Kayëta ir Ɓëŝëwif in
Lilaya in
Kayëta ir Ɓëŝëwif ijo ala ax nang ex na ba noỹo ỹëgwëk. Er kë reƴand mëne Yesu Kërisët nëmëca këɓi Moyis do gë ɗek ɓëlaw̃ënel ɓër Kaxanu ɓën. Gayikwa mëŋ ŝësëk gër kërëwa ŝaɗaxa ir din ir din ir këɓo seɓanaxënd Kaxanu ɓeñëŋënax in. Ga h̃ata ko ɗek er ebax exo di eni pexaxën ɓela in, Yesu Kërisët aɓaka ɓaka ko gër Sëm. Do mëŋ rix këŋo aŝaɗaxan alëngw ar din ir din. Akayëta aŋo ro këɓi sëƴalind Ɓëŝëwif ɓërëw̃ak end Kërisët ɓën mëne aỹap ỹapëk eno tëf mëŋ fo, këreni ɓakan na cale ikarëk indeɓën iŋ. Er ex gër akayëta in:
End enëngwët do gë emënën ed ngwën eŋ: 1.1–2.4.
End apexa and w̃ëlaw ko Yesu Kërisët eŋ: 2.5–4.13.
End aŝaɗaxan alëngw ar gër orën eŋ: 4.14–6.12.
End eter ed gë ŝaɗaxa ir Yesu eŋ: 6.13–10.39.
End ekwëta ed xwënaxënënd këɓo Kaxanu eŋ: 11.1–13.25.
1
End Asëñiw̃ ar Kaxanu eŋ
1 Akarëk aŋ, Kaxanu ɓakëlëbëd ɓakëlëbëd do gë ɓamatinali ɓandanjëm felëra këɓi ɓëxarëk ɓëreɓi ɓën paɓ gë ɓëlaw̃ënel ɓën.
2 Ɓarikan gër ɓakey ɓapelatar ɓand hi këne ɓaŋo, afelëra felëra këɓo paɓ gë Asëñiw̃. Ata Kaxanu paɓ gë Asëñiw̃ irexëm ijo ri ko ngwën iŋ do mëŋ fo ex ar sana këŋo exo kwën ɓeỹ ɗek an.
3 Gër Asëñiw̃ ijo ŝanayak oye or enjaran end Kaxanu ol,
gër ndexëm fo watik enimin ola orexëm ol,
ɓëte mëŋ fo lëkayak ngwën iŋ gë eyeƴan epangak edexëm el.
And rin këɓi ɓela ŝaɗaxa ir angunëtan and ɓeñëŋënax aŋ,
aɓaka ɓaka ko ỹëpax ko ƴaŋ gër orën, gër liw̃ ir Kaxanu, mëŋ ar gë owun osëm an.
End Yesu do gë omeleka eŋ
4 Asëñiw̃ ijo nëmëca këɓi or gapak ol omeleka ok
mëŋ yëlaxën këŋo Kaxanu ow̃ac or wëlik nëmëc gë oreɓën ol.
5 Enimin Kaxanu, elod aŋo pel ex na meleka:
«Wëj ex Asëñiw̃ën, wëno wa rëw̃ ki doro.»
Do ɓëte:
«Wëno kë hi Sëm do mëŋ exo gi Asëñiw̃ën.»
6 Ɓarikan Kaxanu and baŋo law̃ënëgund Asëñiw̃ gër ngwën ro aŋ, mëŋ ar hik ɗamana exo dixën ɓeỹ ɗek an, are re ko:
«Ɗek omeleka od Kaxanu ok, poxiyindëlexëni eno cale!»
7 End omeleka eŋ cëŋ, are re ko:
«Omeleka od Kaxanu ok ɓangoc exëni,
Ɓëriyenin ɓërexëm exëni ang xoɗux or xafa-xafa fo.»
8 Ɓarikan end Asëñiw̃ eŋ, are re ko:
«E Kaxanu, ayël yël këƴo din ir din acët and owun oreƴ and ex acët and or ŝenene aŋ.
9 Ah̃an h̃an këƴ end ŝenene eŋ do ŝus këƴ eñëŋënax eŋ.
E Kaxanu, Kaxanu sana ki,
mëŋ xoŝ ki gë ogu exi nëngandëraxënënd
do mondako sana ki gayikako aɓal këŋo ɓalënd
endeƴ eŋ nëmëc gë end ɓoŝandax eŋ.»
10 Do ɓëte:
«Axwën, wëj rik edëɗa ed ebar el elod gër ỹanar
do orën ol, andiyen andeƴ ex.
11 Orën ol gë ebar el aŝapër kë ŝapër
axar kë xar ang ɓanjëm fo.
Ɓarikan wëj din ir din këƴ ɓayi.
12 Alongomira këƴ longomira ang ɓacuɗ ɓakarëk fo,
do eƴ nëmba ang këni nëmband ɓacuɗ ɓacëxe ak.
Ɓarikan wëj din ar hi këƴ an këƴ ɓayi,
ola oreƴ ol or din ir din ex.»
13 Kaxanu nande fel këŋo na meleka:
«Ñëpal gand liw̃ iram ro
xali mëni ɓar ɓërangoỹëra andeƴ ɓën eni gi ambëñaxën andeƴ?
14 Ax gi ex na nde omeleka ok ex ɓangoc ɓand këŋo riyeninënd Kaxanu ɓaŋ? Ax gi ex na nde ɓën këɓi law̃ëndërand eni di andiyen and edëcara ed ɓër kë ŝot Apexa ɓën?»