22
Mↄabunↄ kína Balaki Balamu sísinaa
1 Isarailanↄ dà zɛ́n, akũ ò bùraa kàtɛ Mↄabunↄ bùsu sɛ̃̀n Yoda bara dire kũ à arɛ dↄ Yɛrikoa.
2 Zipo nɛ́ Balaki Mↄabunↄ kína è lákũ Isarailanↄ kɛ̀ Amↄrinↄnɛ nà,
3 akũ swɛ̃̀ɛ kɛ̃̀ Mↄabunↄgu, vĩna ń kũ Isarailanↄ dasikɛ yãi.
4 Akũ Mↄabunↄ pì Midiã gbɛ̃ zↄ̃kↄ̃nↄnɛ: Pari díkĩna ni pↄ́ kũ à likawáinↄ ble pínki lán zùu dì sɛ̃̀ só nà.
5 Akũ Balaki gbɛ̃nↄ zĩ̀ Bɛↄ nɛ́ Balamua ari Peto, Yuflati sarɛ a bɛ bùsun. À pìńnɛ ò a sísi à su, ò pinɛ: Gbɛ̃ kenↄ bò Misila ò dàgula ò kátɛ ma sarɛ.
6 N yã nna! Ǹ mↄ́ ǹ lɛ́ kɛńnɛmɛnɛ, zaakũ ń gbãna demala. Òdigↄ̃ dↄ̃ro ke mani le mà zĩ̀ bleḿma mà pɛ́ḿma bùsu dín gwɛɛ. Má dↄ̃ kũ gbɛ̃ kũ n sa mana ònɛ nigↄ̃ de arubarikade ũmɛ. Gbɛ̃ kũ n sa vãni ònɛ sↄ̃, anigↄ̃ de láaribona pↄ́ ũmɛ.
7 Mↄabu kũ Midiã gbɛ̃ zↄ̃kↄ̃nↄ dà zɛ́n, ò màsokɛna gba kũ oni da Balamunɛ kũna. Kũ ò kà a kĩnaa, ò yã kũ Balaki ń zĩoo ònɛ.
8 À pìńnɛ: À i la, mani yã kũ Dikiri ni omɛnɛ oárɛ. Akũ Mↄabu kínanɛ pìnↄ ì Balamu bɛa.
9 Akũ Luda bò à sù Balamua à a là à pì: Dínↄn gbɛ̃ kũ ò kú kũnwo díkĩnanↄ ũu?
10 À wèa à pì: Zipo nɛ́ Balaki, Mↄabunↄ kína mɛ́ à ń zĩma. Ò pì
11 gbɛ̃ kenↄ bò Misila ò dàgula. Akũ à pì mà su mà lɛ́ kɛńnɛarɛ de à le à zĩ̀ bleḿma à pɛ́ḿma.
12 Akũ Luda pìnɛ: Ǹsun tɛ́ńyĩro. Ǹsun sa vãni ońnɛro, zaakũ ma arubarikaa dàńgu kↄ̀.
13 Kũ Balamu fùtɛ kↄnkↄ, à pì Balaki kínanɛnↄnɛ: À tá á bùsun, zaakũ Dikiri gì mà tɛ́ái.
14 Akũ Mↄabu kínanɛ pìnↄ fùtɛ ò tà Balaki kĩnaa ò pì: Balamu gì su kũooi.
15 Balaki ɛ̀ra à kínanɛ pãndenↄ zĩ̀ dↄ, ń dasi kũ ń gakurio de gbɛ̃ káakunↄ pↄ́la.
16 Kũ ò kà Balamu kĩnaa, ò pì: Zipo nɛ́ Balaki pì ǹsun tó pↄ́ke kpánnɛ kũ suna a kĩnaaoro,
17 zaakũ áni gba kɛnnɛ manamana. Pↄ́ kũ n òarɛ pínki, áni kɛ. N yã nna! Ǹ mↄ́ ǹ lɛ̀ kɛarɛ gbɛ̃ pìnↄa.
18 Akũ Balamu pì Balaki zĩ̀rii pìnↄnɛ: Bee tó Balaki andurufu kũ wura kũ à kú a bɛaoo kpàma pínki, mani fↄ̃ mà bo Dikiri ma Luda yã kpɛro, bee fíti.
19 À i la gwãaniala lákũ gbɛ̃ káakunↄ kɛ̀ nà ari mà ma dↄ yã kũ Dikiri ni karamɛnɛ.
