4
Sɑkɑri u dɑbu wurɑguu
kɑ dɑ̃ɑ ye bɑ mɔ̀ olifi wɑ
kɑ̃siru sɔɔ
1 Gusunɔn gɔrɑdo wi u kɑ Sɑkɑri gɑri mɔ̀ u nɑ u nùn yɑmiɑ nge mɛ bɑ rɑ tɔnu dom yɑmiɛ.
2 Mɑ u nùn bikiɑ u nɛɛ, mbɑ ɑ wɑɑmɔ mi.
Mɑ u nùn wisɑ u nɛɛ, wurɑn dɑbuwɑ nɑ wɑɑmɔ gèn wɔllɔ bɑ wekeru gɑru sɔndi. Weke te, tɑ kɑ̃ɑnu nɔɔbɑ yiru mɔ. Nin wɔllɔwɑ bɑ fitilɑnu sɔndi tiɑ tiɑ. Kɑ̃ɑ nin min diyɑ gum mu rɑ kɑ de fitilɑ nin mi.
3 Olifin dɑ̃nu yiru yɑ wɑ̃ɑ weke ten bɔkuɔ. Teeru nɔm dwɑru giɑ, teeru mɑɑ nɔm geu giɑ.
4 Mɑ Sɑkɑri u wure u gɔrɑdo wi bikiɑ u nɛɛ, yinni, mbɑ yenibɑ kpuron tubusiɑnu.
5 Mɑ Gusunɔn gɔrɑdo u nɛɛ, ɑ ǹ yen tubusiɑnu yɛ̃?
6-10 Mɑ Sɑkɑri u nɛɛ, ɑɑwo, yinni. Mɑ gɔrɑdo u nɛɛ, fitilɑ nɔɔbɑ yiru ye, yɑ sɑ̃ɑwɑ Yinni Gusunɔn nɔni yi yi tem bukiɑnɑmɔ.
11 Mɑ Sɑkɑri u mɑɑ nɛɛ, mbɑ olifin dɑ̃nu yiru ye yɑ wɑ̃ɑ dɑbu gen nɔm geuɔ kɑ gen nɔm dwɑrɔ min tubusiɑnu.
12 U mɑɑ bikiɑ u nɛɛ, mbɑ olifin kɑ̃ɑnu yiru yen tubusiɑnu ni nu wɑ̃ɑ dɑbun kɑ̃ɑnu yiru yen bɔkuɔ, mìn di gum kokumɔ nge wurɑ.
13 Yerɑ u wisɑ u nɛɛ, ɑ ǹ nin tubusiɑnu yɛ̃?
Mɑ u nɛɛ, ɑɑwo, Yinni.
14 U nùn wisɑ u nɛɛ, nu sɑ̃ɑwɑ tɔmbu yiru be nɑ gɔsɑ bɑ nɛ, tem kpuron Yinni sɑ̃ɑmɔ.
Nɔɔ mwɛɛnu Sorobɑbɛlin sɔ̃
Yerɑ u mɑɑ nɛɛ, wee ye Yinni Gusunɔ u Sorobɑbɛli sɔ̃ɔmɔ. U nɛɛ,
n ǹ mɔ kɑ wi, Sorobɑbɛlin dɑm
ǹ kun mɛ kɑ win yiikowɑ
u koo kpĩ u sɔmburu ko.
Adɑmɑ kɑ wi, Gusunɔn Hunden dɑmɑ.
Wi, wɔllu kɑ tem Yinniwɑ u yeni geruɑ.
U mɑɑ nɛɛ,
Sɑkɑri, mbɑ n dɑ n guu bɑkɑ te tɑ wɑ̃ɑ Sorobɑbɛlin wuswɑɑɔ.
Sorobɑbɛli wi, u koo tu kɔrɑ
kpɑ u kpee geeru yɑrɑ
te bɑ koo sɔndi sɑ̃ɑ yerun wii kpiirɔ.
Sɑɑ ye sɔɔ, tɔmbu bɑ koo nuku dobun kuuki ko bɑ n mɔ̀
ɑnnɑ ɑ kpee burɑru wɑ.
Yinni Gusunɔ u mɑɑ Sɑkɑri sɔ̃ɔwɑ u nɛɛ,
Sorobɑbɛliwɑ u dii ten kpɛɛkpɛɛku swĩi.
Wiyɑ u koo mɑɑ ten bɑnɑ wiru go.
Sɑɑ ye sɔɔrɑ nɛn tɔmbu bɑ koo giɑ mɑ nɛ, Gusunɔ wɔllu kɑ tem Yinniwɑ nɑ nun gɔrimɑ.
Yen sɔ̃, bu ku sɔmbu ten tore gɛm
bɑɑ tɑ̀ n sɑ̃ɑn nɑ piibu.
Bɑ koo nuku dobu ko
bɑ̀ n wɛ̃ɛ wɑ
yi bɑ rɑ kɑ gɑnɑn dɛndɑbu mɛɛri
Sorobɑbɛlin nɔmɑɔ.