49
End ofelar or Yakob do gë ɓosëñiw̃ eŋ
1 Akey amat, Yakob ga w̃ac këɓi ɓosëñiw̃, re ko:
«Macërëgun mun nangënaxën ala kala er këŋo hi ecan-ecan in.»
2 «Ɓarërëgun ene ɓaxët wën ɓosëñiw̃ ɓor Yakob!
Ɓaxëtino Isërayel, ɓaxëtino sorix irewën!
3 Ruben, wëj ex itoŝan iñanar indam iŋ,
wëj ex odëw̃ërëw̃en oñanar od ojaw̃ odam ok,
wëj nëmëca këɓi ɓoɓinëx gaf in, ojaw̃ ok
do gë or gapak ol,
4 Ola oreƴ ol ang oỹëm fo ex,
ɓari ami yël ex na olëngw ol,
gayikwa ƴaŋ gër angaw̃ and sorix ɓët ɓaƴ,
angaw̃ andam aŋ ɓuyarën këƴ
ga ɓët baƴ gër asoxari aram.»
5 Simewoŋ do gë Lewi, ɓër acël amat exëni,
angwëlëra andeɓën aŋ, ang oỹënga or emer fo ex.
6 Wëno ami ɓar angwëlëra and edi ed eñëŋënax elo aŋ,
ame ɗil na gër amara andeɓën!
Gayikwa në end oxoỹ oreɓën law̃ëra kënëɓi ɓela,
do në end owër oreɓën saw̃ëra kënëɓi oxeƴ or ɓela.
7 Kata fo ex oxoỹ oreɓën ol, gayik or gë axaỹënan këm ex!
do kata fo ex owër oreɓën ol,
gayikwa xoɗux fo ex!
Ɓërandëw̃ëra ɓandewën ɓën aŝapëreli këmëni ŝapëreli ŝit gër ɓulunda ir Isërayel,
ayic këmëni yic eni ɗëgëra ɗek ebar ed Isërayel el.
8 Wëj cëŋ Yuda, ayas këni ỹana eni yasënd ɓoɓinëx,
ataxan andeƴ aŋ gër eporëfor ed ɓërangoỹëra andeƴ kë hi,
oɓaŝ or sorix ol afoxi këni ỹana eni poxind gër lëngw ireƴ.
9 Yuda yëraŋ iɓeja hi këƴ!
Gër emaỹi edeƴ këƴ ɓakawënd and ƴambëgu këƴo emacar aŋ,
aɓaf këƴ ɓafënd, alaki këƴ lakind,
ang yëraŋ inëm fo: noỹo këŋo xanin?
10 Acët and owun aŋ, laŋ kë ɓayi gër ekun ed Yuda,
Acët and olëngw aŋ, laŋ kë ɓayi gër ɓërandëw̃ëra andexëm,
xali exo ŋatëgu Ŝilo, ar xwënëk an,
do eno kwëtaxën ɓenëng ɓend ɓela ɓeŋ.
11 Axap këŋo ỹana eŋo kapënd fali irexëm in lëf gër andëɗa and reseŋ,
axap këŋo ỹana eŋo kapënd atox and fali inëm aŋ në atëx and reseŋ.
Acuɗ andexëm aŋ ko ỹana exo neɓënd gë ngoƴ iŋ,
anjëm andexëm aŋ ko ỹana exo neɓënd gë omen od reseŋ ok.
12 Ngoƴ iŋ kë ỹana ex ɓarënënd ɓangës ɓandexëm ɓaŋ,
omër kë ỹana ex peŝënënd oỹënga orexëm oŋ.
13 Sabuloŋ kë lëg ler gër oɓëŋa od ɓangwëngw,
gër ed kë ỹana ex kwëŝand okuluŋ,
do ebar ed ko xwën el, ah̃at kë h̃at xali gër ed Sidoŋ.
14 Isakar mëŋ cëŋ, fali ir gë ojaw̃ hi ko,
alaki ko lakind mërëxand ir ɓakece.
15 Awat wat ko mëne gër ed ko seyëtand anënga nëngak, do ebar enëngax ex.
Aw̃a w̃a ko eno kap exo ɗëɓixën esiɓax,
aw̃a w̃a ko exo diyenind ang xaɗëp fo.
