1 Sulemanu a bɛ bona zĩi kɛ̀ píngi wɛ̃̀ kuri awɛɛ'aagↄ̃mɛ. 2 À kpɛ́ kɛ̀ wè be Lɛbanↄ líkpɛ bò, à gbã̀a kà gã̀sãsuu basↄↄro, à yàasa kà gã̀sãsuu baplaa akuri, à lezĩ sↄ̃ baaakuri. À sida línↄ pɛ̀ɛpɛɛ dↄ̀rↄ siigↄ̃, ben à sida lí kɛ̀ wà ànↄ kpàkpańla 3 mɛ̀n baplaa asↄↄro, dↄ̀rↄ kↄ̃n dↄ̀rↄo gɛ̃rogɛ̃ro lɛo aagↄ̃, ben à sida línↄ kpàkpa lí kɛ̀ wà kpà pìnↄla. 4 À à windonↄ bↄ̀bↄ dↄ̀rↄ aagↄ̃gↄ̃ didikↄ̃ana aɛo dↄdↄkↄ̃a. 5 Kpɛ́ pì lɛ́nↄ lezĩ kↄ̃n à yàasao píngi sɛ̃nkpɛkpɛmɛ. À lɛ́nↄↄ mɛ̀n aagↄ̃gↄ̃ kãa kpa kↄ̃n kɛ̀ kpaao aɛo dↄdↄkↄ̃a. 6 À wesagbanↄ pɛ̀ɛpɛɛ kpɛ́ pì kpɛɛlɛ. Kpɛɛlɛ pì gbã̀a kà gã̀sãsuu baplaa akuri, à yàasa sↄ̃ baaakuri. À gãnu bò wesagba pìnↄ aɛ, ben à wesagbanↄ pɛ̀ɛpɛɛ à gbàadaaa dↄ̀ gãnu pì lɛ́a.

7 À a kíblekita dìɛ gãnu pìn. Gwen è yã gↄ̃gↄ̃n, ben wè be Yãkpaɛkɛkpɛ. À sida lí lɛ̀ɛtɛgɛɛnↄ nàna à gũ̀a zaa tↄↄtɛ ai à sàtaa. 8 À kpɛ́ kɛ̀ è in kú aɛ. À bↄ̀kↄ̃ba kↄ̃n gãnu pìo. Lɛn kpɛ́ kɛ̀ à dↄ̀ Fili'auna nɛ́nↄgbɛ̃ kɛ̀ à sɛ̀ nↄↄ ũunɛ dɛ lɛ dↄ. 9 Kpɛ́ pìnↄ bona, gbɛ̀ maaanↄn wà ɛ̃ɛ dàɛo ai à gàa pɛ́ à sàtaa. Wà gbɛ̀ pìnↄ yↄ̃̀yↄ̃ gbasa wà zↄ̃̀zↄ̃kↄ̃rɛ kↄ̃n sagasigio kpa plaplaa píngi. Lɛmɛ ua guu kpaa dɛ lɛ kↄ̃n bàazi kpaao. 10 Wà kpɛ́ pìnↄ ɛ̃ɛ dàɛ kↄ̃n gbɛ̀ gbɛ̃̀ntɛ̃ maaanↄ, à kenↄ gbã̀a kà gã̀sãsuu kuri, à kenↄ sↄ̃ sↄraagↄ̃, 11 gbasa wà bò kↄ̃n gbɛ̀ maaa kɛ̀ wà yↄ̃̀yↄ̃ wà ànↄ kↄ̃n sida lío. 12 À bĩi bò à lìga ua bíta pìzi, à gbɛ̀ kɛ̀ wà ànↄ vĩ didikↄ̃ana dↄ̀rↄ aagↄ̃, ben sida lí kɛ̀ wà ànↄ kpákpa à musu, lán Dii kpɛ́ kↄ̃n à gbàadaaao ua bĩi dɛ nà.

