12
Kámmabogↄrↄ yã
(Maa 2:23-3:6, Luk 6:1-11)
1 Gↄrↄ birea Yesu tɛn pã buranↄla kámmabogↄrↄ zĩ. Nà tɛni a ìbanↄ dɛ, akũ ò pↄ́blewɛ wòro, òtɛn só.
2 Kũ Farisinↄ è lɛ, akũ ò pìnɛ: Ǹ n ìbanↄ gwa, òtɛn yã kũ òdi kɛ kámmabogↄrↄ zĩro kɛ.
3 Akũ Yesu pìńnɛ: Adi kyó kɛ a è lákũ Dauda kɛ̀ nà kũ a gbɛ̃nↄ gↄrↄ kũ nà tɛni ń dɛroo?
4 À gɛ̃̀ Luda ↄnn, àpii kũ a gbɛ̃nↄ burodi kũ ò kàtɛ Ludanɛɛ sò, burodi kũ ò a sona zɛ́ vĩro, sé sa'orinↄ.
5 Kũ sa'ori kũ ò kú Luda ↄnn kámmabogↄrↄ zĩnↄ dì gↄrↄ pì yã daro, akũsↄ̃ adi kɛńnɛ taari ũro, ádi a kyó kɛ a è Luda yãnloo?
6 Matɛn oárɛ: Pↄ́ kũ à zↄ̃kↄ̃ de Luda ↄnla kú la.
7 Tó á yã díkĩna mì dↄ̃, kũ kↄ̃wɛ̃ndagwanaan má yei, adi kɛ sa'onaanlo, de ádi taarisaridenↄ taari lero.
8 Zaakũ Bisãsiri Nɛ́ mɛ́ à iko vĩ kámmabogↄrↄa.
9 Kũ Yesu bò gwe, akũ à gɛ̃̀ ń aduakɛkpɛn.
10 Gↄ̃gbɛ̃ ke kú gwe, a ↄ do íbana. Gbɛ̃kenↄ tɛn zɛ́ wɛtɛ ò yã dí Yesua, akũ ò a là ò pì: Gbɛ̃ werekↄ̃ana kámmabogↄrↄ zĩ zɛ́ vĩ yá?
11 Akũ à wèḿma à pì: Tó á gbɛ̃ke sã vĩ à zu wɛ̀ɛn kámmabogↄrↄ zĩ, à gí gɛ́ à boii?
12 Bisãsiri de sãla zã̀. Abire yãi yãmanakɛna kámmabogↄrↄ zĩ zɛ́ vĩ.
13 Akũ Yesu pì gↄ̃gbɛ̃ pìinɛ: Ǹ n ↄ pìi poro. Kũ à pòro, akũ à kɛ̀ a gbɛ̀n swáswa lán a do bà.
14 Akũ Farisinↄ bↄ̀tɛ ò gɛ̀ɛ ò yã gↄ̃gↄ̃ deran ò kɛ nà ò Yesu dɛ.
Zĩkɛri kũ Luda sɛ̀ɛ
15 Yesu dↄ̃̀, akũ à gò gwe. Pari bò ò tɛ̀i, akũ à ń gyãrenↄ wèrekↄ̃a ń pínki,
16 à gìńnɛ ò o gbɛ̃ kũ á de a ũ.
17 Lɛn Luda yã kũ annabi Isaya òo kɛ̀ lɛ, à pì:
18 Ma zĩkɛri kũ ma sɛ̀ɛn dí,
ma yenyĩde kũ a yã dì kámagu.
Mani ma Nini di a musu,
ani yãzɛde da burinↄnɛ.
19 Ani lɛ́kpakↄ̃a kɛro, ani pataḿmaro,
gbɛ̃ke ni a zuka ma dↄ batunlo.
20 Ani kàpa kũ à kpana zɛ́n ɛ́ro,
ani fitila wɛ́'ipakɛna dɛro,
ari à tó yãzɛde zĩ̀ ble.
21 Buri sĩnda pínki tãmaa nigↄ̃ dↄa.
Tãnagona gbɛ̃nↄa
(Maa 3:20-30, Luk 11:14-23)
22 Akũ ò sù Yesunɛ kũ tãnade vĩ̀na kũ a nɛ́nɛ natɛnaao. Yesu a wèrekↄ̃a, àtɛn yã o sà, àtɛn gu e.
23 Akũ yã pìi bò gbɛ̃nↄ sarɛ ń pínki ò pì: Dauda buri pìin díroo?
24 Kũ Farisinↄ mà, akũ ò pì: Gbɛ̃ díkĩna ni fↄ̃ à tãna goḿmaro sé kũ tãnanↄ kína Bɛlɛzɛbubu gbãnao.
25 Yesu ń laasun dↄ̃, akũ à pì: Kpata kũ a gbɛ̃nↄ ibɛrɛɛ sɛ̀ kũ kↄ̃o ni kakatɛ. Wɛ̃tɛ ke ↄn kũ a gbɛ̃nↄ ibɛrɛɛ sɛ̀ kũ kↄ̃o ni gↄ̃ bɛzĩ ũmɛ.
