27
Dauda kunna Filisitininↄ bùsun
1 Dauda laasun lɛ̀ à pì: Solu ni ma dɛ zĩkea. Tó mádi bàa lɛ́ ma ta Filisitininↄ bùsunlo, ani bo kũmao nnaro. Tó ma bàa lɛ̀, Solu ni ma wɛtɛna tó, mani bo a ↄĩ.
2 Akũ Dauda fùtɛ à gɛ̀ɛ Gata kína Akisi, Maↄku nɛ́ kĩnaa. Gbɛ̃nↄn wàa aakↄ̃nↄ gɛ̀ɛ kãao.
3 Akũ Dauda kũ a gbɛ̃nↄ vùtɛ Gata kũ Akisio, baadi kũ a bedenↄ. Dauda kú gwe kũ a nↄnↄ gbɛ̃nↄn pla, Yɛzɛrili gbɛ̃ Ainↄama kũ Kamɛli gbɛ̃ Abigaili kũ à de Nabala nↄ ũ yão.
4 Kũ ò ò Solunɛ Dauda bàa lɛ̀ à tà Gata, adi pɛ́tɛi doro.
5 Dauda pì Akisinɛ: Tó ma n pↄnna è, ǹ ma gba zɛ́ mà vutɛ gukea n lakutunↄ doke gũn. Makũ n zↄ̀bleri má ye màgↄ̃ kú kũnwo n wɛ́ranlo.
6 Zĩ birean Akisi Zikilaga kpàa, akũ à gↄ̃̀ Yudanↄ kínanↄ pↄ́ ũ ari kũ a gbãrao.
7 Dauda kunna Filisitininↄ bùsun kà wɛ̃̀ do kũ mↄ siikↄ̃o.
8 Akũ Dauda kũ a gbɛ̃nↄ gɛ̀ɛ ò lɛ̀tɛ Gesurunↄa kũ Gizinↄ kũ Amalɛkinↄ. Gbɛ̃ pìnↄn kú bùsuu pìn zaa zĩmɛ bona zaa Suru ari à gɛ̀ɛ pɛ́ Misilaa.
9 Tó Dauda zĩ̀i blè bùsuu pì lakutunↄa, àdi gↄ̃gbɛ̃ ke nↄgbɛ̃ ke tó bɛ̃nɛro, sãnↄ kũ zùnↄ kũ zaakinↄ kũ lakuminↄ kũ pↄ́kasanↄ àdi nakↄ̃a. Tó à tà, àdi gɛ́ Akisi kĩnaa.
10 Tó Akisi a là gu kũ à lɛ̀tɛn gbɛ̃nↄa gbãra, Dauda dì pinɛ a gɛ Nɛgɛvi bùsun, Yudanↄ ke Yeramɛɛli burinↄ ke Keninↄ kĩnaamɛ.
11 Dauda dì gↄ̃gbɛ̃ ke nↄgbɛ̃ ke tó bɛ̃nɛ ò su kãao Gataro, zaakũ àtɛn pi: Gbɛ̃ke ni ó kↄrↄmↄtↄↄ kɛ à pi dera ma kɛ̀ nàn dí. Lɛn àdigↄ̃ kɛ lɛ gↄrↄ kũ à kú Filisitininↄ bùsun.
12 Akisi Dauda náani kɛ̀ à pì a zĩdanɛ: Isarailanↄn ye a kãiro. Anigↄ̃ de ma zↄ̀bleri ũmɛ gↄrↄ sĩnda pínki.