13 Kí Sulemanu gbɛ̃nↄ zĩ̀ Huramu sísi zaa Taya, ben wà sùo. 14 Huramu pì da nɛ́ Nafatali boriimɛ, bensↄ̃ gyaanↄↄmɛ. À de nɛ́ Taya gbɛ̃mɛ, bensↄ̃ mↄ̀gotɛ̃ ↄzĩkɛrimɛ. Huramu pì wɛ́ɛzɛ̃ɛ vĩ kↄ̃n dↄ̃nao mↄ̀gotɛ̃ zĩ píngi guu. Kɛ̀ à mↄ̀ kí Sulemanu kiia, ben à zĩi kɛ̀ à dànɛ kɛ̀ píngi. 15 À wesagba pì mɛ̀n plaa kↄ̃n mↄ̀gotɛ̃o. À píngi lezĩ kà gã̀sãsuu baro plaasai, à lɛ́ yàasa sↄ̃ kuri awɛɛplaa. 16 À à mìfura pì kↄ̃n mↄ̀gotɛ̃o mɛ̀n plaa à dì wesagba pìnↄ musu. Mìfura pìnↄ lezĩ kà gã̀sãsuu sↄsↄↄro. 17 À mↄ̀kyakoonↄ pì, ben à fĩ̀fĩ à mì pìnↄa lán kã̀mbɛɛ bà, aↄ̃ↄ logologona mɛ̀n swɛɛplaa. 18 À pↄ́nↄ pì lán biisio bɛɛnↄ bà à dↄ̀dↄ wesagba mì pìnↄa à lìgazi dↄ̀rↄ plaa, mↄ̀kyakoo pìnↄ gĩzĩ kↄ̃n à musuo. À mì pìnↄↄ sɛ̃nkpɛ píngi. 19 À Dii kpɛ́ gbàadaaa wesagba mì pìnↄ pì kↄ̃n dↄ̃nao lán ítɛbaagunna vú bà. Ítɛbaagunna vú pìnↄ lezĩ kà gã̀sãsuu siisiigↄ̃. 20 Biisio bɛɛ pìnↄↄ dↄdↄ wesagba mì pìnↄ kũ̀dↄkii musu mɛ̀n wàa doodo ligana mↄ̀kyakoo pìnↄzi dↄ̀rↄdↄrↄ. 21 Ben à wesagba pìnↄ pɛ̀ɛpɛɛ kɛ̀ aↄ̃ↄ Dii kpɛ́ gbàadaa kũna. À tↄ́ kpà ↄplaa kpa pↄ́nɛ Eé Káɛ, ↄzɛɛ kpa pↄ́ sↄ̃ Gbãaa Kúa. 22 Wesagba pìnↄ mìnↄ bↄ̀ lán ítɛbaagunna vú bà. Lɛn à wesagba pìnↄ pì lɛ píngi.

23 À mↄ̀ kàsa íkakii ũ bòotoko. À lɛ́ kɛ̀ kpa ai à lɛ́ kãa kpaa kà gã̀sãsuu kuri, à lezĩ kà gã̀sãsuu sↄↄro, à lɛ́ yàasa sↄ̃ baaakuri. 24 À ↄzĩi kɛ̀ íkakii pìa lán tùunↄ bà, à lìga à lɛ́zi gĩzĩ dↄ̀rↄ plaa, gã̀sãsuu do píngi tùu mɛ̀n kuri. À íkakii pì kàsa lɛdo kↄ̃n tùu wɛ̃zãdee pìnↄ. 25 Íkakii pì di zùsware mɛ̀n kuri awɛɛplaaanↄ musu. Zù mɛ̀n aagↄ̃ↄnↄ mì dↄ gu'igbãroo kpa, mɛ̀n aagↄ̃ↄnↄ ↄfãntɛ̃gɛ̃kpɛn kpa, mɛ̀n aagↄ̃ↄnↄ sↄↄmɛtɛ kpa, mɛ̀n aagↄ̃ↄnↄ sↄ̃ ↄfãntɛ̃bↄɛ kpa. Íkakii pì di ń musu, bensↄ̃ aↄ̃ pↄ̀rↄnↄↄ dↄdↄ gura. 26 Íkakii pì gègete kà ↄla yàasa ũ. À swã dɛ lán oro swã bà, lán ítɛbaagunna swã bà. Gãnↄↄ lɛ́ wàa do ín è sí.

