonkapo asoka bakabelenga bakwe pamulandu wakuyumfwa 4.11—5.6.
Yakobo apeisya ikitabo kyakwe mu 5.7-20 mukupeela ifyakulakonka.
1
1 Ninebo Yakobo, umubomfi wakwa Lesa ne Mfumu Yesu Klistu namiposya mwemikowa ikumi limo nasibili isyasalangana ifyalo fyonse.
Muleba aba kitetekelo na mano
2 Mwebabwananina mulekimona ngesyuko amakyusi ya misango misango ngayamisila,
3 pantu mwalisiba ukuti ukwesiwa kwa kitetekelo kyenu kuleta ukusipikisya.
4 Lekeni ukusipikisya kupwisye umulimo wakuko, pakweba ati muleba abakula, kabili abapwililika ukwabula ukubulisya akantu nangu kamo.
5 Umo pali mwebo ngaabulisya amano, alombe kuli Lesa ukuti amupele. Lesa nao uupelesya nensansa kuli onse uwamulomba akamupela.
6 Lelo pakulomba afwile aketekela ukwabula ukutwisika, pantu onse uutwisika aba nge bimbi lya pali bemba ili sunkanisiwa nokupitwa nomwela.
7 Umuntu uutwisika eenekela ukupokelela ikintu ikili kyonse ku Mfumu.
8 Abafye uwabula ukusininkisya fintu ali nokukita, imilangwe yakwe yaluka alukafye.
Ubupina nobukankala
9 Uwabwananyina umupina afwile ukumfwa bwino palifintu Lesa amukindamika.
10 Nomukankala nao afwile ukumfwa bwino pali fintu Lesa amupoka ubukindami, pantu akalukuta ngeluba lya kyani.
11 Pantu akasuba katula akabalikisya, nekikabilila kilenga ikyani ukuma. Amaluba ya kyani yalalukuta nokuyemba kwapwa. Mu musango umo wine efintu nomukankala akonaulwa pansita apamfiwe namakwebo yakwe.
Ukwesiwa no kutunkwa
12 Alisyuka umuntu uusipikisya mu mesyo. Pantu ngakimfya amakyusi akapokelela ikilambu kya mweo kintu Lesa alaya abantu abamutemwa.
13 Ngamwatunkwa, peba nangu umo uufwile ukulanda ati, “Lesa antunka.” Pantu Lesa tekuti atunkwe ku mubifi kabili nao tekuti atunke uuli onse.
14 Lelo umuntu atunkwa lintu ulunkumbwa lwakwe lwamongola no kumukwata.
15 Elo ulunkumbwa ngalwaimita lufyala ulubembu, kabili no lubembu nga lwakula lufyala imfwa.
16 Ala mwilabepwa mwe bwabananina!
17 Ifyabupe fyonse ifisuma kabili ifyapwililika fifuma ku mulu. Fifuma kuli Tata uwabumba ifya mumulu ifipela ulubuuto. Uusyaluka ngekinsingwa kilesyunguluka.
18 Lesa umwine ku kufwaya kwakwe ewatufyele kwi siwi lyakwe ilyakisinka pakuti tube abantansi pa fibumbwa fyakwe fyonse.
Ukumfwa no kukita
19 Isibeni iki mwebabwananina abatemwikwa! Umuntu onse alingile ukuba uwayanguka ukumfwa, lelo uukokola ukulanda nokufulwa.
20 Ukufulwa kwa muntu takuleta ubulungami buntu Lesa akabila.
21 Talukeni ku fyakowela fyonse ne misango ibi yonse mukili nayo. Mulenakila Lesa nokupokelela amasiwi yakwe yantu abyala mu mitima yenu ayaba namaka yakumipususya.
22 Mwilaibepa pakupelelafye mukumfwa amasiwi yakwa Lesa lelo mulekita nafintu yalemyeba.
23 Onse umfwafye amasiwi lelo takita fintu yalanda, aba ngomuntu uwailolesya pamenso mwigilashi.
24 Kabili lintu aimona aya, kabili palya pene ailaba fintu amoneka.
25 Lelo onse uulolekesya mu Mafunde ayapwililika. Amafunde ayalenga umuntu ukuba umuntungwa, kabili atwalilila ukwabula ukuba komfwafye ulaba lelo kakita, akaba uwapalwa muli fyonse mumilimo yakwe yonse.
26 Bonse abalanda ati nibakapepa, lelo tabasunga ululimi lwabo ninsi baibepafye abene nabukapepa bwabo buntu bwabula ubuyo.
27 Bukapepa ubwalengama kabili ubusyakowela kuli Lesa nyubu, Kwafwa abana bansiwa naba mukamfwilwa muli fintu balekabila nokutalusya umuntu mukukowela kwisonde.