Kalata yakibili iyalembele Paulo kubena
TESALONIKA
UBULONDOLOSI
Inkalata yakibili iyaku Tesalonika yalembelwe na Paulo umutumwa (1.1). Alembele iyi kalata mukwangufyanya panuma alemba kalata yakubalilapo ku Tesalonika, mumyaka amakuni yasano naumo panuma yakufyalwa kwakwa Klistu. Paulo ali akili mu Korinto lintu alembele iyi kalata ku lukuta mu Tessalonika, ulukuta luntu asangile lintu ali pabulendo bwabubili ubwakusabankanya Imbila (imilimo yabatumwa 17.1-10). Ibuuku lyamilimo yabatumwa lyalanda ukuti ulukuta lwapangilwe naba Yuda bamo bamo elo naba Giriki abaengi.
Ulukuta lyamutesalonika lwaliposesyeko amano pamulandu wansita yampela elo nokwisa kwakibili ukwakwa Klistu, pantu Paulo alilembele ifingi pali iyi ilandu muli syonse inkalata sibili isyaku Tesalonika, mupepi napakati kakalata yakibili iyaku Tesalonika yaba pansita yampela. Kabili Paulo akonkomesye pakukana ikalafye ukwabula ukubomba. Umuntu onse afwile ukubombela ifyakulya fyakwe 3.6-10.
Imilandu yatantama ngefi
1. Paulo pakulemba iyi kalata atampilepo ukuilondolola umwine elo nabantu bakwe. 1.1-2.
2. Elo atotela Lesa palukuta mu Tesalonika nokubapepela 1.1-12.
3. Mukipande kyabubili, Paulo alanda pansita yampela.
4. Elo alanda pakukana ikala ukwabula ukubomba 3.1-15.
5. Paulo alekelesye mukuposya ulukuta nakabili 3.16-18.
1
1 Ninebo Paulo, Sailasi elo na Timote twamilembela mwelukuta lwamu Tesalonika mwebaba muli Lesa shifwe kabili Nemfumu Yesu Klistu.
2 Ukusenaminwa elo nomutende fibe namwebo ukufuma kuli Tata elo Nemfumu Yesu Klistu.
Ubupingusi bwapakwisa kwakwa Klistu
3 Mwebabwananyina, fwebo tulatotela Lesa lyonsefye pali mwebo, pantu ekilungeme kuli fwebo ukulakita, umusango wakitetekelo kyenu kilekula apakalamba kabili nekitemwiko mwakwatila kila umo naumo kileya kilekulilako.
4 Eikyo fwebo tulaitakisya mukulanda kwesu pali mwebo, munkuta syakwa Lesa. Tutasya pafyo mwakonkanyapo ukusumina elo nokushipikisya lintu mwapita mumakyusi nangula ukupakaswa.
5 Iki kyonse kilangililo kyakweba ati ubupingusi bwakwa Lesa bwamulinganya, pakweba ati mwaba abalinga kubufumu bwakwe buntu mukyulila.
6 Ikyakine Lesa wamulinganya, akakyusya abobonse abamikyusya,
7 akapwisya amakyusi yenu elyo namakyusi yesu yene. Akakita ifi, ilyo Imfumu Yesu ikamonekela ukufuma mumulu nabamalaika bakwe ababulamba.
8 Akesa nolubingu lwamulilo ulwakwisa kanda abo bonse abasyaisiba Lesa kabili nabo bonse abashumfwila Imbila Nsuma ya Mfumu yesu Yesu.
9 Bakakyula umuyayaya, kabili akabafumya namuceni kyakwe elyo namubukata bwabulamba bwakwe,
10 Lintu akaba nabwela pali bulya busiku, abamusilo bakalamulumbanya, elo abamutetekela nabo bakamukindika, kabili namwebo mukaba nabena pantu mwalisumina amasiwi yabukambone bwesu.
11 Eikyo lyonsefye tulamipepela, ukuti mube nemibeele yalinga kubwite buntu Lesa amitako. Pakuti kumaka yakwe engafikilisya ifisuma fyonse fintu mufwaya ukukita nokupwilikisya imilimo yenu yonse intu mubomba mukisumino,
12 pakweba ati isina lya Mfumu Yesu likatamikwe muli mwebo, namwebo mukatamikwe muli ena, ukulingana nokusenaminwa kwakwa Lesa wesu elyo ne Mfumu yesu Yesu Klistu.