10
Sutɛ̃nↄ dagulana
1 Dii bè Musanɛ: Ǹ gá Fili'auna kiia, zaakɛ ma à kùgbãa kũ̀ kↄ̃n à ìbanↄ, lɛ mà a dabuyã kɛ̀kiinↄ kɛ ń tɛ́,
2 lɛ ǹ e ǹ o n nɛ́nↄnɛ kↄ̃n n dionↄ lán ma wɛ́ɛ tã̀ Igipitinↄa nà kↄ̃n dabuyã kɛ̀ má kɛ̀ ń tɛ́nↄ, àgↄ̃ dↄ̃ kɛ̀ mámbe Dii ũ.
3 Ben Musa kↄ̃n Arunao gàa wà bè Fili'aunanɛ: Dii Eberunↄ Luda bè nɛ́gↄ̃ kuu mìsiɛnaare sai ai bↄrɛmɛ? Ǹ a gbɛ̃nↄ gbarɛ aↄ̃ gá dↄnzi kɛare.
4 Tó n gi ń gbarɛzi, zia eé sutɛ̃nↄ ká n bùsun.
5 Aↄ̃é da tↄↄtɛla, weé guu ero. Aↄ̃é lɛ́ɛ pↄ́ kɛ̀ gↄ̃̀nnɛ lougbɛ gbɛraanↄa kↄ̃n línↄ píngi.
6 Aↄ̃é pa n kpɛ́nↄ guu kↄ̃n n ìbanↄ pↄ́nↄ kↄ̃n Igipitinↄ pↄ́nↄ píngi. N denↄ kↄ̃n n dezinↄ e à taka e zikiro zaa gurↄↄ kɛ̀ aↄ̃ vɛ̃̀ɛ bùsu kɛ̀n ai mↄna gbã̀a. Ben Musa lìara à bↄ̀ Fili'auna kiia.
7 Fili'auna ìbanↄ bènɛ: Gbɛ̃ pìnↄ égↄ̃ mↄ́nzi kpaawazi lɛ ai bↄrɛmɛ? Ǹ gbɛ̃ pìnↄ gbarɛ aↄ̃ gá dↄnzi kɛ Dii ń Ludanɛ. Ń dↄ̃ kɛ̀ Igipiti kàatɛroo?
8 Ben wà ɛ̀ara wà sù kↄ̃n Musao kↄ̃n Arunao Fili'auna kiia, à bèńnɛ: À gá dↄnzi kɛ Dii a Ludanɛ. A dénↄ bé wé gáa?
9 Musa wèàla à bè: Nɛ́ féte gbɛ̃nsi. Wé gá wa píngimɛ kↄ̃n wa nɛ́gↄ̃gbɛ̃nↄ kↄ̃n wa nɛ́nↄgbɛ̃nↄ kↄ̃n wa sãanↄ kↄ̃n wa blènↄ kↄ̃n wa zùnↄ, zaakɛ Dii zĩbaan wée gaa kɛ.
10 Ben à bèńnɛ: Tó ma a gbarɛ kↄ̃n a nↄgbɛ̃nↄ kↄ̃n a nɛ́nↄ a píngi, ásarumɛ, Dii a bↄ! À làakari kɛ! Ée wɛtɛɛ à fɛ̃maomɛ.
11 Auo! A gↄ̃gbɛ̃nↄ bé wé gá dↄnzi kɛ Diinɛ, zaakɛ lɛn á gbèka lɛ. Ben wà pɛ̀ḿma Fili'auna aɛzĩ.
12 Dii bè Musanɛ: Ǹ n ↄↄ dↄ Igipiti bùsula, sutɛ̃nↄ é ká wà sɛ̃̀ kↄ̃n lá kɛ̀ bↄ̀ɛ lougbɛ gbɛraanↄ ble píngi.
13 Kɛ̀ Musa a gò dↄ̀ Igipitila, Dii bↄ̀ kↄ̃n ĩao ↄfãntɛ̃bↄɛ kpa, èe paa bùsu pìa fãantɛ̃ kↄ̃n gwãavĩo zɛna sai. Kɛ guu dↄ̀, ↄfãntɛ̃bↄɛ ĩa pì sù kↄ̃n sutɛ̃nↄ.
