4
Aka Yisrayel ŋaŋcəmbər masar pəyɔnɛ tɛnɛpəlɛ taŋan ta kəcali ka Yurdɛn
1 Ntɛ afum a Yisrayel fəp ŋalip kəcali Yurdɛn mɔ, kɔ Kanu Kəpɔŋ kəloku Yosuwe:
2 «Məyɛk-yɛk atɛmp wəco kɔ mɛrəŋ afum dacɔ, kusuŋka o kusuŋka fum wəkin.
3 Məloku ŋa: ‹Nəkɔ nəlɛk masar wəco kɔ mɛrəŋ nde antɔf ŋowosu fər kəŋgbɔkɔ ka Yurdɛn dacɔ, kəfo nkɛ aloŋnɛ ŋaŋcəmɛ mɔ. Nəlɛk mi nəkɛrɛ nəkɔ nəboc mi nde kəfo nkɛ nəndena-cepərɛnɛ pibi mɔ.›»
4 Kɔ Yosuwe ewe afum aŋɛ wəco kɔ mɛrəŋ aŋɛ anayɛk-yɛk aka Yisrayel dacɔ mɔ, kusuŋka o kusuŋka fum wəkin.
5 Kɔ Yosuwe oloku ŋa: «Nəcepər kaŋkəra ka danapa da Kanu Kəpɔŋ Kanu konu fɔr kiriŋ, nəsolnɛ cər kəkɔ ka Yurdɛn dacɔ, nwɛ o nwɛ pəgbaŋnɛ tasar tin, kəlɔm ka cusuŋka ca Yisrayel,
6 ntɛ tɔŋsɔŋɛ tɔyɔnɛ tɛnɛpəlɛ tonu mɔ. Kɔ awut anu ŋandeyif un dɔsɔk dɔlɔma-ɛ: ‹Ake masar mamɛ mɛfaŋ kəloku su-ɛ?›
7 nəloku ŋa fɔ domun da Yurdɛn dɛnacopər fɔr ya kaŋkəra ka danapa da Kanu Kəpɔŋ kiriŋ ntɛ kəŋc-cali Yurdɛn mɔ, kɔ kəŋgbɔkɔ ka Yurdɛn kəŋcopɛ domun. Masar mamɛ mende kəc-cɛm-cɛməs aka Yisrayel doru o doru.»
8 K'aka Yisrayel ŋayɔ tɔkɔ Yosuwe ɛnaloku ŋa mɔ. Kɔ ŋaŋkɔ ŋalɛk masar wəco kɔ mɛrəŋ nde kəŋgbɔkɔ ka Yurdɛn dacɔ pəmɔ tɔkɔ Kanu Kəpɔŋ kənaloku ti Yosuwe mɔ, kəlɔm ka cusuŋka ca aYisrayel. Kɔ ŋalɛk masar mamɔkɔ kɔ ŋaŋcalɛnɛ nde ŋanacəmbər cəbal kərɛsna mɔ, kɔ ŋamboc.
9 Kɔ Yosuwe omboc sɔ masar wəco kɔ mɛrəŋ kəŋgbɔkɔ ka Yurdɛn dacɔ, kəfo nkɛ aloŋnɛ agbaŋnɛ a kaŋkəra ka danapa da Kanu Kəpɔŋ ŋanacəmbər wɛcək mɔ. Masar mamɔkɔ mɔsɔrɔyi di haŋ mɔkɔ.
10 Aloŋnɛ aŋɛ ŋanagbaŋnɛ kaŋkəra kəsɛlɛŋ mɔ, ŋanacepɛ fɛ dəkəcəmɛ daŋan kəŋgbɔkɔ ka Yurdɛn disrɛ haŋ kɔ aka Yisrayel ŋalip kəyɔ ka tɔkɔ Kanu Kəpɔŋ kənasom Yosuwe a pəloku ŋa mɔ, kɔ Yosuwe ɔyɔ mes fəp pəmɔ tɔkɔ Musa ɛnasom kɔ ti mɔ. Kɔ aka Yisrayel ŋambɛlkər kəcali.
