1 Kí Bɛlisaza a bùsu gbãadeenↄ sìsi zĩbaa pↄ́bleea gↄ̃ↄn wàa sↄↄro, ben èe wɛ̃ɛ miińyo. 2 Kɛ̀ à pↄↄ kɛ̀ í pìa nna, à bè wà mↄ́ kↄ̃n vura ímibↄnↄ kↄ̃n kondogi ímibↄ kɛ̀ a dezi Nɛbukanɛza sɛ̀ɛ Luda kpɛ́n Yerusalɛmunↄ lɛ à í mio, àpi kↄ̃n a bùsu gbãadeenↄ kↄ̃n a nↄↄnↄ kↄ̃n a nↄ yìgisainↄ. 3 Ben wà mↄ̀ kↄ̃n togoo pìnↄ, aↄ̃ↄe í miio. 4 Kɛ̀ aↄ̃ↄe wɛ̃ɛ mii, aↄ̃ↄe tãa kɛ̀ wà ń kɛ́ kↄ̃n vurao kↄ̃n kondogio kↄ̃n mↄ̀gotɛ̃o kↄ̃n mↄ̀sio kↄ̃n lío kↄ̃n gbɛ̀o sáabu kpaa. 5 Gwe gↄ̃ↄ gbɛ̃ntee ↄↄ bↄ̀ fitia'izi, èe ↄgbɛ kɛ̃ɛ kíbɛ gũ̀ kɛ̀ lↄ́lↄnaa. Kína ↄↄ pì è, èe pↄ́ kɛ̃ɛ, 6 ben à laasuu tò swɛ̃̀ kɛ̃̀n. À uu yàkↄ̃tɛ à gbãaa bùsa, ben à gbánↄↄ e lugalugaa. 7 À wii gbãaa lɛ̀ à bè, wà mↄ́ kↄ̃n asidↄ̃rinↄ kↄ̃n sↄsↄnɛyãdↄ̃rinↄ kↄ̃n màsokɛrinↄ. Ben à bè Babilↄnu ↄ̃ndↄ̃ri pìnↄnɛ: Gbɛ̃ kɛ̀ ↄgbɛ kɛ̀ki kyó kɛ̀ ben à à bↄ̀kↄ̃tɛmɛ, mɛ́ gumusu tɛ̃a kↄ̃n vura kã̀mbɛɛo danɛ, eé gↄ̃ ma bùsu gbãadeenↄ gbɛ̃ aagↄ̃dee ũ. 8 Kɛ̀ kína ↄ̃ndↄ̃ri pìnↄ gɛ̃̀ ń píngi, ben aↄ̃ gbɛ̃kee e fↄ̃ à ↄgbɛ pì kyó kɛ̀ à à bↄ̀kↄ̃tɛnɛro. 9 Swɛ̃̀ ɛ̀ara à kɛ̃̀ kí Bɛlisazan maamaa, à ɛ̀ara à uu yã̀kↄ̃tɛ, ben à bùsu gbɛ̃nsinↄ gↄ̃̀ bídi guu.

10 Kɛ̀ kí naↄ̃ kína kↄ̃n bùsu gbɛ̃nsinↄ zↄka mà, à gɛ̃̀ńzi pↄ́blekiia à bè: Wà n dↄ̃ kↄ̃n aafiao Zaaki! Ǹton tó n laasuu n nↄ̀sɛ yakaro, ǹton tó n uu gↄ̃ sisinaro. 11 Gbɛ̃kee kú n bùsun kɛ̀, à Luda kɛ̀ kú adona Ninii vĩ. N dezi Nɛbukanɛza gurↄ wà è à làakari vĩ kↄ̃n wɛ́ɛzɛ̃ɛo kↄ̃n ↄ̃ndↄ̃ↄo lán Luda bà. N dezi à dìɛ wɛ́ɛzɛ̃rinↄ kↄ̃n asidↄ̃rinↄ kↄ̃n sↄsↄnɛyãdↄ̃rinↄ kↄ̃n màsokɛrinↄ gbɛ̃nsi ũ. 12 À ↄ̃ndↄ̃ kↄ̃n à dↄ̃nao pãsĩ, è yã píngi ma. È nanaanↄ bↄkↄ̃tɛ è yã zĩ'ũunↄ yáasi tↄ̃kɛ̃ kↄ̃n yãlɛkↄ̃zinanↄ. À tↄ́n Daniɛli. Kína tↄ́ kpànɛ dↄ Bɛtɛsaza. Ǹ à sísi se, eé yã pì bↄkↄ̃tɛnnɛ.

