72
Aduakɛna kínanɛ
Sulemanu lɛ̀ɛ.
1 Luda, ǹ dada kínanɛ à yãkpatɛ kɛ kũ yãpurao,
ǹ tó kína yã mana kɛ lákũ ndì kɛ nà,
2 de à do n gbɛ̃nↄnɛ arɛ a zɛ́a,
à yã gↄ̃gↄ̃ talakanↄnɛ súsu,
3 gbasa kpinↄ ni su gbɛ̃nↄnɛ kũ aafiaao,
sĩ̀sĩnↄ ni tó ògↄ̃ kú nnamanaa gũn.
4 Kína ni tó yã bo kũ talakanↄ nna,
ani takaside nɛ́nↄ sura ba,
ani gbãnamↄnnɛrinↄ dúgu zↄ̃.
5 Anigↄ̃ kun lákũ ifãntɛ̃ dìgↄ̃ kun nà,
lán mↄvura dìgↄ̃ kun nà wɛ̃̀ kũ wɛ̃̀ɛo.
6 Anigↄ̃ de lán kabura legũ bà,
lán mↄtↄ kũ àdi pisi zĩtɛaa bà.
7 Gbɛ̃ mananↄ ni ↄ tá a gↄrↄa,
nnamana nigↄ̃ zↄ̃kↄ̃ ari mↄ súngↄ̃ kun doro.
8 Ani kí ble zaa ísira bara la kũ bara direo,
sɛna zaa Yuflati ari gɛna andunia lɛ́a.
9 Buri kũ ò kú gbáranna gũnnↄ ni su ò kútɛnɛ,
a ibɛrɛnↄ ni wútɛ kũ kùaao a arɛ.
10 Tasisi kína kũ ísira bara kínanↄ ni táfe bonɛ,
Seba kũ Sɛba kínanↄ ni su ò gba danɛ.
11 Kínanↄ ni su ò kútɛ a arɛ ń pínki,
buri sĩnda pínki ni donyĩ.
12 Zaakũ ani wɛ̃ndade kũ ń wiki dↄnↄ bomɛ,
ani takaside kũ ò kpanyĩri vĩronↄ sura ba.
13 Ani gbãnasaridenↄ wɛ̃nda gwa,
ani takasidenↄ bo ga lɛ́i.
14 Ani ń bo gbãnamↄnnɛrinↄ kũ gbɛ̃ pãsĩnↄ ↄĩ,
zaakũ à ye ń arukↄtɛnaairo.
15 Luda kína dↄ̃ kũ aafiaao!
Ògↄ̃ a gba Seba bùsu wuraa,
ògↄ̃ wɛ́ kɛnɛ Ludaa lakanaa sari,
ògↄ̃ sa mana onɛ gↄrↄ sĩnda pínki.
16 Ǹ tó burapↄnↄ kɛ a bùsun manamana,
a lánↄ gↄ̃ da sĩ̀sĩnↄ musu síi,
ò nɛ́ i ò pia lán Lɛbana lákpɛ bà,
ò gbã lán kàsapli bà sɛ̃̀ntɛ.
17 Ǹ tó a tↄ́ gↄ̃ kun gↄrↄ sĩnda pínki
lán ifãntɛ̃ bà,
buri sĩnda pínki ni arubarika le a gãi,
oni a tↄ́ nna sí.
18 Arubarikaden Dikiri Luda, Isarailanↄ Luda!
Àkũ mɛ́ àdi yãbonsarɛnↄ kɛ ado.
19 Ògↄ̃ a tↄ́ gakuride bo gↄrↄ sĩnda pínki!
À tó a gakuri da anduniala pínki!
Aami! Aami!
20 Yɛsɛ nɛ́ Dauda aduakɛna lɛ́n gwe.
TAKADA AAKƆ̃DE
Zabura 73-89