Luda yã takada kũ Bisã yão 2 SAMUƐLI 17

Usai ↄ̃ndↄ̃kɛna Abusalomunɛ

1 Aitofɛli pì Abusalomunɛ: Tó makũmɛ, mani zĩ̀karinↄ sɛ́ gbɛ̃nↄn dúbu kuri awɛɛpla mà pɛ́tɛ Daudai kũńwo gwãaniala. 2 Mani lɛ́tɛa gↄrↄ kũ à kpàsa a ↄ bùsa, mani a fu. A gbɛ̃nↄ ni bàa lɛ́ ń pínki, mani a dɛ ado, 3 mani sunnɛ kũ gbɛ̃ pìnↄ ń pínki. Gbɛ̃ kũ ntɛn wɛtɛ ǹ dɛ ganan gbɛ̃ pìnↄ suna ũ ń pínki. Tó à gà, gbɛ̃ kparanↄ ni gↄ̃ aafia ń pínki. 4 Yã pìi kɛ̀ Abusalomunɛ nna kũ Isaraila gbɛ̃ zↄ̃kↄ̃nↄ ń pínki. 5 Akũ Abusalomu pì: Ò Aki gbɛ̃ Usai sísi dↄ ò ma lákũ ani o nà se. 6 Kũ Usai kà, Abusalomu pìnɛ: Lákũ Aitofɛli ò nàn dí. Ò kɛ lákũ à ò nàn yá? Ke òsun kɛ lɛro. N è deramɛɛ? 7 Usai wèa à pì: Lɛ́ kũ Aitofɛli dàáwa gbãra manaro. 8 Ń n de dↄ̃ kũ a gbɛ̃nↄ. Zĩ̀kari mananↄmɛ ń ũ, ò pãsĩ lán músu nɛ́rande kũ ò a nɛ́nↄ sìaa bàmɛ. N de bi zĩ̀kariimɛ, ani we à i gu dokↄ̃nↄ kũ a gbɛ̃nↄoro. 9 Gu kũ à kun tera, anigↄ̃ utɛna gbɛ̀wɛɛɛ gũn ke gukea. Tó à sù à lɛ̀tɛ ó gbɛ̃nↄa káaku sↄ̃, gbɛ̃ kũ à a baaruu mà ni pi, ò zĩ̀i blè Abusalomu zĩ̀karinↄamɛ. 10 Bee gↄ̃sa gbãna kũ à wↄ́rↄgↄ vĩ lán músuu bànↄ swɛ̃̀ ni kɛ̃ńgumɛ, zaakũ Isarailanↄ dↄ̃ ń pínki kũ n de bi zĩ̀kari manamɛ, akũsↄ̃ gↄ̃sa gbãnanↄn kú kãao. 11 Abire yãi lɛ́damma yã kũ má vĩn dí. Ǹ Isarailanↄ kakaranyĩ ń pínki zaa Dani ari gɛna Bɛsɛba, ògↄ̃ dasi lán ísiralɛ bùsu'atɛ̃ bà, ǹ dońnɛ arɛ zĩ̀lan. 12 Óni a le gu kũ à kun pínki, óni lɛ́tɛa lán plí dì kↄ́tɛ zĩtɛa nà. Àpi kũ gbɛ̃ kũ ò kú kãaonↄ ń pínki, ń gbɛ̃ke ni boro. 13 Tó à sù à gɛ̃̀ wɛ̃tɛ ke gũmmɛ sↄ̃, Isaraila gbɛ̃ sĩnda pínki ni bà sɛ́ à gɛ́o gwe, oni wɛ̃tɛ pì kátɛbↄnↄ gátɛ ò táo guvutɛn. Bee a gbɛ̀ kaso ke, oni e gwe doro. 14 Akũ Abusalomu kũ Isarailanↄ pì ń pínki: Usai lɛ́damma mana de Aitofɛli pↄ́la. Dikiri mɛ́ à zɛ̀o à Aitofɛli lɛ́damma mana pìi gboro, de à le à Abusalomu ásaru kɛ yãi.

