36
Gbɛ̃ntee zaaa
Dii zↄ̀bleri Dauda lɛ̀.
1 Gbɛ̃ zaaa durun yã da ma swɛ̃̀n,
à wɛ́ɛ ègↄ̃ Luda wí vĩro.
2 Zaakɛ ègↄ̃ a zĩnda ee gbɛ̃ maaa ũmɛ,
è a durun dↄ̃ gbasa à zanlo.
3 Ɛgɛ kↄ̃n mↄnafikio kú à lɛ́n,
à ↄ̃ndↄ̃ kↄ̃n maakɛnao tò.
4 È yã zaaa laasuu lɛ́ a daɛkiia,
è gí yã pãsĩziro,
è a zĩnda da zɛ́ faasaideea.
5 Dii, n yenzi bíta kà ludambɛ,
ń náanɛ vĩ maamaa, à zↄ̃̀ sↄsↄnɛnↄa.
6 N maakɛna bíta lán kpiiinↄ bà,
n yãzɛdekɛ lɛ́ vĩro lán ísia lↄ̀ bà.
Dii, nɛɛ̀ gbɛ̃nteenↄ kↄ̃n nↄ̀bↄnↄ bↄ píngi.
7 Luda, n yenzi bɛ̀ɛ vĩ fá,
gbɛ̃nteenↄ è utɛ n ↄru.
8 Aↄ̃è n ua pↄ́ble nↄ́sidee ble wà kã,
nɛɛ̀ n swa'i pↄnnade kpáḿma aↄ̃ mi.
9 Zaakɛ ḿbe wɛ̃̀ndibↄkii ũ,
wa kuuna n gupuraan bé à wa wɛ́ɛ kɛ̃̀.
10 Ǹgↄ̃ yenzi ↄdↄa gbɛ̃ kɛ̀ aↄ̃ↄ n dↄ̃ↄnↄnɛ ǹgↄ̃ gaa,
ǹgↄ̃ kpɛɛ ǹgↄ̃ nↄ̀sɛpuradeenↄ mì sii.
11 Ǹton tó ĩadãrinↄ ma dúgu zↄ̃ro,
ǹton tó zaakɛrinↄ ↄ yĩpamaziro.
12 Ǹ gwa, mↄnafikidee pìnↄ lɛ̀ɛ,
aↄ̃ gↄ̃̀ daɛna sↄ̀rↄrↄ, aↄ̃é fↄ̃ wà fɛɛ dↄro.