27 À tadibↄnↄ pì kↄ̃n mↄ̀gotɛ̃o mɛ̀n kuri. Aↄ̃ píngi gbã̀a kà gã̀sãsuu siigↄ̃, à yàasa dↄ siigↄ̃, à lezĩ sↄ̃ aagↄ̃. 28 Kɛ̀ wà tadibↄ pìnↄ pì, wà mↄ̀ lɛ̀ɛtɛgɛɛnↄ kpà à gbánↄ dagura. 29 Ben wà músu wɛ̃zãnↄ kɛ̀ mↄ̀ lɛ̀ɛtɛgɛɛ pìnↄa píngi kↄ̃n zùsware wɛ̃zãnↄ kↄ̃n kɛrubu wɛ̃zãnↄo. Wà lávutãna wɛ̃zã kɛ̀ músu pìnↄ kↄ̃n zùswaree pìnↄ musu kↄ̃n à gĩzĩo. 30 Tadibↄ pìnↄ mↄ̀gotɛ̃ górogba kↄ̃n gòo vĩ mɛ̀n siisiigↄ̃. Aↄ̃ gbá vĩ mɛ̀n siisiigↄ̃ dↄ. Gbá pìnↄ musun wè taa din. Wà gbá pìnↄ kàsa, wà lávutãna wɛ̃zã kɛ̀ à kpa siigↄ̃ↄa. 31 Tadibↄ pìnↄ lɛ́ wɛ̃na bòotoko, à lɛ́ kpaa bↄna gã̀sãsuu do, bensↄ̃ à zòoto kà ↄtã do. Wà wɛ̃zã kɛ̀ à lɛ́ kɛ̀ bↄ̀ musua dↄ. Tadibↄ pìnↄↄ mↄ̀ lɛ̀ɛtɛgɛ goodadeenↄ vĩ, aↄ̃ↄ dɛ bòotokoro. 32 Górogba pìnↄↄ kú mↄ̀ lɛ̀ɛtɛgɛɛ pìnↄ gĩzĩ. À gònↄ pɛ́pɛna tadibↄ pìnↄ gbánↄa. Górogba pìnↄ lezĩ kà gã̀sãsuu do kↄ̃n a kusuo. 33 Wà górogba pìnↄ pì lán sↄ̃goro pↄ́ bàmɛ. Wà à gònↄ kↄ̃n à górogbanↄ kↄ̃n à mↄ̀teeenↄ kↄ̃n à oroonↄ kàsa kↄ̃n mↄ̀gotɛ̃o píngi. 34 Tadibↄ pìnↄ kũkii vĩ mɛ̀n siisiigↄ̃ a goodanↄa. 35 Tadibↄ pìnↄ musu dɛ bòotoko, à lezĩ kà ↄtã do. À gbánↄ kↄ̃n à mↄ̀ lɛ̀ɛtɛgɛɛnↄↄ na tadibↄ pìnↄ musu. 36 À kɛrubu wɛ̃zã kɛ̀ à gbánↄ kↄ̃n à mↄ̀ lɛ̀ɛtɛgɛɛnↄa kↄ̃n músu wɛ̃zãnↄ kↄ̃n damina línↄ wɛ̃zãnↄo, guu kɛ̀ à è píngi. À lávutãna wɛ̃zã kɛ̀ à lìgazi dↄ. 37 Lɛn à tadibↄ pìnↄ pì lɛ. À kàsa pↄ́ dↄ̃nkↄ̃ guumɛ, aↄ̃ bítakɛ kↄ̃n ń bↄnao sɛ̃nkpɛmɛ.