14 Ben sutɛ̃ pìnↄ mↄ̀ wà dà Igipiti bùsula píngi. Aↄ̃ↄ pari dɛ à yã pↄ́nↄla, à taka é kɛ ziki dↄro.
15 Aↄ̃ dà tↄↄtɛla gu píngi, ben tↄↄtɛ sia kũ̀. Aↄ̃ sɛ̃̀ kↄ̃n lánↄ kↄ̃n líbɛɛ kɛ̀ bↄ̀ lougbɛ gbɛraanↄ blè píngi. Sɛ̃̀ kↄ̃n láo kú Igipiti bùsun dↄro.
16 Gwe gↄ̃ↄ Fili'auna Musa kↄ̃n Arunao sìsi à bè: Ma durun kɛ̀ Dii a Ludanɛ kↄ̃n apinↄ.
17 À sùu gɛ̃̀n doo kɛ̀kii kɛmɛ kↄ̃n ma durun-o à agbaa kpámɛ Dii a Ludanɛ à gagana kɛ̀kii kɛ̃ma.
18 Kɛ̀ à bↄ̀ Fili'auna kiia, à agbaa kpà Diinɛ.
19 Ben Dii bↄ̀ kↄ̃n ĩa gbãaao ↄfãntɛ̃gɛ̃kpɛn kpa, à mↄ̀ à sutɛ̃nↄ sɛ̀ɛ à kà Isia Tɛ̃aan. Baa sutɛ̃ mɛ̀n doo e gↄ̃ Igipiti dↄro.
20 Mↄde Dii Fili'auna kù kɛ̀ gbãa, ben à gì Isarailinↄ gbarɛzi.
Gusia dana Igipitila
21 Dii bè Musanɛ: Ǹ ↄ sɛ́ musu, gusiaa kɛ̀ weé fↄ̃ wà ↄ kɛa é da Igipitila.
22 Kɛ̀ Musa a ↄↄ dↄ̀ musu, ben gusia níginigi dà Igipiti gu píngia ai gurↄ aagↄ̃.
23 Wè kↄ̃ ero, gbɛ̃kee e gu a gbɛ̀nlo ai gurↄ aagↄ̃ↄ pìa. Mↄde gupuraa kú guu kɛ̀ Isarailinↄↄ kún píngi.
24 Ben Fili'auna Musa sìsi à bè: À gá dↄnzi kɛ Diinɛ kↄ̃n a nↄgbɛ̃nↄ kↄ̃n a nɛ́nↄ a píngi, mↄde à a sãanↄ kↄ̃n a blènↄ kↄ̃n a zùnↄ tó.
25 Musa bè: Ǹ tó wàgↄ̃ wa sa'opↄnↄ kↄ̃n sa'opↄ kɛ̀ wè ká tɛ́n à tɛ́ kũnↄ kũna, lɛ wà e wà Dii wa Luda gbãgbão.
26 Séto wà gá kↄ̃n wa pↄ́kãdeenↄ, baa mɛ̀n doo é gↄ̃ro, zaakɛ aↄ̃ tɛ́n wé sa'opↄnↄ bↄn wà Dii wa Luda gbãgbão. Lɛ wà kpɛ́ wà ká gwe, wá dↄ̃ pↄ́ kɛ̀ wé sɛ́ wà saa ooa gĩaro.
27 Dii Fili'auna kùgbãa kũ̀, èe we à ń gbarɛro.
28 Fili'auna bè Musanɛ: Ǹ gu ma aɛ! Ǹton tó wa wɛ́ɛ kɛ siigↄ̃ dↄro. Zĩ kɛ̀ wa wɛ́ɛ sìkↄ̃lɛ, n gamɛ.
29 Ben Musa bè: Lán ń ò nà, nɛ́ wɛ́ɛ simalɛ dↄro.