Luda yã takada kↄ̃n Bokobaru yão 1 KINANƆ 16

1 Dii yã sù Anani nɛ́ Yehua, ben à yã ò Baasanɛ à bè: 2 Ma n bↄ bùsutin, ma n kɛ ma gbɛ̃ Isarailinↄ dↄn'aɛdee ũ, ben n zɛ kↄ̃n Yeroboamu yãkɛnanↄo n ma gbɛ̃ Isarailinↄ dà durun guu, ben aↄ̃ durun pìnↄ ma pↄↄ fɛ̃̀. 3 Mmↄn kↄ̃n n boriinↄ, mɛ́ a dúgu zↄ̃mɛ sa. Mɛ́ kɛ n uanɛ lán má kɛ̀ Nɛbati nɛ́ Yeroboamu uanɛ nà. 4 Gbɛ̃ɛnↄ é n gbɛ̃ kɛ̀ aↄ̃é gaga wɛ́tɛ guunↄ só, bãanↄ é n gbɛ̃ kɛ̀ aↄ̃é gaga sɛ̃̀nnↄ ble. 5 Baasa yã kpaaanↄ, yã kɛ̀ à kɛ̀nↄ kↄ̃n à nɛ́gↄ̃gbɛ̃kɛyãnↄↄ kú Isarailinↄ kínanↄ gĩayãkɛnanↄ takadan. 6 Kɛ̀ Baasa gà, wà à vĩ̀i Tiza, ben à nɛ́ Ela vɛ̃̀ɛ à gbɛ̀n.

7 Dii yã pì ò Baasanɛ kↄ̃n a boriinↄ annabi Yehu, Anani nɛ́ gãzĩ, yã zaaa kɛ̀ à kɛ̀ à Dii pↄↄ fɛ̃̀onɛ lán Yeroboamu boriinↄↄ kɛ̀ nà yãnzi kↄ̃n Yeroboamu borii kɛ̀ à ń kaatɛnↄ yão dↄ.

Isarailinↄ kí Ela

8 Yudanↄ kí Asa kíblena wɛ̃̀ baaasↄↄro awɛɛdodee guun Baasa nɛ́ Ela kɛ̀ Isarailinↄ kína ũ à vɛ̃̀ɛ Tiza wɛ̃̀ plaa. 9 À ìbanↄ do Zimirin à sↄ̃goronↄ kpadoo gbɛ̃nsi ũ, ben à lɛ́ kpàkↄ̃sↄ̃zińyo. Gurↄↄ kɛ̀ í Ela kũ̀ a bɛgwari Aza kpɛ́n zaa Tiza, 10 ben Zimiri gɛ̃̀ à à dɛ̀ Asa kíblena wɛ̃̀ baaasↄↄro awɛɛplaadee guu, ben à vɛ̃̀ɛ à gbɛ̀n. 11 Kɛ̀ à kí blè gↄ̃ↄ, ben à Baasa boriinↄ dɛ̀dɛ ń píngi, èe gↄ̃gbɛ̃ ke tó à danɛnↄ ke à gbɛ̃nnanↄ tɛ́ro. 12 À Baasa borii pìnↄ kàatɛ ń píngimɛ, lán Dii ò annabi Yehu gãzĩ nà. 13 Baasa kↄ̃n a nɛ́ Elao Dii Isarailinↄ Luda pↄↄ fɛ̃̀nɛ durun kɛ̀ aↄ̃ↄ kɛ̀ tãa pãpãanↄ yã musu, ben dↄ aↄ̃ Isarailinↄ dà à kɛnan yãnzi. 14 Ela yã kpaaanↄ kↄ̃n yã kɛ̀ à kɛ̀nↄ píngi kú Isarailinↄ kínanↄ gĩayãkɛnanↄ takadan.

Isarailinↄ kí Zimiri

15 Yudanↄ kí Asa kíblena wɛ̃̀ baaasↄↄro awɛɛplaadee guun Zimiri kí blè Tiza gurↄ swɛɛplaa. Gurↄ beeea Isaraili zĩ̀kpɛɛnↄ bùra kú Filisitini wɛ́tɛ Gibetↄ̃ saɛ. 16 Kɛ̀ zĩ̀kpɛɛ pìnↄↄ mà Zimiri lɛ́ kpàkↄ̃sↄ̃ kↄ̃n gbɛ̃nↄ kínazi à à dɛ̀, ben aↄ̃ ń dↄn'aɛde Ɔmiri kà Isarailinↄ kína ũ ń bùran gwe gↄ̃ↄ. 17 Ben Ɔmiri kↄ̃n Isaraili zĩ̀kpɛɛnↄ fɛ̀ɛ Gibetↄ̃ aↄ̃ gàa wà lìga Tizazi. 18 Kɛ̀ Zimiri è aↄ̃ a wɛ́tɛ sìawa, ben à dìdi à gɛ̃̀ a bɛ kpɛ́didikↄ̃ana musun à tɛ́ sↄ̃̀a, ben à tɛ́ kũ̀, à gà 19 durun kɛ̀ à kɛ̀ yãnzi. À yã kɛ̀ Dii yeziroo kɛ̀ kɛ̀ à zɛ̀ kↄ̃n Yeroboamu yãkɛnao. À durun kɛ̀, ben dↄ à Isarailinↄ dà à kɛnan. 20 Zimiri yã kpaaanↄ kↄ̃n lɛ́ kɛ̀ à kpàkↄ̃sↄ̃ńyo Elazio kú Isarailinↄ kínanↄ gĩayãkɛnanↄ takadan.

