24
1 Kũ Balamu è sa mana ona Isarailanↄnɛ kà Dikirigu, adi gɛ́ màso kɛ lán yã bà doro, akũ à arɛ dↄ̀ gbárannaa.
2 Kũ à wɛ́ zù, akũ à Isarailanↄ è katɛna ń buria. Luda Nini kìpaa,
3 akũ à yã kũ à èe ò à pì:
Bɛↄ nɛ́ Balamu yãn dí,
makũ kũ ma wɛ́ kɛ̃na yãn dí.
4 Makũ kũ madì Luda yã ma yãn dí.
Ma Gbãnasĩndapinkide wɛ́gupu è,
ma wutɛ nɛ̀sɛlɛ kutɛna, ma wɛ́ wɛ̃na.
5 Yakubu burinↄ bùrakatɛna mana fá!
Isaraila bizakutanↄn mana!
6 Ò katɛna lán guvutɛ dàkonↄ bà,
lán swa dↄ̀rↄ kara búnↄ bà.
Ò de lán zà lí kũ Dikiri bànↄ bà,
lán sida lí kũ ò kú í sarɛnↄ bà.
7 Í ni ń orozãnↄ pa yɛ́rɛrɛ,
ń pↄ́tↄ̃nanↄ ni í le manamana.
Ń kína gbãna nigↄ̃ de Agaga pↄ́la,
ń kpata ni tↄ́ bo.
8 Luda ń bↄ́tɛ Misila,
ò gbãna vĩ lán zùsɛ̃ntɛ bà.
Òdi zĩ̀ ble buri kũ ò ibɛrɛɛ kpà kũńwonↄa,
òdi ń wánↄ wíwi òdi ń pápa kũ kàao.
9 Òdi sↄ̃pɛtɛ ò wútɛ lán músuu bà,
dí mɛ́ ani fↄ̃ à ń futɛɛ?
Luda arubarika da gbɛ̃ kũ oni sa mana ońnɛnↄgu,
à gbɛ̃ kũ oni sa vãni ońnɛnↄ ká.
10 Balaki pↄ fɛ̃̀ Balamui à ↄnɛ dↄ̀a à pì: Ma ibɛrɛnↄ kana yãin ma n sisi, akũ n sa mana òńnɛ gɛ̃̀n aakↄ̃ yá?
11 Ǹ tá n bɛa gↄ̃̀nↄ. Ma pì mani gba kɛnnɛmɛ yã, akũsↄ̃ Dikiri gìnnɛ ǹ láada le.
12 Balamu pìnɛ: Mádi o gbɛ̃ kũ n ń zĩmanↄnɛroo!
13 Ma pì bee tó n ma gba n bɛ kũ à pana kũ andurufuuo kũ wuraao, mani bo Dikiri yã kpɛ mà yã kɛ kũ ma zĩda pↄyeinaaoro, a mana ke a vãni. Yã kũ Dikiri pì mà on mani o.
14 Matɛn tá ma gbɛ̃nↄ kĩnaa sà. Ǹ mↄ́ mà onnɛ lákũ gbɛ̃ pìnↄ ni kɛ n gbɛ̃nↄnɛ nà zia.
Balamu yã siikↄ̃de kũ à è onaa
15 Akũ Balamu yã kũ à èe ò à pì:
Bɛↄ nɛ́ Balamu yãn dí,
makũ kũ ma wɛ́ kɛ̃na yãn dí.
16 Makũ kũ madì Luda yã ma yãn dí.
Má Luda Musude nɛ̀sɛgũnyã dↄ̃.
Ma Gbãnasĩndapinkide wɛ́gupu è,
ma wutɛ nɛ̀sɛlɛ kutɛna, ma wɛ́ wɛ̃na.
17 Matɛn Isarailanↄ e, adi kɛ teranlo,
matɛni ń gwa, a gↄrↄ dí ká gĩaro.
Susunɛ ni bo Yakubu burinↄ tɛ́,
kpatableri ni bo Isarailanↄ tɛ́,
ani Mↄabunↄ mì wíwi,
ani zukakari pìnↄ mìtoko fↄ̃fↄ̃.
18 Ɛdↄmu bùsu ni gↄ̃ a pↄ́ ũ,
a ibɛrɛ Sei bùsu ni gↄ̃ a pↄ́ ũ,
Isarailanↄ gbãna nigↄ̃ karamɛ.
19 Yakubu buri ke ni kí bleḿma,
ani gbɛ̃ kpara kũ ò gↄ̃̀nↄ kakatɛ.
20 Balamu Amalɛki burinↄ è, akũ à yã kũ à èe ò à pì:
Amalɛki burinↄ bi burinↄ mìdemɛ,
ama oni kakatɛ zã.
21 Kũ Balamu Keninↄ è, akũ à yã kũ à èe ò à pì:
Á kúki gbãna gíngin,
á sà kú gbɛ̀ musu.
22 Bee kũ abireo oni á kakatɛmɛ,
Asirianↄ ni á kũkũ zĩ̀zↄnↄ ũ.
23 Balamu yã kũ à èe ò dↄ à pì:
O'o, tó Luda kɛ̀ lɛ, dí mɛ́ ani boo?
24 Gó'itɛnↄ ni bo Sipiru bùsun,
oni zĩ̀ ble Asirianↄ kũ Eberunↄa,
ama mↄ́kↄ̃nↄ ni kakatɛmɛ se.
25 Balamu fùtɛ à tà a bɛa, akũ Balaki dà zɛ́n se.