26
Trỗ Bar Môi-se Chĩc Loah Thrỗq Cũai
1 Toâq khoiq vớt ỗn chơ, Yiang Sursĩ ớn Môi-se cớp E-lia-sơ con samiang Arôn neq:
2 “Cóq anhia chĩc thrỗq nheq tữh cũai samiang tâng dũ dống sũ bữn tễ bar chít cumo achỗn ca têq cỡt tahan.”
3-4 Ngkíq, Môi-se cớp E-lia-sơ táq puai machớng Yiang Sursĩ ớn. Alới arô nheq tữh cũai samiang tễ bar chít cumo achỗn, yỗn toâq rôm parnơi. Tỗp alới toâq rôm parnơi pỡ ntốq cutễq tapín Mô-ap, yáng tooh crỗng Yôr-dan choâng vil Yê-ri-cô.
Cũai proai I-sarel ca khoiq loŏh tễ cruang Ê-yip-tô, bữn neq:
5 Tễ tỗp Ruben (Ruben la con samiang clúng Yacốp) bữn máh sâu neq: Hanoc, Palu,
6 Hê-trôn, cớp Car-mi.
7 Sâu tỗp nâi bữn thrỗq cũai samiang la 43,730 náq.
8 Máh tỗp con châu chễ Palu la E-liap
9 cớp máh con samiang E-liap neq: Nê-muol, Dathan, cớp Abi-ram. (Dathan cớp Abi-ram nâi la cũai sốt; ma alới lớn-sarlớn chóq Môi-se cớp Arôn. Alới pruam cớp tỗp Cô-ra, ngkíq alới lớn-sarlớn chóq Yiang Sursĩ tê.
10 Cutễq caha lưn mumoong chíq alới. Alới cuchĩt parnơi cớp Cô-ra, dếh tỗp cũai bar culám sỡng chít náq hỡ, bo ũih taluam cat ki. Ranáq nâi la dŏq catoaih atỡng nheq tữh cũai proai.
11 Ma bo ki máh con samiang Cô-ra tỡ bữn cuchĩt.)
12 Tễ tỗp Si-mê-ôn bữn máh sâu neq: Nê-muol, Yamin, Yakin,
13 Sê-rah, cớp Sau-lơ.
14 Tâng máh sâu nâi bữn thrỗq cũai samiang la 22,200 náq.
15 Tễ tỗp Cát bữn máh sâu neq: Sê-phôn, Haki, Suni
16 Ot-ni, E-ri,
17 Arôt, cớp Arê-li.
18 Tâng máh sâu nâi bữn thrỗq cũai samiang la 40,500 náq.
19-21 Tễ tỗp Yuda bữn máh sâu neq: Sê-lah, Pharêt, Sê-rah, Hê-trôn, cớp Hamul. (Bar náq con samiang Yuda la E-rơ cớp Ô-nan, alới khoiq cuchĩt tâng cruang Cana-an.)
22 Tâng máh sâu nâi bữn thrỗq cũai samiang la 76,500 náq.
23 Tễ tỗp I-sacar bữn máh sâu neq: Tô-la, Puah,
24 Yasup, cớp Sim-rôn.
25 Tâng máh sâu nâi bữn thrỗq cũai samiang la 64,300 náq.
26 Tễ tỗp Sa-bulôn bữn máh sâu neq: Sê-ret, E-lôn, cớp Yalil.
27 Tâng máh sâu nâi bữn thrỗq cũai samiang la 60,500 náq.
28 Yô-sep bữn con samiang bar náq, Ma-nasê cớp Ep-ra-im.
29 Tễ tỗp Ma-nasê bữn Makir con samiang Ma-nasê; án cỡt mpoaq Ki-liat, cớp máh sâu tễ tŏ́ng toiq Ki-liat bữn neq:
30 Yasơ, Hê-léc,
31 A-sariel, Se-kem,
32 Sê-mi-da, cớp Hê-phêr.
33 Sê-lô-phahat con samiang Hê-phêr ŏ́q con samiang, ma án bữn ống con mansễm sâng, ramứh neq: Mah-la, Nô-ê, Hôc-la, Mil-ca, cớp Tir-sa.
34 Thrỗq cũai samiang tâng máh sâu nâi la 52,700 náq.
35 Tễ tỗp Ep-ra-im bữn máh sâu neq: Suthê-la, Be-ker, cớp Tahan.
36 Tễ sâu Suthê-la, bữn sâu E-ran hỡ.
37 Thrỗq cũai samiang tâng máh sâu nâi la 32,500 náq. Máh sâu nâi toâq tễ tŏ́ng toiq Yô-sep.
38 Tễ tỗp Ben-yamin bữn máh sâu neq: Bê-la, At-bel, Ahi-ram,
39 Supham, cớp Hupham.
40 Tễ tŏ́ng toiq Bê-la bữn sâu At cớp Naman ễn.
41 Thrỗq cũai samiang tâng máh sâu nâi la 45,600 náq.
42 Tễ tỗp Dan bữn sâu Suham.
43 Nheq tữh cũai samiang sâu ki la 64,400 náq.
44 Tễ tỗp Asêr bữn máh sâu neq: Im-nah, It-vi, cớp Be-ria.
45 Tễ tŏ́ng toiq Be-ria bữn sâu Ê-bêr cớp Mal-kiel ễn.
46 Asêr bữn muoi lám con cumũr, ramứh Sê-rah.
47 Thrỗq cũai samiang tâng máh sâu nâi la 53,400 náq.
48 Tễ tỗp Nep-tali bữn máh sâu neq: Yasiel, Cuni,
49 Yê-se, cớp Si-lem.
50 Thrỗq cũai samiang tâng máh sâu nâi la 45,400 náq.
51 Parỗm nheq tữh cũai samiang tâng tỗp I-sarel la 601,730 náq.
52 Yiang Sursĩ atỡng Môi-se neq:
53 “Cóq mới tampễq cutễq yỗn dũ tỗp cũai I-sarel, puai thrỗq cũai tâng tỗp.
54-56 “Tâng ranáq tampễq cutễq trỗ nâi, cóq ĩt crơng séng táq tếc tampễq; tỗp aléq ma bữn cũai clứng, cóq tampễq cutễq yỗn tỗp alới sa‑ữi hỡn. Ma tỗp aléq bữn cũai bĩq sâng, cóq tampễq yỗn tỗp alới bĩq tê.”
57 Tỗp Lê-vi bữn máh sâu neq: Kêr-sôn, Cô-hat, cớp Mê-rari.
58 Tŏ́ng toiq tỗp alới bữn dếh sâu cớt la neq: Lip-ni, Hep-rôn, Mali, Muchi, cớp Cô-ra. Cô-hat la mpoaq Am-ram.
59 Lacuoi Am-ram la Yôc-abet con mansễm Lê-vi; án cỡt tâng cruang Ê-yip-tô. Yôc-abet bữn con samiang bar lám cớp Am-ram, ramứh Arôn cớp Môi-se, cớp bữn muoi lám con mansễm hỡ, ramứh Mi-riam.
60 Arôn bữn pỗn náq con samiang, ramứh Nadap, Abi-hu, E-lia-sơ, cớp I-thamar.
61 Nadap cớp Abi-hu cuchĩt bo alới chiau sang yỗn Yiang Sursĩ ũih blữ ca tỡ pĩeiq alới táq.
62 Máh cũai samiang tỗp Lê-vi tễ muoi casâi achỗn, bữn thrỗq cũai 23,000 náq. Ma noau tỡ bữn noap amut thrỗq alới tâng thrỗq tỗp I-sarel, yuaq alới tỡ bữn chống mun cớp cũai I-sarel.
63 Môi-se cớp E-lia-sơ chĩc máh ramứh sâu cớp máh thrỗq cũai I-sarel bo alới ỡt pỡ cutễq tapín Mô-ap, yáng tooh crỗng Yôr-dan choâng vil Yê-ri-cô.
64 Máh cũai Môi-se cớp Arôn chĩc dŏq tâng trỗ muoi, bo alới ỡt tâng ntốq aiq cheq cóh Si-nai, tỡ bữn cũai samiang aléq ma noâng bữn tamoong.
65 Yuaq Yiang Sursĩ khoiq pai chơ, dũ náq cũai samiang thrap ki cóq cuchĩt nheq tâng ntốq aiq. Dũ ranáq ki lứq cỡt ngkíq; ma ống Calep con samiang Yê-phunê, cớp Yô-sũa con samiang Nun sâng noâng tamoong.