11
Dikiri tɛ́ futɛnaa
1 Isarailanↄ zuka kà Dikirii ń warikɛna yãi. Kũ Dikiri mà, à pↄ fɛ̃̀, akũ a tɛ́ fùtɛ ń tɛ́, ń bùra kpado tɛ́ kũ̀.
2 Akũ gbɛ̃nↄ wiki lɛ̀ Musaa. Kũ à wɛ́ kɛ̀ Dikiria, akũ tɛ́ pìi zɛ̀.
3 Akũ ò tↄ́ kpà gu pìinɛ Tabera, kũ Dikiri tɛ́ fùtɛ ń tɛ́ gwe yãi.
Dikiri kpɛkpɛrɛwinↄ gbarɛnaa
4 Buri pãndenↄn kú Isarailanↄ tɛ́, òtɛn pↄ́ble pãnde ni dɛ, akũ Isarailanↄn tɛn ↄ́ↄ dↄ se ò pì: Mán óni nↄ̀bↄ len ò sóo?
5 Ótɛn kpↄ̀ kũ o sò Misila ó pↄyeinaaa bɛgɛ kɛ kũ plɛ̃̀nↄ kũ gbɛzɛnↄ kũ ɛfↄnↄ kũ arubasanↄ kũ arubasa gizonↄo.
6 Tera sà ó lɛ́ gà, zaakũ odì pↄ́ke lero, séde mana dí baasiro.
7 Manaa pì wɛ́ kete, à de lán lí'ↄ bàmɛ.
8 Isarailanↄ dì sɛ́tɛ ò lↄ́ gbɛ̀n ke òdi zↄ̃ gón. Òdi disa ò kàra kɛo. A nna lán kàra asãnaa bà.
9 Tó plí kpà bùran gwãani, akũ manaa pìi dì kↄ́tɛ se.
10 Musa mà òtɛn ↄ́ↄ dↄ ↄnlɛ kũ ↄnlɛo. Dikiri pↄ fɛ̃̀ manamana, akũ à kɛ̀ Musanɛ ĩni
11 à pìnɛ: Bↄ́yãin ntɛn wɛ́ tãmaii? Ma yã kpate mɛ́ à kɛ̀nnɛ vãni, akũ n gbɛ̃ pìnↄ gwana aso dìmɛnɛɛ?
12 Makũ mɛ́ ma gbɛ̃ pìnↄ nↄ̀ↄ sì yá? Makũ mɛ́ ma ń í yá? Bↄ́yãi n pìmɛnɛ mà ń kú kpɛ lán nɛ́rande bà mà gɛ́ kũńwo bùsu kũ n la dà ń dizinↄnɛnn?
13 Mákpan mani nↄ̀bↄ len mà kpá gbɛ̃ pìnↄa ń pínkii? Zaakũ òtɛn ↄ́ↄ dↄmɛnɛ òtɛn pi mà ń gba nↄ̀bↄↄ ò só.
14 Mani fↄ̃ mà gbɛ̃ pìnↄ aso sɛ́ ń pínki madoro, zaakũ ń aso demala.
15 Tó lɛn ĩni kɛmɛnɛ lɛ, ǹ tó ma n pↄnna le ǹ ma dɛ gↄ̃̀nↄ. Ǹsun tó mà wari pì kɛ doro.
16 Akũ Dikiri pìnɛ: Ǹ Isaraila gbɛ̃ zↄ̃kↄ̃ kũ ń ń dↄ̃ don'arɛde ũnↄ kakara gbɛ̃nↄn baaakↄ̃ akuri ǹ su kũńwo dakarɛki kuta kia ògↄ̃ kú kũnwo gwe.
17 Mani kipa mà yã onnɛ gwe mà a Nini kũ à kúmma kpado go mà dińnɛ, oni gbɛ̃nↄ gwana aso sɛ́ kũnwo de ǹsungↄ̃ ń sɛna ndo doro yãi.
18 Ǹ o gbɛ̃nↄnɛ ò gbã̀ bo ń zĩdanɛ zia yãi, oni nↄ̀bↄ le ò só. Zaakũ ò ↄ́ↄ dↄ̀mɛnɛ ò pì, mán óni nↄ̀bↄ len la ò sóo? Ò pì ò sã̀na Misila. Abire yãin mani ń gba nↄ̀bↄ ò só.
