4
Yesu yↄ̃ogwanaa
(Maa 1:12-13, Luk 4:1-13)
1 Akũ Luda Nini gɛ̀ɛ kũ Yesuo gbárannan de Ibilisi a yↄ̃ à gwa.
2 Yesu lɛ́ yĩ̀ fãnantɛ̃ kũ gwãanio ari gↄrↄ bupla. Kũ nà tɛni a dɛ,
3 akũ gbɛ̃kɛkɛrii pìi nài à pì: Tó Luda Nɛ́mɛ n ũ, ǹ pi gbɛ̀ dínↄ li burodi ũ.
4 Yesu wèa à pì: À kú Luda yãn ò pì:
Pↄ́blen bisãsiri nigↄ̃ kúo adoro,
sé yã kũ Luda tɛn o pínki.
5 Akũ Ibilisi a sɛ̀ à gɛ̀ɛo Luda wɛ̃tɛn, à a zɛ̀ Luda kpɛ́ mìsↄ̃ntɛa
6 à pì: Tó Luda Nɛ́mɛ n ũ, ǹ ↄ gbarɛ n zĩdai la, zaakũ à kɛ̃na Luda yãn ò pì:
Ani n yã o a malaikanↄnɛ.
Oni n sɛ́ ń ↄĩ de ǹsun gɛ̃̀ sí gbɛ̀ɛaro yãi.
7 Yesu wèa à pì: Ò kɛ̃̀ dↄ ò pì,
ǹsun Dikiri n Luda lɛ́ ǹ gwaro.
8 Akũ Ibilisi a sɛ̀ à gɛ̀ɛo dↄ kpi lei manamana musu, à andunia kpatanↄ mↄ̀nɛ pínki kũ ń aruzɛkɛnↄ
9 à pì: Mani n gba adinↄ pínki, tó n kutɛ n donyĩ kɛmɛnɛ.
10 Akũ Yesu pìnɛ: Ǹ gomala Setan! Zaakũ ò kɛ̃̀ Luda yãn ò pì:
Ǹ donyĩ kɛ Dikiri n Ludanɛ
ǹgↄ̃ doi ado.
11 Akũ Ibilisi a tò gwe sà, akũ malaikanↄ sù ò kpài.
Yesu nana a zĩa zaa Galili
(Maa 1:14-15, Luk 4:14-15)
12 Kũ Yesu mà ò Yahaya kũ̀ ò dà kpɛ́siran, akũ à tà Galili.
13 Adi vutɛ Nazɛra doro, à gɛ̀ɛ à vùtɛ sɛ̀bɛɛ sarɛ Kapɛnamu, Zɛbuluni burinↄ kũ Nafatali burinↄ bùsun,
14 de yã kũ annabi Isaya ò kɛ yãi à pì:
15 Zɛbuluni burinↄ kũ Nafatali burinↄ bùsu,
zaa ísira kpa ari Yoda bara,
Galili bùsu kũ buri pãndenↄ kun pìi,
16 ń gbɛ̃ kũ ò kú gusira gũnnↄ gupura zↄ̃kↄ̃ↄ è,
gu dↄ̀ bùsu kũ à kú ga lɛ́i pì denↄnɛ sà.
17 Zaa gↄrↄ kũ̀a Yesu nà waazikɛnaaa à pì: À nɛ̀sɛ litɛ, kpata kũ à bò Luda kĩnaa kà kãni.
Yesu ìba káakunↄ sisinaa
(Maa 1:16-20, Luk 5:1-11)
18 Kũ Yesu tɛn do Galili sɛ̀bɛɛi, à gbɛ̃nↄn planↄ è, vĩ̀ni kũ dakũnao, Simↄ kũ òdi pi Pita kũ a dakũna Anduruo. Òtɛn táaru kpá sɛ̀bɛɛ pìn, zaakũ sↄrↄkↄnↄmɛ.
19 Akũ Yesu pìńnɛ: À mↄ́ à tɛ́mai, mani á kɛ gbɛ̃wɛtɛrinↄ ũ.
20 Zaa gwe gↄ̃̀nↄ ò ń táarunↄ tòn, ò bò ò tɛ̀i.
21 Kũ à gɛ̀ɛ arɛ, à gbɛ̃nↄn pla pãndenↄ è, vĩ̀ni kũ dakũnao dↄ, Zebedi nɛ́ Yamisi kũ a dakũna Yuhanao. Ò kú gó'itɛ gũn kũ ń de Zebedio, òtɛni ń táarunↄ kɛkɛ. Yesu ń sísi,
22 akũ ò ń de tò gó gũn gwe gↄ̃̀nↄ, ò bò ò tɛ̀i.
Yesu yãdannɛnaa
(Luk 6:17-19)
23 Yesu dìgↄ̃ kure Galili bùsun, àdi yã dańnɛ ń aduakɛkpɛnↄ gũn, àdi kpata kũ à bò Luda kĩnaa baaru kpá, àdi gbɛ̃nↄ kɛ̃kↄ̃a kũ gyã buri sĩnda pínkio.
24 A tↄ́ dà Siria bùsula pínki, akũ òdigↄ̃ sunɛ kũ gbɛ̃ kũ òtɛn gyã buri sĩnda pínki kũ wãwão kɛnↄ kũ tãnadenↄ kũ lɛ́tɛlɛtɛgyãdenↄ kũ ɛrɛnↄ, akũ àdi ń werekↄ̃a.
25 Ò bò Galili kũ Wɛ̃tɛmɛnkuri bùsuuo kũ Yurusalɛmuo kũ Yudeao kũ Yoda barao dasidasi ò tɛ̀i.