13 Kɛ̀ wà mↄ̀ kↄ̃n Daniɛlio kína pì kiia, ben kína bènɛ: Ḿbe zĩ̀zↄ kɛ̀ wè be Daniɛli kɛ̀ ma dezi bↄ̀o Yudanↄ bùsun ũↄ́? 14 Má mà wà bè ń Luda Ninii vĩ, ń làakari vĩ kↄ̃n wɛ́ɛzɛ̃ɛo kↄ̃n ↄ̃ndↄ̃ wɛ́ɛbↄnao. 15 Wà mↄ̀mɛ kↄ̃n ↄ̃ndↄ̃rinↄ kↄ̃n yã'asidↄ̃rinↄ tia, lɛ aↄ̃ ↄgbɛ kɛ̀ kyó kɛ aↄ̃ à bↄkↄ̃tɛmɛ, mↄde aↄ̃ↄe fↄ̃ro. 16 Má mà wà bè nɛɛ̀ fↄ̃ ǹ yãnↄ bↄkↄ̃tɛ nɛɛ̀ fↄ̃ ǹ yãlɛkↄ̃zinanↄ tↄ̃kɛ̃. Tó n fↄ̃ n ↄgbɛ kɛ̀ kyó kɛ̀ n à bↄ̀kↄ̃tɛmɛ, mɛ́ gumusu tɛ̃a kↄ̃n vura kã̀mbɛɛo dannɛ, nɛ́ gↄ̃ ma bùsu gbãadeenↄ gbɛ̃ aagↄ̃dee ũ. 17 Ben Daniɛli bènɛ: Ǹ n gbaanↄ kũ ǹ asaiapↄ pì kpá gbɛ̃ pãndea. Mↄde baa kↄ̃n beeeo mɛ́ ↄgbɛ pì kyó kɛnnɛ kí, mɛ́ sↄ̃ bↄkↄ̃tɛnnɛ. 18 Kí, Luda Musude bé à kíkɛ kↄ̃n bítakɛɛo kↄ̃n gakuio kↄ̃n bɛ̀ɛo kpà n dezi Nɛbukanɛzaa. 19 Lán à à sɛ̀ lezĩ nà, gbɛ̃ píngi à vĩa vĩ, aↄ̃è mì siɛnɛ, bori píngi ke yã'ona bori píngin yoo. Gbɛ̃ kɛ̀ à yezi à à dɛ, è à dɛmɛ. Gbɛ̃ kɛ̀ à yezi à à bↄ, è à bↄmɛ. Gbɛ̃ kɛ̀ à yezi à gwena kaaranɛ, è à kaara. Gbɛ̃ kɛ̀ à yezi à à busa, è à busamɛ. 20 Mↄde kɛ̀ à a zĩnda sɛ̀ lezĩ à swã gbãa kũ̀ bensↄ̃ à zaza kũ̀, ben Luda à bↄ̀ kpatan à à gakui kↄ̀ ɛ̀. 21 Wà pɛ̀a wà à bↄ̀ gbɛ̃nteenↄ tɛ́, à laasuu gↄ̃̀ lán nↄ̀bↄnↄ pↄ́ bà. À kú kↄ̃n sakenↄ à sɛ̃̀ sò lán zù bà. Kpíi à yàku, ben à dↄ̃̀ sa kɛ̀ Luda Musude bé à iko vĩ gbɛ̃ntee kpatanↄa, è gbɛ̃ kɛ̀ à yezi kpá kpatan. 22 Mpi sↄ̃ Bɛlisaza, à dion n ũ. Baa kɛ̀ ń yã pìnↄ dↄ̃ píngi, nɛ́ɛ n zĩnda busaro. 23 N dↄkɛ̀ Dii Musudeo ń tò wà mↄ̀ kↄ̃n à kpɛ́ togoonↄ, ben mpi kↄ̃n n bùsu gbɛ̃nsinↄ kↄ̃n n nↄↄnↄ kↄ̃n n nↄ yìgisainↄ wɛ̃ɛ mìo, ben n tãa kɛ̀ wà kɛ̀ kↄ̃n vurao kↄ̃n kondogio kↄ̃n mↄ̀gotɛ̃o kↄ̃n mↄ̀sio kↄ̃n lío kↄ̃n gbɛ̀o sáabu kpà, pↄ́ kɛ̀ aↄ̃è guu ero aↄ̃è yã maro bensↄ̃ aↄ̃ↄ dↄ̃na vĩroonↄ. N wɛ̃̀ndi kↄ̃n n ziaao kú Luda ↄzĩmɛ, ben nɛ́ɛ bɛ̀ɛ línɛro. 24 Beee yãnzin à tò ↄↄ pì mↄ̀ à ↄgbɛ pì kɛ̃̀zi.

25 Yã kɛ̀ ↄↄ pì kɛ̃̀n yɛ̀: Mɛnɛ, mɛnɛ, tɛkɛli, paasi. 26 Yã pìnↄ bↄkↄ̃tɛnan yɛ̀: Mɛnɛ bè, Luda n kíblegurↄↄ nàro à à lɛ́ zɛ̀. 27 Tɛkɛli bè, wà n tìisi lɛ́ gwà kilooa wà è nɛ́ɛ kiloo sɛ́ro. 28 Paasi bè, wà n kpata kpàatɛtɛ Midiãnↄ kↄ̃n Pɛsianↄnɛ.

29 Bɛlisaza yã ò a ìbanↄnɛ, ben aↄ̃ gumusu tɛ̃a kↄ̃n vura kã̀mbɛɛo dà Daniɛlinɛ wà kpàakpa kɛ̀ wà bè, bùsu gbãadeenↄ gbɛ̃ aagↄ̃deen à ũ. 30 Gwãavĩ dↄ̃nkↄ̃ pì guun wà Babilↄnia kí Bɛlisaza dɛ̀. 31 Midiã borii kɛ̀ wè benɛ Dariusu bé à vɛ̃̀ɛ à gɛ̃ɛ ũ a wɛ̃̀ baaagↄ̃ awɛɛplaadee guu.