20 Luda bò à sùa gwãani à pìnɛ: Zaakũ gbɛ̃ díkĩnanↄ sù n sísi, ǹ futɛ ǹ gɛ́ kũńwo, ama yã kũ mani on ǹ kɛ.
Balamu zaaki yã'onaa
21 Balamu fùtɛ kↄnkↄ à gàarii yĩ̀ a zaakinɛ, akũ à gɛ̀ɛ kũ Mↄabu kínanɛ pìnↄo.
22 Luda pↄ fɛ̃̀ kũ à gɛ̀ɛ yãi, akũ Dikiri Malaikaa gɛ̀ɛ à zɛ̀ à zɛ́ zↄ̃̀nɛ. Balamu di a zaaki kpɛ, a zĩkɛri gbɛ̃nↄn planↄn tɛ́ kãao.
23 Kũ zaaki pìi è Dikiri Malaika zɛna zɛ́ gũn à fɛ̃nɛda wòto à kũna, akũ à lìtɛ sɛ̃̀n. Balamu a lɛ̀, akũ à ɛ̀ra à dà zɛ́n.
24 Dikiri Malaikaa gɛ̀ɛ à zɛ̀ zɛ́ tererennan geepi líkpɛ kũ gbɛ̀ karaa likainↄ dagura.
25 Kũ zaaki pì Dikiri Malaikaa è, à nà gbĩ̀ia à Balamu gbá lↄ̀a. Akũ Balamu ɛ̀ra à a lɛ̀ dↄ.
26 Dikiri Malaikaa ɛ̀ra à gɛ̀ɛ arɛ dↄ à zɛ̀ gu kpakoto kũ à litɛki vĩron.
27 Kũ zaaki pì Dikiri Malaikaa pìi è, à kùtɛ kũ Balamuo. Akũ Balamu pↄ fɛ̃̀ à a lɛ̀ kũ gòoo.
28 Akũ Dikiri zaaki pìi gbà lɛ́ à yã ò Balamunɛ à pì: Bↄ́n ma kɛ̀nnɛ n ma lɛ ari gɛ̃̀n aakↄ̃ↄ?
29 Balamu wèa à pì: Kũ n yↄ̃nkↄyã kɛ̀mɛnɛ yãimɛ. Tó má fɛ̃nɛ kũna, de ma n dɛ gↄ̃̀nↄ.
30 Akũ zaaki pìi pìnɛ: N zaaki kũ ndìgↄ̃ dia gↄrↄ sĩnda pínkia ari suna gbãramɛ ma ũroo? Ma kɛ̀nnɛ lɛ yã yá? À pì: Oi.
31 Akũ Dikiri Balamu wɛ́ kɛ̃̀nɛ, à a Malaikaa è zɛna zɛ́n à fɛ̃nɛda wòto à kũna. Akũ à kùtɛ à mìi pɛ̀tɛ.
32 Dikiri Malaika a là à pì: Bↄ́yãin n n zaaki lɛ̀ ari gɛ̃̀n aakↄ̃ↄ? Ma su zɛ́ zↄ̃nnɛmɛ, zaakũ n wãmɛnɛ.
33 Kũ zaaki pì ma e, akũ à lìtɛmɛnɛ ari gɛ̃̀n aakↄ̃. Tó adi litɛmɛnɛ yãro, de ma n dɛ ma a tò.
34 Balamu pì Dikiri Malaikaa pìinɛ: Ma durunna kɛ̀, zaakũ má dↄ̃ kũ n zɛ́ zↄ̃̀mɛnɛro. Zaakũ ma gɛnaa kɛ̀nnɛ ĩni, mani ɛra mà tá.
35 Akũ Dikiri Malaikaa pì Balamunɛ: Ǹ gɛ́ kũ gbɛ̃ pìnↄ, yã kũ mani dannɛn ǹ o. Akũ Balamu gɛ̀ɛ kũ Balaki kínanɛ pìnↄo.
36 Kũ Balaki mà Balamu tɛn su, akũ à gɛ̀ɛ à dàalɛ wɛ̃tɛ kũ à kú Anↄ bara, Mↄabunↄ bùsu lɛ́zɛkin.
37 Akũ à pì Balamunɛ: Kũ ma gbɛ̃nↄ zĩ̀ ò n sísi yã, à kɛ̀ dera ńdi suroo? Mani fↄ̃ mà gba kɛnnɛnloo?
38 Balamu wèa à pì: Ma su sà, ama má yã sĩnda pínki ona zɛ́ vĩro. Yã kũ Luda ni damɛnɛn mani o.
39 Akũ Balaki gɛ̀ɛ kũ Balamuo Kiria'uzo.
40 À sa ò kũ zùnↄ kũ sãnↄ à a nↄ̀bↄↄ kpà Balamua kũ kínanɛ kũ ò kú kãao lɛɛlɛnↄ.
41 Kũ gu dↄ̀, à Balamu sɛ̀ à gɛ̀ɛ kãao Bamↄbaali. Gwen Balamu Isarailanↄ bùra kpado èn.