Luda yã takada kↄ̃n Bokobaru yão MATIU 26

Lɛ́kpakↄ̃sↄ̃na Yesuzi

(Maa 14:1-2, Luk 22:1-2, Yoh 11:45-53)

1 Kɛ̀ Yesu yã beeenↄ ò píngi à yã̀a, ben à bè a ìbanↄnɛ: 2 Á dↄ̃ kɛ̀ Banla zĩbaa gↄ̃̀ gurↄ plaa, weé Gbɛ̃ntee Nɛ́ kpáḿma wà à pá lía.

3 Beee gbɛra sa'orikinↄ kↄ̃n Yuda gbɛ̃nsinↄ kàkↄ̃a sa'oriki ìsi kɛ̀ wè be Kayafa bɛ. 4 Aↄ̃ yã gↄ̃̀gↄ̃ ↄ̃ndↄ̃ↄo lán aↄ̃é Yesu kũ wà à dɛ nà 5 wà bè: Wàton kɛ zĩbaa zĩro, lɛ gbɛ̃nↄ tón zↄka káro yãnzi.

Nↄ́si gũ nna kuna Yesu mìa

(Maa 14:3-9, Yoh 12:1-8)

6-7 Kɛ̀ Yesu kú Bɛtani, Simↄ Kusu bɛ, èe pↄ́ blee gɛɛkɛsɛkɛna, ben nↄgbɛ̃ ke sↄ̃̀zi, à gbaaa nɛ́ngo kɛ̀ nↄ́si gũ nna ↄↄdee kú à guu kũna, ben à kù Yesu mìa. 8 Kɛ̀ à ìbanↄↄ è lɛ, ben aↄ̃ pↄↄ fɛ̀ɛ wà bè: Bↄ́n pↄ́ laalaakɛna kɛ̀ ũu? 9 Lɛ wà nↄ́si pì yà yã kↄ̃n ↄↄ bítao wà kpà takaasideenↄa. 10 Yesu dↄ̃̀ḿma, ben à bèńnɛ: Bↄ́yãnzi ée ĩa daa nↄgbɛ̃ pìazi? À zĩ maaa kɛ̀mɛmɛ. 11 Takaasideenↄ égↄ̃ kúao gurↄ píngi, mapi sↄ̃ mɛ́gↄ̃ kúao gurↄ píngiro. 12 Kɛ̀ à nↄ́si pì kù ma mɛ̀a, à kɛ̀ lɛ lɛ à ma gɛ̀ kɛomɛ. 13 Yãpuraan mɛ́ɛ ooare, guu kɛ̀ wèe ma baaru nna waazi kɛɛn anduna guu píngi, weégↄ̃ yã kɛ̀ nↄgbɛ̃ pì kɛ̀ oo à dↄngu yãnzi.

Yudasi bↄna Yesu kpɛɛ

(Maa 14:10-11, Luk 22:3-6)

14 Beee gbɛra gↄ̃ↄn kuri awɛɛplaaanↄ doke kɛ̀ wè benɛ Yudasi Isikariↄti gàa sa'orikinↄ kiia 15 à bè: Tó ma Yesu kpàawa, bↄ́n á yezi à kpámaa? Ben aↄ̃ kondogi ↄↄ mɛ̀n baaakuri nàro wà kpàa. 16 Zaa gurↄ beeean èe zɛ́ wɛtɛɛ à Yesu kpáḿma.

Banla pↄ́ble kɛkɛna

(Maa 14:12-21, Luk 22:7-14, Yoh 13:21-38)

17 Burɛdi Sɛ́sɛ'ɛ̃zɛ̃sai zĩbaa gurↄ káakudee zĩ Yesu ìbanↄ mↄ̀ wà à là wà bè: Mán ń yezi wà gá kɛkɛnnɛ ǹ Banla pↄ́ blen? 18 À wèńla à bè: À gá wɛ́tɛn gↄ̃gbɛ̃ke kiia à benɛ, Dannɛri bè a gurↄↄ kà kĩi. À bɛn é Banla pↄ́ blen kↄ̃n a ìbanↄ. 19 Yesu ìbanↄↄ kɛ̀ lán à dàńnɛ nà, aↄ̃ Banla pↄ́bleyã kɛ̀kɛ. 20 Kɛ̀ uusiɛ kɛ̀, Yesu gɛɛkɛsɛkɛna teebuzi kↄ̃n a gↄ̃ↄn kuri awɛɛplaaa pìnↄ. 21 Gurↄↄ kɛ̀ aↄ̃ↄe pↄ́ blee à bè: Yãpuraan mɛ́ɛ ooare, a gbɛ̃ mɛ̀n doo é ma kpáḿma. 22 Aↄ̃ nↄ̀sɛ yàka maamaa, ben aↄ̃ↄe à laa doodo: Asa mámbeeroo, Dii? 23 Yesu wèńla à bè: Gbɛ̃ kɛ̀ wée ↄ kaakↄ̃a taa guu lɛdoo bé eé ma kpáḿma. 24 Gbɛ̃ntee Nɛ́ é kpá guuzi lán à kɛ̃na à yã musu nà, mↄde wãiyoo gbɛ̃ kɛ̀ eé Gbɛ̃ntee Nɛ́ kpáḿma pì. Eé kɛ sã̀ↄ adeenɛ tó wèe à i yãro. 25 Ben Yudasi kɛ̀ eé à kpáḿma pì bè: Asa mámbeeroo, Rabi? Yesu bènɛ: Ḿbe ń ò gwe.

