57
Wikilɛna Luda Musudei
Lɛ̀ kũ Dauda dà gↄrↄ kũ à bàa lɛ̀ Solunɛ à ùtɛ gbɛ̀wɛɛn.
1 Ǹ ma wɛ̃nda gwa Luda, ǹ ma wɛ̃nda gwa,
zaakũ mↄkↄ̃mmɛ ma nanyĩ.
Ǹ ma sↄtↄ n orun ari ma bo ga lɛ́i.
2 Matɛn wiki lɛ́ Luda Musudei,
Luda kũ àdi yã kũ à ò papamɛnɛ pìi.
3 Ani tó kpányĩ bo zaa musu à ma sura ba,
ani wé'i da gbɛ̃ kũ òtɛn pɛ́manↄa,
ani a gbɛ̃kɛ kũ a náaniyão kɛmɛnɛ.
4 Má kú músunↄ tɛ́,
ma gↄ̃ wutɛna nↄ̀bↄ pãsĩnↄ dagura.
Gbɛ̃ pìnↄ nɛ́nɛ nna lán fɛ̃nɛda bà,
ń saka bi sárimɛ kũ kàao.
5 Luda, ǹ n zĩda tↄ́ sɛ́ lei ari musumusu,
ǹ tó n gakuri da anduniala pínki.
6 Ò tankutɛ kpàkpamɛnɛ ma zɛ́n,
akũ ma gↄ̃ wari gũn,
ò wɛ̀ɛɛ yↄ̃̀ ma arɛ, akũ ò zù wɛ̀ɛɛ pìn.
7 Ma laakari kpatɛna Luda, ma laakari kpatɛna,
mani lɛ̀ sí mà n táaki lɛ́.
8 Ǹ vu, ma swɛ̃̀!
Ma mↄrↄ kũ ma gidigboo kú máa?
Mani gudↄ pá mìio.
9 Dikiri, mani n sáabu kpá burinↄ tɛ́,
mani n táaki lɛ́ gbɛ̃nↄnɛ.
10 Zaakũ n gbɛ̃kɛ zↄ̃kↄ̃ↄ kà n kĩnaa,
n náani ludambɛ luku lè.
11 Luda, ǹ n zĩda tↄ́ sɛ́ lei ari músumusu,
ǹ tó n gakuri da anduniala pínki.