11
Solu zĩ̀blena Amↄninↄa
1 Amↄni buri Naasa sù kũ a zĩ̀karinↄ, ò bùraa kàtɛ Yabɛsi Giliada sarɛ, akũ Yabɛsidenↄ pì Naasanɛ: Ǹ lɛ́dokↄ̃nↄ kɛ kũoo, óni mì natɛnnɛ.
2 Akũ Naasa pìńnɛ: Tó ma á baadi ↄpla wɛ́ bↄ̀bↄ, akũ wé'i Isarailanↄ kũ̀ ń pínki, gbasa mà lɛ́dokↄ̃nↄ kɛ kãáo.
3 Akũ Yabɛsi gbɛ̃ zↄ̃kↄ̃nↄ pìnɛ: Ǹ ó gba gↄrↄ suppla de ò gbɛ̃nↄ zĩ Isarailanↄ bùsuu gũn pínki. Tó gbɛ̃ke kun à ó sura baro, óni ó zĩda kpámma.
4 Kũ zĩ̀rii pìnↄ kà Solu bɛa Gibɛa, ò yã pìi òńnɛ, akũ ò wɛ̃nda ↄ́ↄ dↄ̀.
5 Gↄrↄ birea Solu tɛn su kũ burao, à tɛ́ a zùnↄi, akũ à pì: Bↄ́ yã mɛ́ à sù, akũ òtɛn ↄ́ↄ dↄↄ? Akũ ò Yabɛside pìnↄ yã bàbanɛ.
6 Kũ Solu yã pìi mà, Luda Nini sùa, akũ a pↄ fɛ̃̀ manamana.
7 À zùu sɛ̀ mɛ̀n pla à dɛ̀ à zↄ̃̀zↄ̃kↄ̃rɛ, akũ à gbɛ̃nↄ zĩ̀o Isarailanↄ bùsuu gũn pínki ò pì: Lɛn oni kɛ gbɛ̃ kũ adi tɛ́ Solui kũ Samuɛlioro zùnↄnɛ lɛ. Akũ vĩna ń kũ Dikiri yã musu, ò bò ò tɛ̀ńyĩ lɛɛlɛ ń pínki.
8 Solu ń náro zaa Bɛzɛki. Isarailanↄ kà gbɛ̃nↄn dúbu wàa do kpɛ́ basↄↄro. Yudanↄn kú ń tɛ́ gbɛ̃nↄn dúbu baraakuri.
9 Akũ ò pì zĩ̀ri kũ ò sùu pìnↄnɛ: À gɛ́ à o á gbɛ̃nↄnɛ, zia ari ifãntɛ̃ gↄ̃ gɛ́ gbã, óni ń sura ba. Kũ zĩ̀rinↄ tà, ò yã pì baaruu kpà Yabɛsidenↄnɛ, akũ ń pↄ kɛ̀ nna.
10 Ò pì Amↄninↄnɛ: Óni ó zĩda kpááwa zia, áni á pↄyeina kɛwá.
11 Solu a gbɛ̃nↄ kpàatɛ gã̀ aakↄ̃. Gudↄon ò sì Amↄninↄgu ń bùran ò ń dɛdɛ ari ifãntɛ̃ gɛ̀ɛ à gbã̀o. Akũ gbɛ̃ kũ ò gↄ̃̀nↄ fã̀kↄ̃a dodo.
12 Akũ ò pì Samuɛlinɛ: Dínↄ mɛ́ ò pì Solu ni kí blewároo? À bↄtɛ kũńwo ò ń dɛdɛ.
13 Akũ Solu pì: Oni gbɛ̃ke dɛ gbãraro, zaakũ Dikiri Isarailanↄ sura bà gbãramɛ.
14 Akũ Samuɛli pì parinɛ: À mↄ́ ò gɛ́ Giligala ò ɛra ò Solu ká kpatan gwe dↄ.
15 Akũ ò gɛ̀ɛ Giligala ń pínki, ò ɛ̀ra ò Solu kà kpatan Dikiri arɛ gwe dↄ, ò kɛnnakũkↄ̃o sa ò Dikiria, akũ Solu kũ Isarailanↄ pↄnna kɛ̀ gwe ń pínki manamana.