Dii pↄ́blee

(Maa 14:22-26, Luk 22:14-20, 1Kↄ 11:23-25)

26 Kɛ̀ aↄ̃ↄe pↄ́ blee, Yesu burɛdi sɛ̀ à aubarika dàn, ben à lìkↄ̃rɛ à kpà a ìbanↄa à bè: À sí à só, ma mɛ̀n yɛ̀. 27 Ben à togoo sɛ̀ à aubarika dàn, à kpàḿma à bè: À mi a píngi. 28 Ma arun yɛ̀, Luda bà kuuna kↄ̃n gbɛ̃ pariinↄ aru ũ, kɛ̀ eé bↄɛma aↄ̃ durunkɛ̃nnɛna yãnzi. 29 Mɛ́ɛ ooare, zaa gbã̀a mɛ́ geepi'i kɛ̀ mi dↄro ai kpata kɛ̀ bↄ̀ ma De kiia gá bↄo gupuraaa, gbasa mà à dufu miao sa. 30 Kɛ̀ aↄ̃ lɛ̀ sì, ben aↄ̃ bↄ̀ɛ wà gàa Kùkpɛ sĩ̀sĩgɛɛzi.

Yesu gĩakɛ à dↄ̃ yã kɛ̀ Pita é kɛ

(Maa 14:27-31, Luk 22:31-34, Yoh 13:36-38)

31 Ben Yesu bèńnɛ: A píngi é fuma gwãavĩa, zaakɛ wà kɛ̃̀ Luda yãn wà bè: Mɛ́ sãdãri lɛ́, sãanↄ é fãakↄ̃a. 32 Mↄde ma fɛɛna gbɛra mɛ́ dↄare aɛ gana Galili. 33 Ben Pita bènɛ: Baa tó aↄ̃ fùmma ń píngi, mɛ́ fumma zikiro. 34 Ben Yesu bènɛ: Yãpuraan mɛ́ɛ oonnɛ, gwãavĩa ai koo gↄ̃ gá lɛ́ zu, nɛ́ lɛ́ sɛ́mazi gɛ̃̀n aagↄ̃. 35 Pita bènɛ: Baa tó mɛ́ gà mà ganyo, mɛ́ lɛ́ sɛ́nzi zikiro. Ben à ìbanↄↄ ò lɛ se ń píngi.

Yesu aduakɛna zaa Gɛtɛsɛmani

(Maa 14:32-42, Luk 22:39-46)