26 Tó Setan tɛni a zĩda go gbɛ̃nↄa, à ibɛrɛɛ sɛ̀ kũ a zĩdaon gwe. A kpata ni gì kɛ deramɛɛ?
27 Tó Bɛlɛzɛbubu gbãnan madìgↄ̃ tãnanↄ gooḿma sↄ̃, á gbɛ̃nↄ dì ń go kũ dí gbãnaomɛɛ? Lɛn á zĩda gbɛ̃nↄ á ɛ́kɛ bò lɛ.
28 Tó Luda Nini gbãnan matɛn tãna gooḿma, àgↄ̃ dↄ̃ kũ kína kũ Luda kàa sù à á lén gwe.
29 Deran gbɛ̃ ni kɛ nà à gɛ̃ gↄ̃sa gbãna kpɛ́n à a pↄ́nↄ sɛ́tɛɛ? Séto à a yĩ̀ gĩa, gbasa à a kpɛ́ wara.
30 Gbɛ̃ kũ à de ma gbɛ̃ ũro bi ma ibɛrɛɛmɛ. Gbɛ̃ kũ àtɛn pↄ́ kakara kũmaoro tɛn fãkↄ̃amɛ.
31 Abire yãi matɛn oárɛ, Luda ni gbɛ̃nↄ durunnanↄ kɛ̃ḿma kũ a tↄ́ vãni kũ òdi sísinↄ pínki, ama ani gbɛ̃ kũ à a Nini tↄ́ vãni sì kɛ̃ro.
32 Tó gbɛ̃ Bisãsiri Nɛ́ tↄ́ vãni bò, Luda ni kɛ̃a, ama tó gbɛ̃ Luda Nini tↄ́ vãni bò, ani ade kɛ̃ andunia tera díkĩna gũnlo ke a kũ àtɛn su.
Gbɛ̃ dↄ̃na a yãkɛnaaa
(Luk 6:43-45)
33 Tó lí mana, a nɛ́ nigↄ̃ manamɛ. Tó lí vãni sↄ̃, a nɛ́ nigↄ̃ vãnimɛ. Zaakũ línɛn òdi lí dↄ̃a.
34 Bisãsiri pitikonↄ! Kũ á vãni, à kɛ̀ dera áni fↄ̃ à yã mana oo? Zaakũ yã kũ à swɛ̃̀ɛ pàn lɛ́ dì o.
35 Gbɛ̃ mana dì a mana bo a mana kũ à katɛna a gũmmmɛ. Gbɛ̃ vãni sↄ̃ àdi a vãni bo a vãni kũ à katɛna a gũmmmɛ.
36 Matɛn oárɛ, yãkpatɛkɛgↄrↄ zĩ gbɛ̃nↄ ni ń fayasariyã kũ ò ò baba Ludanɛ pínki.
37 Zaakũ yã kũ n ò mɛ́ ani yã nna kpámma kesↄ̃ à yã danla.
Sèedagbɛkana Yesua
(Maa 8:11-12, Luk 11:29-32)
38 Akũ ludayãdannɛrinↄ kũ Farisi kenↄo pì Yesunɛ: Dannɛri, ó ye ǹ sèeda ke kɛ ò e.
39 Akũ Yesu wèḿma à pì: Gbãragbɛ̃ vãni ludanaanikɛrisarinↄ mɛ́ òdi sèeda gbɛkama, ama mani sèeda ke kɛńnɛro, sé annabi Inusa pↄ́.
40 Lákũ Inusa kɛ̀ kpↄ̀ gbɛ̃̀ntɛ̃ gbɛrɛ gũn nà fãnantɛ̃ kũ gwãanio ari gↄrↄ aakↄ̃, lɛn Bisãsiri Nɛ́ ni kɛ lɛ zĩtɛn fãnantɛ̃ aakↄ̃ gwãani aakↄ̃.
41 Yãkpatɛkɛgↄrↄ zĩ Ninɛvadenↄ ni futɛ ò yã da gbãragbɛ̃nↄla, zaakũ kũ ò Inusa waazi mà, ò ń nɛ̀sɛɛ lìtɛ, akũ gbɛ̃ kũ à zↄ̃kↄ̃ de Inusala kú la.
42 Yãkpatɛkɛgↄrↄ zĩ gɛ̀nↄmidↄki kpa saraunia ni futɛ à yã da gbãragbɛ̃nↄla, zaakũ à bò zaa andunia lɛ́a à sù Sulemanu ↄ̃ndↄ̃yã ma, akũ gbɛ̃ kũ à de Sulemanula kú la sà.
Tãna ɛrana a bɛ zĩa
(Luk 11:24-26)
43 Tó ò tãna gò gbɛ̃a, àdigↄ̃ likara zↄ̃ gukorin àgↄ̃ vutɛki wɛtɛ. Tó adi lero,
44 akũ àdi pi: Mani ɛra mà tá ma bɛ zĩamɛ. Tó à kà gwe, àdi le à da pã, à warana swáswa zɛ́azɛa.
45 Akũ àdi gɛ́ à à tãna kũ ń pãsĩ dealanↄ sɛ́tɛ mɛ̀n suppla à su kũńwo òdi gɛ̃ ò vutɛn. Lɛmɛ ade gwena kpɛde vãni dìgↄ̃ de a káakupↄla. Gó dokↄ̃nↄ pì mɛ́ ani gbãragbɛ̃ vãninↄ bikũ sↄ̃.
Yesu danɛnↄ
(Maa 3:31-35, Luk 8:19-21)
46 Kũ Yesu tɛn yã o gbɛ̃nↄnɛ, akũ a da kũ a dakũnanↄ kà, ò zɛ̀ bàai, ò ye ò yã o kãao.
47 Akũ ò pìnɛ: N da kũ n dakũnanↄ zɛna bàai, ò ye ò yã o kũnwo.
48 Akũ à wèa à pì: Dín ma da ũu? Dín ma dakũnanↄ ũu?
49 Akũ à ↄ dↄ̀ a ìbanↄa à pì: Ma da kũ ma dakũnanↄn dí.
50 Zaakũ gbɛ̃ kũ àdi ma De kũ à kú musu pↄyenyĩna kɛn ma dakũna kũ ma dãreo kũ ma dao ũ.