15 Akũ Usai ò sa'ori Zadↄkinɛ kũ sa'ori Abiatao à pì: Aitofɛli lɛ́ dà Abusalomua kũ Isaraila gbɛ̃ zↄ̃kↄ̃nↄ à pì à kɛ lán dí bà, akũ ma lɛ́ dàḿma ma pì ò kɛ lán dí bà. 16 À gbɛ̃nↄ zĩ likalika ò gɛ́ ò o Daudanɛ àsun i swabikũkiaro, à bikũ likalika, de òsun àpii kũ gbɛ̃ kũ ò kú kãaonↄ dúgu zↄ̃ro yãi. 17 Yonatã kũ Aimazao kú Ɛnlogɛli, zaakũ oni fↄ̃ ò bo gupuraa Yurusalɛmuro. Akũ nↄkpare zĩkɛri ke gɛ̀ɛ à òńnɛ ò gɛ́ baaruu pìi kpá kína Daudanɛ. 18 Akũsↄ̃ kɛfɛnna ke ń é, akũ à gɛ̀ɛ à ò Abusalomunɛ. Gbɛ̃nↄn pla pìnↄ dà zɛ́n gↄ̃̀nↄ, ò gɛ̀ɛ gbɛ̃ke bɛa Bahurimu. Lↄ̀gↄ kú ↄnn gwe, akũ ò gɛ̃̀n. 19 Akũ bede pì nanↄ lↄ̀gↄↄ pì nɛ́ kpàalɛ à pↄ́blewɛ fã̀tɛa, gbɛ̃ke a yã dↄ̃ro. 20 Kũ Abusalomu gbɛ̃nↄ sù nↄgbɛ̃ pì bɛa ò pì: Aimaza kũ Yonatão kú mámɛɛ? À wèḿma à pì: Ò bikũ̀ swa'ↄnɛa. Ò ń wɛ́tɛ, odi ń ero, akũ ò ɛ̀ra ò tà Yurusalɛmu. 21 Kũ ò tà, akũ gbɛ̃nↄn pla pìnↄ bↄ̀tɛ lↄ̀gↄↄ pìi gũn, ò gɛ̀ɛ ò pì kína Daudanɛ: Ǹ bikũ swaa likalika, zaakũ Aitofɛli n kpakpa kũ yã vãniomɛ. 22 Dauda dà zɛ́n kũ gbɛ̃ kũ ò kú kãaonↄ ń pínki, ò bikũ̀ Yodaa. Kũ gu dↄ̀, ń gbɛ̃ke dí gↄ̃ro, ò bikũ̀ ń pínki. 23 Kũ Aitofɛli è òdi zĩ kɛ a lɛ́damma yãaro, à fùtɛ à gàarii yĩ̀ a zaakinɛ à tà a bɛ wɛ̃tɛn. À a bɛ pↄ́nↄ nàkↄ̃a, akũ à a zĩda lòko à gà, akũ ò a vĩ̀ a de mirawɛɛn.

24 Dauda gɛ̀ɛ Manaimu, akũ Abusalomu bikũ̀ Yodaa kũ Isarailanↄ ń pínki. 25 Abusalomu Amasa dìtɛ zĩ̀karinↄ gbɛ̃ zↄ̃kↄ̃ ũ Yoabu gɛ̃nɛ ũ. Amasa bi Sumaila buri Yɛta nɛ́mɛ. A dan Naasa nɛ́ Abigaili ũ, Yoabu da Zeruya dakũnamɛ. 26 Isarailanↄ kũ Abusalomuo bùraa kɛ̀ Giliada bùsun.

27 Kũ Dauda kà Manaimu, Naasa nɛ́ Sobi, Raba wɛ̃tɛ kũ à kú Amↄninↄ bùsun gbɛ̃ sù kũ Lodɛba gbɛ̃ Amiɛli nɛ́ Makio kũ Rogɛlimu kũ à kú Giliada bùsun gbɛ̃ Bazilaio. 28 Ò sù kũ wutɛbↄnↄ kũ tanↄ kũ oronↄ kũ éseo kũ nagão kũ wísitio kũ pↄ́blewɛ kpatanaao kũ bláo kũ dò pↄ́nↄ 29 kũ zↄ́o kũ vĩfãaniio kũ sã nↄ̀bↄↄo kũ gàsiio, ò kpà Daudaa kũ gbɛ̃ kũ ò kú kãaonↄ ò ble, zaakũ ò pì: Nà kũ ímio gbɛ̃ pìnↄ dɛ̀ gbárannan, ò kpàsa.