36 Ben Yesu kↄ̃n a ìbanↄ kà guu kɛ̀ wè be Gɛtɛsɛmani, ben à bèńnɛ: À vɛ̃ɛ kɛ̀ ai mà gá adua kɛ kãaa. 37 À Pita kↄ̃n Zebedi nɛ́ gↄ̃ↄn plaaanↄ sɛ̀ à gàańyo. À pↄↄ sia kũ̀ à nↄ̀sɛyↄgↄ sì. 38 Ben à bèńnɛ: Ma pↄↄ sia kũ̀ maamaa ai gaa lɛ́zĩ. À zɛ kɛ̀ à itɛ̃ kɛmao. 39 Kɛ̀ à gàa aɛ féte, ben à kùɛ tↄↄtɛ à adua kɛ̀ à bè: Baa, tó eé sí kɛ, ǹ tó togo'i kɛ̀ gɛ̃tɛmala. Mↄde èe kɛ lán má yezi nànlo, séde lán ń yezi nà. 40 Ben a lìara à sù à a ìbanↄ lè, aↄ̃ↄe ii oo. Ben à bè Pitanɛ: Lɛn yↄ́? Ée fↄ̃ a itɛ̃ kɛ̀mao baa awa doroo? 41 À itɛ̃ kɛ àgↄ̃ adua kɛɛ, lɛ àton fu yↄ̃agwanaaro yãnzi. Ninii yezi, mↄde mɛ̀ busɛ. 42 À kɛ̃̀ḿma à gɛ̃̀n plaade, à adua kɛ̀ à bè: Baa, tó togoo kɛ̀ é gɛ̃tɛmala a í mi sairo, ǹ tó n pↄyezi kɛ. 43 Kɛ̀ à lìara à sù à ń lé, aↄ̃ↄe ii oo dↄ, zaakɛ aↄ̃ↄe imioo dɛdɛɛ. 44 Ben à ń tón dↄ, à gàa à wɛ́ɛ kɛ̀ à gɛ̃̀n aagↄ̃de, à yã dↄ̃nkↄ̃ pì ò dↄ. 45 Ben à lìara à sù a ìbanↄ kiia à bèńnɛ: Ée ii oo, ée kámma boo ai tian yↄ́? À gwa! Gurↄↄ kà kĩi. Wà Gbɛ̃ntee Nɛ́ kpà durunkɛrinↄa. 46 À fɛɛ wà tá. Gbɛ̃ kɛ̀ ma nańnɛ ń ↄzĩ e mↄↄ.

Yesu kũna

(Maa 14:43-50, Luk 22:47-53, Yoh 18:3-12)

47 Kɛ̀ à kpɛ́ èe yã pì oo, ben Yudasi, à ìba gↄ̃ↄn kuri awɛɛplaaanↄ doke mↄ̀ kↄ̃n pariio, aↄ̃ↄ fɛ̃ɛdaanↄ kũna kↄ̃n gònↄ, aↄ̃ bↄ̀ sa'orikinↄ kↄ̃n Yuda gbɛ̃nsinↄ kiia. 48 Bↄnkpɛɛdee pì sↄ̃ sèeda òńnɛ à bè: Gbɛ̃ kɛ̀ mɛ́ lɛ́ pɛ́a, àmbe gwe. À à kũ. 49 Ben à mì pɛ̀ Yesua gↄ̃ↄ à bè: Fↄↄ, Rabi! Ben à lɛ́ pɛ̀a. 50 Yesu bènɛ: Ma gbɛ̃, ǹ n kɛna kɛ! Ben wà mↄ̀ wà ↄ pɛ̀ɛ Yesua wà à kũ̀. 51 Ben Yesu gbɛ̃nↄ doke a fɛ̃ɛdaa wòto, à sa'oriki ìsi zĩ̀ri lɛ̀o à à swã gò. 52 Ben Yesu bènɛ: Ǹ n fɛ̃ɛdaa sↄtↄ a kpɛ́ɛn. Zaakɛ gbɛ̃ kɛ̀ zɛ̀ kↄ̃n fɛ̃ɛdaao, fɛ̃ɛdaa bé eé à dɛ. 53 Tó má yezi ma De malaika zĩ̀kpɛɛnↄ gbarɛmɛ gↄ̃ↄ dɛ gãli kuri awɛɛplaaanↄla, ń dↄ̃ mɛ́ fua mà a wɛ́ɛ kɛan yↄ́? 54 Tó má kɛ̀ lɛ sↄ̃, dian yã kɛ̀ wà kɛ̃̀ Luda yãn wà bè eé kɛ lɛɛ é kɛɛ? 55 Ben Yesu bè pariinɛ: Kpãi wɛ́ɛdewɛn ma ũ kɛ̀ a mↄ à ma kũ kↄ̃n fɛ̃ɛdaanↄ kↄ̃n gònↄoↄ́? Mɛɛ̀gↄ̃ vɛ̃ɛɛ Luda ua lán guu e dↄↄ nà mɛɛ̀gↄ̃ yã daaare, ée ma kũro. 56 Mↄde yã pì kɛ̀ píngi, lɛ yã kɛ̀ annabinↄↄ kɛ̃̀ Luda yãn kɛ yãnzi. Ben à ìbanↄ bàa lɛ̀ ń píngi aↄ̃ à tòn.