19 Oni só adi kɛ gↄrↄ donlo, gↄrↄ planlo, gↄrↄ sↄↄronlo, gↄrↄ kurinlo, gↄrↄ baronlo.
20 Oni só mↄ do gbãngbãn ari à bo ń yĩn a ni bo ń pↄn. Zaakũ makũ Dikiri má kú ń tɛ́, akũ ò pã kpàmai. Ò zuka dↄ̀ma ò pì, bↄ́yãi ò bò Misilai?
21 Akũ Musa pì: Gↄ̃gbɛ̃nↄn kú kũmao tá gũn gbɛ̃nↄn dúbu wàa aakↄ̃, akũ n pì ĩni nↄ̀bↄ kpáḿma ò só ari mↄ do gbãngbãn yá?
22 Bee tó ò sãnↄ kũ zùnↄ dɛ̀dɛ dasidasi, ani mↄ́ḿma yá? Tó ò ísira kpↄ̀nↄ sɛ̀tɛ pínki, ani mↄ́ḿma yá?
23 Dikiri wèa à pì: Ma gbãna ni kánloo? Ĩni e tera, tó yã kũ ma ònnɛ ni kɛ ke ani kɛro.
24 Musa bò à Dikiri yã pìnↄ òńnɛ. À Isaraila gbɛ̃ zↄ̃kↄ̃nↄ kàkara gbɛ̃nↄn baaakↄ̃ akuri à ń zɛ́ ò lìka kuta pìii.
25 Akũ Dikiri kìpa tɛ́luku gũn à yã ò kãao. À a Nini kũ à kúa kpado gò à dì gbɛ̃ zↄ̃kↄ̃ gbɛ̃nↄn baaakↄ̃ akurii pìnↄnɛ. Kũ à a Nini pìi dìńnɛ lɛ, ò annabikɛyã ò, abire gbɛra odi ɛra ò kɛ̀ doro.
26 Gbɛ̃ kũ Musa ń sɛ́ gbɛ̃nↄn planↄ gↄ̃̀ bùran, gbɛ̃ do tↄ́n Ɛlɛdada, gbɛ̃ do sↄ̃ Mɛdada. Odi gɛ́ kuta kĩnaaro, ama Nini pìi sùḿma se, akũ ò annabikɛyã ò bùran.
27 Kɛfɛnna ke bàa lɛ̀ à gɛ̀ɛ à pì Musanɛ: Ɛlɛdada kũ Mɛdadao tɛn annabikɛyã o bùran.
28 Nuni nɛ́ Yↄsuamɛ Musa kpàasi ũ zaa a kɛfɛnnakɛgↄrↄa, akũ à pì: Baa Musa, ǹ gíńnɛ.
29 Akũ Musa pìnɛ: Ntɛn nɛ̀sɛgↄ̃ba kɛ kũńwo ma yã musun yá? Tó Dikiri a Nini dì a gbɛ̃nↄnɛ ò gↄ̃̀ annabinↄ ũ ń pínki, à manaroo?
30 Akũ Musa ɛ̀ra bùran kũ Isarailanↄ gbɛ̃ zↄ̃kↄ̃ↄ pìnↄo.
31 Dikiri tò ĩa bò ísira kpa à sù kũ kpɛkpɛrɛwinↄ, ò dà bùrala. Ò lìka bùraai gu sĩnda pínki à kà tágↄrↄ do ũ, akũsↄ̃ ń vurana lei kà gã̀sãkuru pla.
32 Fãnantɛ̃ birea kũ gwãanio kũ a gu làa dↄnaao ò fùtɛ ò gɛ̀ɛ ò kpɛkpɛrɛwinↄ kũ̀kũ. Gbɛ̃ kũ adi kũkũ dasiro kũ̀kũ bùruma baro. Akũ ò fã̀tɛ à kori kɛ̀.
33 Kũ ò a nↄ̀bↄↄ dà ń lɛ́n gↄ̃̀nↄ, odi le ò só dasiro, akũ Dikiri pↄ fɛ̃̀ńyĩ à gagagyã kàńgu.
34 Akũ ò tↄ́ kpà gu pìinɛ Lɛ́'idenↄ Mira, zaakũ gwen ò gbɛ̃ kũ nↄ̀bↄ lɛ́'i ń kũnↄ vĩ̀n.
35 Akũ Isarailanↄ fùtɛ gwe ò gɛ̀ɛ Azero ò gↄrↄ pla kɛ̀ gwe.