5
Fɑɑbɑ kowo koo yɑriwɑ
Bɛtelehɛmun di
1 Yinni Gusunɔ u nɛɛ,
wunɛ Bɛtelehɛmu, Efɑrɑtɑgibun wuu,
wunɑ ɑ piiburu bo Yudɑn wusu sɔɔ.
Adɑmɑ wunɛn min diyɑ kpɑro koo yɑri
wi u koo nɛn tɔmbu Isirelibɑ kpɑrɑ.
U wɑ̃ɑwɑ sɑɑ yee yellun di.
2 Adɑmɑ ko nɑ n ginɑ nɛn tɔn be deriwɑ ben yibɛrɛbɑn nɔmɑ sɔɔ
sere kurɔ wì u koo kpɑro wi mɑ, u kɑ mɑ.
Be bɑ kpikiru dɑ, bɑ koo gɔsirɑmɑ bu Isireli be bɑ tie deemɑ.
3 Kpɑ kpɑro wi nɑ bɛɛ nɔɔ mwɛɛru kuɑ mi,
u bɛɛ nɛn tɔmbu mɛnnɑ u kpɑrɑ mɑm mɑm
kɑ nɛ, Yinni Gusunɔn dɑm kɑ nɛn yiiko.
Win tɔmbu bɑ ko n wɑ̃ɑ bɔri yɛndu sɔɔ.
Kpɑ u yĩsiru yɑri hɑnduniɑn goonu nnɛ ye sɔɔ.
4 Wiyɑ u koo kɑ bɔri yɛndu nɑ.
Asirigibu bɑ̀ n nɑ, bɑ bɛsɛn tem wɔri
bɑ duɑ sere bɛsɛn sinɑ kpɑɑrɔ,
sɑ ko bɛsɛn kpɑro be bɑ dɑm bo seeyɑ bu bu wɔri.
5 Ben tɑbu yɑ̃nun sɔ̃,
bɑ koo Asirigibu kɑ Nimurodugii be tɑɑre,
kpɑ bu sun wɔrɑ Asirigibu bɑ̀ n bɛsɛn tem wɔrimɑ.
Isireli be bɑ wɑ̃ɑ
bwese ni nu tien suunu sɔɔ
6 Isireli be bɑ tiɑrɑ bɑ ko n wɑ̃ɑ tɔn dɑbinun suunu sɔɔ nge kɑko ɑrufɑɑnigiru
te Yinni Gusunɔ u derɑ tɑ wɔrumɑ,
ǹ kun mɛ nge gurɑ ye yɑ nɛmɔ tɛɛru,
yɑ ǹ gɑ̃ɑnu yĩiyɔ tɔnun min di.
7 Isireli be bɑ tiɑrɑ bɑ ko n wɑ̃ɑ tɔmbun suunu sɔɔ,
kpɑ bɑ n dɑm mɔ nge gbee sunɔ ge gɑ wɑ̃ɑ gbeeku yɛɛn suunu sɔɔ,
ǹ kun mɛ yɑ̃ɑ gɔ̃ɔ sɔɔ.
Mi gɑ duɑ kpuro, gɑ rɑ yɑɑ kɑsukuwɑ gu mwɛ.
Goo kun mɑɑ kpɛ̃ u gu mwɑɑri.
8 Isirelibɑ, i seewo i bɛɛn yibɛrɛbɑ wɔri.
Kpɑ i bu go mɑm mɑm.
Yinni Gusunɔ
u ye bɑ gbɑlli wunɑ
9 Yinni Gusunɔ u nɛɛ,
tɔ̃ru gɑrɑ sisi tè sɔɔ kon bɛɛn dumi kɑ bɛɛn tɑbu kɛkɛbɑ kpeerɑsiɑ.
10 Kpɑ n bɛɛn wusu kɑm koosiɑ.
Kpɑ n bɛɛn gbɑ̃rɑnu suriri.
11 Kon bɛɛn dobo dobogibu go.
I ǹ mɑɑ ben dobo dobo wɑsi bɛɛn suunu sɔɔ.
12 Kon bwɑ̃ɑrokunu kɑ kpee ni i girɑ kɔsuku.
I ǹ mɑɑ nu sɑ̃ɑmɔ.
13 Kon bũu wi bɑ mɔ̀ Asitɑɑten sɑ̃ɑ yerun dɑ̃nu wukiri.
Kpɑ n bɛɛn wusu kɔsuku.
14 Nɛn mɔru koo se,
kpɑ n nɛn dɑm sɔ̃ɔsi bwese ni nu ǹ mɑn mɛm nɔɔwɑmmɛn mi.