Isarailinↄ kí Ɔmiri

21 Isarailinↄ kpàatɛ lɛo plaa. Aↄ̃ kpadoonↄↄ yezi wà Ginati nɛ́ Tibini ká kí ũ, ń kpadoonↄ sↄ̃ Ɔmiri. 22 Kɛ̀ gbɛ̃ kɛ̀ aↄ̃ zɛ̀ kↄ̃n Ɔmirionↄ gbãaa dɛ̀ gbɛ̃ kɛ̀ aↄ̃ zɛ̀ kↄ̃n Ginati nɛ́ Tibinionↄla, ben wà Tibini dɛ̀, Ɔmiri kí blè. 23 Yudanↄ kí Asa kíblena wɛ̃̀ baaakuri awɛɛdodee guun Ɔmiri kɛ̀ Isarailinↄ kína ũ, à kí blè wɛ̃̀ kuri awɛɛplaa. À kɛ̀ Tiza wɛ̃̀ swɛɛdo, 24 ben à Samaria sĩ̀sĩ lù Sɛmaa kↄ̃n kondogio kiloo baaagↄ̃ akuri, ben à wɛ́tɛ kàɛa à tↄ́ kpànɛ Samaria kɛ̀ Sɛma bé à sĩ̀sĩ pì vĩ yã yãnzi. 25 Ɔmiri yã kɛ̀ Dii yeziroo kɛ̀ à durun kɛ̀ dɛ gbɛ̃ kɛ̀ aↄ̃ dↄ̀nɛ aɛnↄ pↄ́la ń píngi. 26 À zɛ̀ kↄ̃n Nɛbati nɛ́ Yeroboamu yãkɛnao píngi. À Dii Isarailinↄ Luda pↄↄ fɛ̃̀nɛ kↄ̃n durun kɛ̀ à kɛ̀ tãa pãpãanↄ yã musuo à Isarailinↄ dà à kɛnan dↄ. 27 Ɔmiri yã kpaaanↄ kↄ̃n yã kɛ̀ à kɛ̀nↄ kↄ̃n à nɛ́gↄ̃gbɛ̃kɛyãnↄↄ kú Isarailinↄ kínanↄ gĩayãkɛnanↄ takadan. 28 Kɛ̀ à gà, wà à vĩ̀i Samaria, ben à nɛ́ Ahabu vɛ̃̀ɛ à gbɛ̀n.

Isarailinↄ kí Ahabu

29 Yudanↄ kí Asa kíblena wɛ̃̀ baplaa plaasaidee guun Ɔmiri nɛ́ Ahabu kɛ̀ Isarailinↄ kína ũ à kí blè Samaria wɛ̃̀ baro awɛɛplaamɛ. 30 À yã kɛ̀ Dii yeziroo kɛ̀ dɛ gbɛ̃ kɛ̀ aↄ̃ dↄ̀nɛ aɛnↄ pↄ́la ń píngi. 31 À zɛna kↄ̃n Nɛbati nɛ́ Yeroboamu durunkɛnao e kɛnɛ yãke ũro, ben à Sidↄ̃deenↄ kí Ɛtabaali nɛ́nↄgbɛ̃ Yɛzɛbɛli sɛ̀ nↄↄ ũ, ben à nà Baali tãagbãgbãnaa, ègↄ̃ kuɛɛnɛ. 32 À kpɛ́ bò Baalinɛ Samaria, ben à à gbãgbãkii pɛ̀ɛ kpɛ́ pì guu. 33 À Asɛra lí pɛ̀ɛn dↄ à ɛ̀ara à Dii Isarailinↄ Luda pↄↄ fɛ̃̀nɛ dɛ Isarailinↄ kína kɛ̀ aↄ̃ dↄ̀nɛ aɛnↄ pↄ́la ń píngi.

34 Ahabu gurↄↄan Bɛtɛli gbɛ̃ Iyɛli Yɛriko kɛ̀kɛ à kàɛ. Kɛ̀ à à bĩi ɛ̃ɛ dàɛ, ben à nɛ́gↄ̃gbɛ̃ káaku Abiramu gà. Kɛ̀ à à zɛ́ gbànↄ pɛ̀ɛ, ben à nɛ́ zãade Segubu gà lán Dii ò Nuni nɛ́ Yↄsua gãzĩ nà.