11 Ntɛ afum fəp ŋalip kəcali mɔ, kaŋkəra ka Kanu Kəpɔŋ kɔ aloŋnɛ akɔ ŋanagbaŋnɛ ki mɔ ŋaŋcali sɔ, kɔ ŋaŋcepər sɔ afum kiriŋ.
12 Kɔ aka Yisrayel alɔma aka cusuŋka ca Ruben, Kadu kɔ kusuŋka dacɔ ka Manase ŋaŋcepər aka Yisrayel kiriŋ pəmɔ tɔkɔ Musa ɛnaloku ŋa ti mɔ.
13 Antam kəloku fɔ dɔsɔk dadɔkɔ asɔdar mɛcəp wəco maŋkəlɛ, atɔmpər yosutnɛnɛ ŋaŋcepər Kanu Kəpɔŋ kiriŋ, ŋalip kəlompəsnɛ kəkɔ-sutɛnɛ, nde aranta ŋa Yurdɛn.
14 Dɔsɔk dadɔkɔ, kɔ Kanu Kəpɔŋ kəmbɛkəs Yosuwe aka Yisrayel fəp dacɔ, kɔ ŋaleləs kɔ pəmɔ tɔkɔ ŋanaleləs Musa kiyi kɔn doru fəp mɔ.
15 Kɔ Kanu Kəpɔŋ kəloku Yosuwe:
16 «Məloku aloŋnɛ aŋɛ ŋagbaŋnɛ kaŋkəra nkɛ kəyɔ sariyɛ nsɛ sədɛrmɛnɛ danapa dosu mɔ, ŋapɛnɛ ki Yurdɛn.»
17 Kɔ Yosuwe oloku aloŋnɛ: «Nəpɛ Yurdɛn!»
18 Ntɛ aloŋnɛ agbaŋnɛ a kaŋkəra ka danapa da Kanu Kəpɔŋ ŋanadepɛ kəŋgbɔkɔ ka Yurdɛn kɔ ŋandeŋ wɛcək dəpəwosu mɔ, kɔ domun da kəŋgbɔkɔ ka Yurdɛn doŋcop sɔ kəkɔt səbo sayi pəmɔ tɔkɔ mɛŋc ma fraŋsuwa mɛŋyɛfɛ mɔ.
19 Kɔ afum ŋaŋcali Yurdɛn tataka ta wəco ta ŋof ŋɔcɔkɔ-cɔkɔ, kɔ ŋaŋkɔ ŋayekti saŋka nde Kilkal, ntende dec dɛmpɛ Yeriko mɔ.
20 Masar wəco kɔ mɛrəŋ mmɛ ŋanalɛk kəŋgbɔkɔ ka Yurdɛn disrɛ mɔ, kɔ Yosuwe ɛŋcəmbər mi Kilkal.
21 Kɔ Yosuwe oloku aka Yisrayel: «Alna kɔ awut anu ŋandeyif un: ‹Masar ma ake mɔ mamɛ-ɛ?›
22 nəc-loku ŋa fɔ: ‹Aka Yisrayel ŋanacali kəŋgbɔkɔ ka Yurdɛn kəwosər domun.›
23 Kanu Kəpɔŋ Kanu konu kənawosərɛ nu domun da kəŋgbɔkɔ ka Yurdɛn haŋ kɔ aka Yisrayel ŋalip kəcali pəmɔ tɔkɔ Kanu Kəpɔŋ kənayɔnɛ su ti Kəba ka Cəŋkɔlma haŋ kɔ səŋcali ki mɔ.
24 Ti tendesɔŋɛ afum a doru fəp kəcərɛ a kəca ka Kanu kəyɔ fənɔntər. Tɔsɔŋ' on sɔ kənesɛ Kanu Kəpɔŋ kiyi konu doru fəp.»