22
Abraham owosɛ kəloŋnɛnɛ Kanu wan kɔn Isiyaka
1 Ntɛ mes mmɛ meŋcepər mɔ, kɔ Kanu kəmbocər Abraham dɔpɔ, kɔ kəwe kɔ: «Abraham!» K'owosɛnɛ ki: «In' ɛwɛ!»
2 Kɔ Kanu kəloku: «Məlɛk oŋ wan kam sona Isiyaka, wəkakɔ məmbɔtər mɔ. Məkɔ atɔf ŋa Moriya dəndo, məkɔ məloŋnɛn' em kɔ kəloŋnɛ ka kəcɔf nde tɔrɔ mpɛ indekɔ-mentər əm mɔ.»
3 Kɔ Abraham ɛyɛfɛ bət-bət suy k'ɛŋgbɛk sɔfale sɔn kəbənda, k'ɛlɛkɛnɛ acar ɔn atɛmp mɛrəŋ kɔ wan kɔn Isiyaka. Kɔ Abraham ɛŋgbɛs tɔk nyɛ ɛnakɔcɔfɛ poloŋnɛ mɔ, k'ɛntas nde kəfo kəŋkɔ Kanu kənamentər kɔ mɔ.
4 Tataka ta maas, kɔ Abraham eyekti kəro k'ɛnəŋk kəfo kaŋkɔ pəbɔlɛ.
5 K'oloku atɛmp ɔn: «Nəyi nnɔ kɔ sɔfale. Isiyaka k'ina, kəpɛ kɔ sənder nde kəroŋ kəkɔ-loŋnɛ Kanu. Kɔ səlip-ɛ, səndebəp nu nnɔ.»
6 Kɔ Abraham ɛlɛk tɔk nyɛ anakɔcɔfɛ poloŋnɛ mɔ, k'ɛsarəsər yi wan kɔn Isiyaka, kɔ nkɔn ɛlɛk nɛŋc kɔ faka. Kɔ ŋasol mɛrəŋ maŋan kəkɔ.
7 Kɔ Isiyaka ewe kas Abraham k'eyif kɔ: «Papa!» Kɔ wəkakɔ owosɛ: «In' ɛwɛ, wan kem!» Kɔ Isiyaka oloku: «Nɛŋc dɔ dandɛ kɔ tɔk, mba deke teŋkesiya tɔkɔ aŋkɔ-loŋnɛ Kanu pacɔf mɔ peyi-ɛ?»
8 Kɔ Abraham oloku: «Wan kem, Kanu ki sərka kəŋkɔ-sɔtɔ teŋkesiya ntɛ aŋkɔ-loŋnɛ pacɔf mɔ.»
Kɔ ŋasol mɛrəŋ maŋan sɔ kəkɔ.
9 Ntɛ ŋambəp kəfo nkɛ Kanu kənamentər kɔ mɔ, kɔ Abraham ɔlɔ dəkəloŋnɛ Kanu, k'omboc tɔk. K'oŋkot wan kɔn Isiyaka, k'edeŋər kɔ tɔk ya dəkəloŋnɛ kəroŋ.
10 Kɔ Abraham ɛntɛŋc kəca k'ɛlɛk faka kəkɔ-fay wan kɔn amera.
11 Kɔ mɛlɛkɛ ma Kanu Kəpɔŋ mewe kɔ dareŋc. Kɔ moloku: «Abraham! Abraham!» K'owosɛ: «In' ɛwɛ!»
12 Kɔ mɛlɛkɛ moloku: «Ta mədeŋər wan kam kəca, ta məyɔ kɔ tes o tes, bawo iŋcərɛ oŋ ndɛkəl a məŋnesɛ Kanu, ntɛ məntɔfatɛn' em wan kam mɔ, wan kam sona.»
13 Kɔ Abraham eyekti fɔr k'ɛnəŋknɛ tadarəŋ aŋkesiya ŋorkun lɛn ya ŋi yɛpətsərnɛ dɛrəntəm. Kɔ Abraham ɔŋkɔ pəlɛk aŋkesiya nŋɛ k'ɛsəkpərɛ ŋi wan kɔn, k'oloŋnɛ ŋi Kanu k'ɔŋcɔf, k'ɛsak wan kɔn.
14 Kɔ Abraham ɔsɔŋ tofo tatɔkɔ tewe ta «Kanu Kəpɔŋ Yire.» Ti tɔ aŋlokɛ mɔkɔ: «Nde tɔrɔ ta Kanu Kəpɔŋ kəroŋ, endekɔ-sɔtɔ pɛmarsɛnɛ.»
15 Kɔ mɛlɛkɛ ma Kanu Kəpɔŋ mɔŋgbɔkərɛ sɔ kəwe Abraham dareŋc,
16 kɔ moloku: «Toloku ta Kanu Kəpɔŋ indɛrəm' am ti, ina sərka! ‹Bawo məyɔ tantɛ, məfatɛnɛ f' em wan kam sona Isiyaka,
17 indelas əm kəpocɛ pətɔt, indesɔŋɛ afum am ŋala pəmɔ cɔs ca dareŋc kɔ asəŋc ŋa kəba kəsək. Yuruya yam yendetasərnɛ aterɛnɛ aŋan.
18 Afum a doru fəp ŋandesɔtɔ kəpocɛ pətɔt teta yuruya yam, bawo məŋcəŋkəl dim dem.›»
19 Kɔ Abraham oluksərnɛ nde atɛmp ɔn ŋaŋc-kar kɔ mɔ, kɔ ŋayɛfɛ kɔ ŋasol fəp faŋan kəkɔ Berseba, bawo Abraham Berseba ɛnandɛ.
20 Ntɛ mes mamɔkɔ meŋcepər mɔ, k'ande paloku Abraham ntɛ: Milka oŋkomɛ sɔ wɛŋc Nahor awut arkun:
21 Huc wan kɔn wəcɔkɔ-cɔkɔ, Bus wɛŋc wərkun, Kemuhɛl papa ka Aram,
22 Kesed, Haso, Pildas, Yidlaf kɔ Betuhɛl.
23 Kɔ Betuhɛl oŋkom Rebeka. Awut arkun akaŋɛ camət-maas ŋɔ Milka ɛnakomɛ Nahor, wɛŋc ka Abraham.
24 Kɔ wəlak' ɔn Rehuma, nkɔn sɔ ɛnakomɛ kɔ awut: Tebah, Kaham, Tahas, kɔ Mahaka.