38 Ben à dàga pì kↄ̃n mↄ̀gotɛ̃o mɛ̀n kuri. À píngi è í sí à kà gãnↄↄ lɛ́ siisiigↄ̃. Dàga pìnↄ yàasa kà gã̀sãsuu siisiigↄ̃. Kɛ̀ à dàga pìnↄ dìdi tadibↄ mɛ̀n kuri pìnↄa, 39 ben à kàɛ Dii kpɛ́ aɛ, mɛ̀n sↄↄroo ↄplazi, mɛ̀n sↄↄroo ↄzɛzi. À íkakii pì dìɛ ↄzɛzi Dii kpɛ́ gooda kɛ̀ kú ↄfãntɛ̃bↄɛ sↄↄmɛtɛ kpaa saɛ. 40 Ben Huramu oro túbukabↄnↄ kↄ̃n a sɛ́ɛbↄnↄ kↄ̃n ta arusibↄnↄ pì dↄ. Lɛn à Dii ua zĩi kɛ̀ kí Sulemanu dànɛ kɛ̀ lɛ, à à laata kpà píngi. 41 Zĩi kɛ̀ à kɛ̀ pìnↄn yɛ̀: Wesagba mɛ̀n plaa, à mì kɛ̀ bↄ̀ lán loo bà kɛ̀ kú wesagba pìnↄ musu mɛ̀n plaa, mↄ̀kyakoo kɛ̀ à zã blèo à mì pìnↄa mɛ̀n plaa, 42 biisio bɛɛ kɛ̀ à dↄ̀dↄ mↄ̀kyakoo pìnↄa musu mɛ̀n wàa plaa. À kɛ̀ ai dↄ̀rↄ plaa zãblebↄ ũ wesagba mì pìnↄa. 43 Tadibↄ pìnↄ mɛ̀n kuri kↄ̃n à dàganↄ mɛ̀n kuri. 44 Íkakii mɛ̀n do kↄ̃n zùswaree kɛ̀ kú à gĩzĩnↄ mɛ̀n kuri awɛɛplaa. 45 Túbukabↄ pìnↄ kↄ̃n a sɛ́ɛbↄnↄ kↄ̃n ta arusibↄnↄ. Pↄ́ kɛ̀ Huramu pì kí Sulemanunɛ Dii ua pↄ́ ũunↄ píngi, à ń pí kↄ̃n mↄ̀gotɛ̃ lↄ́lↄnaomɛ. 46 Kína tò wà pↄ́ pìnↄ kàsa kↄ̃n Yoda gũ̀o zaa Suko kↄ̃n Zarɛtão dagura. 47 Sulemanu e tó wà pↄ́ kɛ̀ wà pì kↄ̃n mↄ̀gotɛ̃o pìnↄ yↄ̃ kilooa à à tìisi dↄ̃̀ro, kɛ̀ à kɛ̀ pari yãnzi.

48 Sulemanu pↄ́ kɛ̀ kú Dii kpɛ́ guunↄ pì dↄ, tuaetitikpatakii kɛ̀ wà kɛ̀ kↄ̃n vurao kↄ̃n vura teebu kɛ̀ wè Dii burɛdi káɛao 49 kↄ̃n dabu kɛ̀ wà kàɛ gãnu guu kpɛ́nɛ aɛ ↄplazi kↄ̃n ↄzɛzio mɛ̀n sↄsↄↄro. Wà pì kↄ̃n vurao atɛ̃ɛ kↄ̃n à fitianↄ kↄ̃n à kpàkonↄ píngi, wà lávu wɛ̃zã kɛ̀ḿma. 50 À vura ímibↄnↄ pì dↄ kↄ̃n fitiadɛbↄnↄ kↄ̃n taanↄ kↄ̃n gↄ̃mbↄnↄ kↄ̃n tɛ́sibↄnↄ kↄ̃n kpɛ́nɛ kɛ̀ wè be Ludakuki gbà asigbenↄ kↄ̃n gãnu pↄ́nↄ. 51 Kɛ̀ kí Sulemanu Dii ua zĩi pì kɛ̀ à yã̀a píngi, ben à mↄ̀ kↄ̃n vurao kↄ̃n kondogio kↄ̃n pↄ́ kɛ̀ a de Dauda dìɛ Dii pↄ́ ũunↄ, ben à kà Dii ua auzikikaɛkiin.