Yuda gbãadeenↄ yãkpaɛkɛna kↄ̃n Yesuo

(Maa 14:53-65, Luk 22:54-55, 63-71, Yoh 18:13-14, 19-24)

57 Gbɛ̃ kɛ̀ aↄ̃ Yesu kũ̀nↄ gàao sa'oriki ìsi Kayafa bɛ. Ludayãdannɛrinↄ kↄ̃n gbɛ̃nsinↄ kakↄ̃ana gwe. 58 Pita tɛ́ à kpɛɛ kãaa ai sa'oriki ìsi pì bɛ. À gɛ̃̀ ua guu, à vɛ̃̀ɛ kↄ̃n dogarinↄ lɛ à yã pì mìdɛna e. 59 Sa'orikinↄ kↄ̃n Yuda yãkpaɛkɛrinↄ ń píngi e sèeda wɛtɛɛ Yesuzi wà à dɛ. 60 Baa kɛ̀ gbɛ̃nↄ mↄ̀ wà ɛgɛyã dìdia pari, èe kɛro. Zãazãa gↄ̃ↄn plaa kenↄ mↄ̀ 61 aↄ̃ bè: Gbɛ̃ pì bè é fↄ̃ à Luda kpɛ́ wí à ɛara à bo gurↄ aagↄ̃ↄ dagura sɛ́! 62 Ben sa'oriki ìsi fɛ̀ɛ à zɛ̀ à bè Yesunɛ: Ń yãke vĩ ǹ weńlaroo? Yã kɛ̀ wèe didiimmaa kɛ̀ dɛ diaa? 63 Yesu yĩtɛ kpɛ̃, ben sa'oriki ìsi pì bènɛ: Ma nannɛ Luda Wɛ̃̀ndidezi, ǹ owe tó Luda Nɛ́ Mɛsayan n ũ. 64 Yesu wèàla à bè: Lɛn ń ò lɛ. Mapi sↄ̃, mɛ́ɛ ooare, zaa gbã̀a é Gbɛ̃ntee Nɛ́ e vɛ̃ɛna Gbãapingide ↄplaazi, bensↄ̃ é à suna e ludambɛ luguun. 65 Ben sa'oriki ìsi pì a utanↄ gà à kɛ̃̀ à bè: A dↄkɛ̀ Ludao! À kɛ̀ dia wée sèedade pãnde kenↄ wɛtɛɛ dↄee? Á mà lán à dↄkɛ̀ Ludao nà. 66 Yã kpareen a zɛo tiaa? Ben aↄ̃ wèàla wà bè: À taari kà wà à dɛ. 67 Ben wà lóu sù à uua, wà à lɛ̀lɛ ↄkũo. Gbɛ̃kenↄ à swãn kɛ̀kɛ 68 aↄ̃ bè: Mɛsaya, ǹ annabikɛyã o ǹ gbɛ̃ kɛ̀ n lɛɛ owe.

Pita lɛ́sɛna Yesuzi

(Maa 14:66-72, Luk 22:56-62, Yoh 18:15-18, 25-27)

69 Pita vɛ̃ɛna ua, ben zↄ̀nↄkparɛ ke mↄ̀ à bènɛ: Mpi sↄ̃ nɛɛ̀gↄ̃ kú lɛdo kↄ̃n Galili gbɛ̃ Yesu pìomɛ. 70 Ben à lɛ́ sɛ̀ ń píngi wáa à bè: Mɛ́ɛ yã kɛ̀ nɛ́ɛ oo dↄ̀rↄ dↄ̃ro. 71 Ben à fɛ̀ɛ à gɛ̃̀ gãnun. Nↄgbɛ̃ pãnde à è, ben à bè gbɛ̃ kɛ̀ aↄ̃ↄ kú gweenↄnɛ: Gbɛ̃ kɛ̀kii lɛdo kↄ̃n Yesu Nazarɛtiomɛ. 72 Pita ɛ̀ara à lɛ́ sɛ̀ à la dà à bè: Má gbɛ̃ pì dↄ̃ro. 73 Kɛ̀ à kɛ̀ saa féte, gbɛ̃ kɛ̀ aↄ̃ↄ zɛna gweenↄ sↄ̃̀ Pitazi aↄ̃ bè: Yãpuramɛ, aↄ̃ gbɛ̃ doon n ũ, zaakɛ wá n dↄ̃ n yã'onaamɛ. 74 Ben à fɛ̀ɛ à a zĩnda kà à la dà à bè: Má gbɛ̃ pì dↄ̃ro. Zaa gwe gↄ̃ↄn koo lɛ́ zù. 75 Ben yã kɛ̀ Yesu ò dↄ̀ Pitan kɛ̀ à bè, ai koo gↄ̃ gá lɛ́ zu, eé lɛ́ sɛ́azi gɛ̃̀n aagↄ̃. Ben Pita bↄ̀ bàazi à pↄsia ↄ́ↄ dↄ̀.