Luda yã takada kũ Bisã yão Sɑ̃ɑrun Woodɑ 13

Gɔnɑn bɑrɑrun woodɑ

1 Yinni Gusunɔ u Mɔwisi kɑ Aroni sɔ̃ɔwɑ u nɛɛ, 2 goo ù n mɔsiru mɔ wɑsi sɔɔ, ǹ kun mɛ debu, ǹ kun mɛ bɑu kpiku ge gɑ kɑ bɑrɑ disigiru weenɛ, bɑ koo kɑ yɛ̃ro dɑwɑ yɑ̃ku kowo Aronin mi ǹ kun mɛ win bibun turon mi. 3 Yɑ̃ku kowo wiyɑ u koo bɑrɑ te mɛɛri. Ù n deemɑ bɑu ge, gɑ sɑn kpikisu mɔ, mɑ gɑ wɔru mɔ, sɑɑ ye sɔɔrɑ u koo gere mɑ yɛ̃ro u bɑrɑ disigiru bɑrɔ. 4 Ù n mɑɑ bɑu kpiku gɑgu mɔ mɑ gɑ ǹ wɔru mɔ, mɑ gen sɑnsu kun buriri, yɑ̃ku kowo u koo kɑ yɛ̃ro dɑwɑ diru gɑru sɔɔ u kɛnusi sɔ̃ɔ nɔɔbɑ yiru. 5 Sɔ̃ɔ nɔɔbɑ yiruse, yɑ̃ku kowo ù n wɑ bɑu ge, gɑ ǹ yɑbi, u koo mɑɑ nùn kɛnusiwɑ sɔ̃ɔ nɔɔbɑ yiru. 6 Sɔ̃ɔ nɔɔbɑ yiruse te, yɑ̃ku kowo u koo mɑɑ nùn yɑrɑwɑ u mɛɛri. Ù n deemɑ gɑ ǹ yɑbi bɑɑmɑ, u koo yɛ̃ro sɔ̃wɑ mɑ u dɛɛre, yɑ sɑ̃ɑwɑ debu, kpɑ u win yɑ̃nu teɑ u dɛɛrɑ. 7 Amɛn biru, debu ye, yɑ̀ n yɑbi gɔnɑ ye sɔɔ, yɛ̃ro u koo mɑɑ wurɑwɑ yɑ̃ku kowo u nùn mɛɛri. 8 Yɑ̃ku kowo wi, ù n nùn mɛɛrɑ mɑ u deemɑ yɑ yɑbi win gɔnɑ sɔɔ, u koo yɛ̃ro sɔ̃wɑ mɑ u ǹ dɛɛre, u bɑrɑ disigiru mɔwɑ.

9 Goo ù n bɑrɑ disigiru bɑrɔ, bɑ koo kɑ nùn dɑwɑ yɑ̃ku kowon mi. 10 Yɑ̃ku kowo wiyɑ u koo nùn mɛɛri. Ù n bɑu kpiku wɑ mi, mɑ bɑu gen sɑnsu buriri, mɑ gɔnɑ ye, yɑ boo kuɑ, 11 yɑ sɑ̃ɑwɑ bɑrɑ disigii te tɑ torumɔ yɛ̃ron gɔnɑ sɔɔ. Yɑ̃ku kowo u koo yɛ̃ro gɑrisiwɑ disigii. U ǹ mɑɑ nùn kɛnusimɔ. 12 Adɑmɑ yɑ̃ku kowo ù n mɔsi mɔsiminu wɑ nu yɑbi yɛ̃ron gɔnɑ kpuro sɔɔ, sɑɑ win wirun di sere kɑ nɑɑsɔ, 13 u koo yɛ̃ro gɑrisiwɑ u dɛɛre, domi win wɑsi kpuro yi bururɑ. 14 Adɑmɑ dɔmɑ te bɑ boo swɑ̃ɔ wɑ win wɑsi sɔɔ, bɑ koo nùn gɑrisiwɑ disigii. 15 Yɑ̃ku kowon tiiwɑ u koo nùn mɛɛri. Ù n deemɑ boo swɑ̃ɔ u wɑ̃ɑ mi, u koo nùn gɑrisiwɑ disigii, domi yɑ sɑ̃ɑwɑ bɑrɑ disigiru. 16 Adɑmɑ win wɑsi yi, yì n kɔsɑ, mɑ yi bururɑ kpuro, u koo mɑɑ dɑwɑ u yɑ̃ku kowo wɑ. 17 Yen biru, yɑ̃ku kowo u koo ye mɛɛriwɑ. Ù n wɑ yɑ bururɑ, sɑɑ ye sɔɔ, u koo yɛ̃ro gɑrisiwɑ u dɛɛre.

18 Goo ù n win bwisi kpɑkɑ sɔɔ 19 mɔsiru gɑru wɑ, mɑ u deemɑ tɑ buriri, ǹ kun mɛ tɑ sɔ̃ri, yɛ̃ro u koo dɑwɑ u tii sɔ̃ɔsi yɑ̃ku kowon mi. 20 Yɑ̃ku kowo wi, u koo nùn mɛɛriwɑ. Ù n deemɑ mