4
Cũai Par‑ũal Chíl Riap Vil Yaru-salem
1 Dớt lứq, nŏ́q yễng báiq blưoq-blưoq cỡt múc chíq,
cớp tamáu tễ Dống Sang Toâr cỡt pacháh caldáih poân rana.
2 Tễ nhũang noau nhêng chu tỗp tatoam vil Si-ôn cỡt samoât yễng,
ma sanua noau nhêng chu alới cỡt samoât adéh cutễq sâng.
3 Acho arưih dáng bán curiaq con án,
ma máh cũai cứq tỡ dáng pasếq loâng con alới, cỡt samoât ntruoi dadieu.
4 Alới táh máh con cacớt alới yỗn panhieih khlac toau cuchĩt;
máh carnễn pỡq susễq ma tỡ bữn noau yỗn alới ntrớu.
5 Máh cũai dốq cha sana ễm tễ nhũang,
sanua alới cuchĩt khlac radốc racơng tâng rana.
Máh cũai dốq tâc cha thrưong tễ nhũang,
sanua alới chuaq sana cha tâng ntốq bốq crơng noau táh.
6 Cỗ tian máh cũai proai cứq táq lôih, ngkíq yuaq alới roap tôt ntâng hỡn tễ vil Sadôm,
la vil ca Yiang Sursĩ pupứt muoi taláp sâng, cớp tỡ bữn noau têq rachuai án.
7 Bo ki máh cũai arieih hái la bráh hỡn tễ prễl príl,
cớp cloc clữi tễ dỡq tóh.
Tỗp alới bán rêng lứq,
cớp roâp riang alới cusâu ariang tamáu moat.
8 Sanua, alới pỡq tâng rana ma tỡ bữn noau sacoal alới;
roâp riang alới cũm ngôt samoât cũai cuchĩt;
ngcâr alới sangot khỗ samoât sarloc aluang,
cớp alới oiq rakhuoc hữm ống nghang sâng.
9 Máh cũai khoiq cuchĩt tâng ntốq rachíl,
alới o hỡn tễ cũai cuchĩt khlac, alới ca cuchĩt yũt cỗ ŏ́q sana cha.
10 Máh ranáq cuchĩt pứt toâq pỡ cũai cứq la crứn ngcŏh;
máh mansễm ca ayooq con cayac, alới khoiq ớp cha con bữm.
11 Yiang Sursĩ atoâq ranáq cuchĩt pứt ntâng luat ngư,
cỡt samoât pla ũih chŏ́ng tarŏ́h cóh Si-ôn toau cat lacốiq nheq.
12 Máh cũai puo cớp máh cũai proai cruang canŏ́h, alới tỡ bữn chanchớm tháng
pai bữn cũai toâq phaq talốh ngoah toong viang vil Yaru-salem.
13 Ma ranáq nâi toâq la cỗ tian cũai tang bỗq Yiang Sursĩ tâng vil Yaru-salem táq lôih,
cớp cỗ tian tỗp tễng rit sang tâng vil ki táq ranáq sâuq;
alới táq yỗn aham cũai tanoang o loŏh tâng mpứng dĩ vil.
14 Máh cũai sốt tâng vil ki pỡq toah-toah tơ-tơ tâng máh rana,
cỡt samoât cũai moat sũt tayáh pỡq;
tampâc alới nhơp tớt moang aham cũai toau tỡ bữn noau khớn satoaq.
15 Máh cũai proai cu‑ỗi chóq alới neq: “Dễq yơng tễ hếq!
Anhia la cũai nhơp lứq! Chỗi yống satoaq hếq!”
Yuaq ngkíq, alới pỡq cucuang tứng-tooc tễ cruang nâi chu cruang ki,
ma tỡ bữn noau roap chỗm alới.
16 Yuaq Yiang Sursĩ toâp táq yỗn tỗp alới cỡt pláh parsáng-parsaiq;
Ncháu tỡ bữn ramíng noâng tễ tỗp alới;
Ncháu tỡ bữn noap máh cũai tễng rit sang cớp máh cũai sốt.
17 Tỗp hái tapoang toau cỡt lakéh,
ma tỡ hữm noau toâq rachuai ntrớu;
tỗp hái ỡt ngcuang cruang canŏ́h toâq rachuai, ma tỡ hữm noau toâq.
18 Bữn moang cũai par‑ũal ỡt câp nhêng dũ rayáh hái pỡq tâng máh rana;
casâi cumo dỡi hái cỡt cakéh la‑ữt,
cớp tangái parsốt khoiq toâq pỡ hái chơ.
19 Cũai rapuai hái, toâq chái lứq,
cỡt samoât calang crức pâr pachớt chu hái.
Alới sễng tễ cuar cóh,
cớp hái santar sâng toâq alới cỗp hái tâng ntốq aiq.
20 Alới cỗp puo Yiang Sursĩ khoiq rưoh, án ca cỡt samoât rangứh hái;
la cũai ca hái sa‑âm têq bán curiaq hái tễ máh cũai ễ toâq talốh pupứt.
21 Âu! Anhia tỗp Ê-dôm cớp tỗp Usơ tíng cacháng ayê hếq,
mŏ ŏ́c rúng pứt lứq ễ toâq pỡ anhia machớng ki tê.
Tỗp anhia lứq ỡt mu rariat, chơ tayáh sarín sarêu,
cớp cỡt casiet machớng hếq tê.
22 Máh cũai tâng cóh Si-ôn khoiq roap tôt chơ tễ ranáq lôih alới khoiq táq;
chumát Yiang Sursĩ tỡ bữn yỗn hái cỡt cũai tũ noâng.
Tỗp Ê-dôm ơi! Ncháu ễ yỗn anhia ễn roap tôt.
Ncháu ễ apáh máh ŏ́c sâuq anhia khoiq táq chóq hếq.