16 Dan këɓi ỹana eɓi kitind ɓulunda irexëm in,
ang enëng emat end Isërayel fo.
17 Dan er hi ko ang andën and në fëña fo,
ang ekifoxifo ed në lec fo,
gër osak këŋo h̃atënd fanac in
exo ɗatixën gë eƴiỹ el ar ỹëpaxën këŋo an.
18 (Axwën, ayar këme yarënd apexa andeƴ aŋ!)
19 Gad mëŋ cëŋ, enga end ɓërek ɓëxeỹax këŋo w̃ereli,
ɓarikan aw̃er ko w̃er xali eɓi kor, do eɓi ŋw̃ay!
20 Gër ebar ed ko xwën Aser,
eƴamb el ax gi na mopaỹ,
mëŋ kë ỹana eɓi dëɓand ɓemun ɓeŋ.
21 Nefëtali ang ebëjare ed kë raɗërand fo hi ko,
oyeƴan oyekax ko ỹana exo yeƴanënd.
22 Yosef mëŋ cëŋ, ang atëx and kë rëw̃ënd fo hi ko,
ang atëx and lëgëk ler në añësa and men fo hi ko,
ɓenini ɓendexëm ɓeŋ yaɓët kece in kë lefënd.
23 Aỹanaxën ỹanaxën këno,
do aw̃an w̃an këno gë opës odeɓën ok,
gë opës odeɓën ok w̃an këno ɓërangoỹëra andexëm ɓën.
24 Ɓarikan atumb andexëm aŋ ax yëlora ex na,
onëxar orexëm oŋ ɓayik ŋw̃ac-ŋw̃ac.
Paɓ gë otaxan od ar fangak ok,
ar këŋo yëlënd panga Yakob an (ar ex Axaɗac, do Angaỹ and Isërayel an).
25 «Paɓ gë Kaxanu, ar yata këŋo sorix an (gilexo angwak andeƴ aŋ)!
Ar Fangak an, yëlëlexi oɓetak ol,
oɓetak or ƴaŋ gër orën ol,
oɓetak or gëɗ ebar ol,
oɓetak or gër oɓër,
do gër acël and asoxari ol!»
26 «Oɓetak or xaran ki sorix ol,
nëmëcak oɓetak or gër osënd or angwën ol,
or gër ɓëtënd ɓënd akarëk ol.
Oɓetak olo, gilex gër gaf ir Yosef,
gil ex gër egor ed ar hik emun end ɓoɓinëm an!»
27 «Beŋëŝame mëŋ cëŋ, yëlemu ixeỹax hi ko,
gëɓër këŋo ƴambënd emacar end law̃ këŋo eŋ;
genëka, eɓi cetëra er ŝotëgu ko in.»
28 Ɓosëñiw̃ ɓor Yakob ex ɓëxarëk ɓër ɓenëng epëxw gë ɓeki ɓend Isërayel ɓeŋ. Ɓendeƴ ɓeŋo felëra baɓi sëm ireɓën and baɓi xaran oɓetak aŋ, ala kala gë oɓetak orexëm pit.
End ecës ed Yakob eŋ
29 Ga xucak eŋo, Yakob fel këɓi ɓosëñiw̃: «Wëno gogo këme ŝës. Mëlayiɗëne ene mëxwëtax gër ỹeg ir w̃ëxëta kënëɓi ɓëxarëk ɓëram, gër oxel or gër oŝënga or Efëroŋ, arandëw̃ëra and Het an,
30 gër oxel or gër oŝënga or Makëpela, ler gër Mamëre, gër ebar ed Kanahaŋ, oŝënga or yëc ko Abëraxam gër Efëroŋ, arandëw̃ëra and Het an, gër oŝënga or xwën ko.
31 Fën w̃ëxëta kënëɓi Abëraxam do gë alindaw̃ Sara, gë Isak do gë alindaw̃ Rebeka. Fën w̃ëxëta këmo wëno ɓëte Leya.
32 Oŝënga olo do gë oxel ol, Abëraxam yëcëk gër otaxan od ɓërandëw̃ëra and Het.»
33 And h̃ata ko epelëra ed ɓosëñiw̃ aŋ, Yakob ɓaka ko laki ko gër angaw̃, kwël xoti ko do ɓarëx këni gë ɓëxarëk ɓërexëm ɓër ŝësëk elod anëka fo ɓën.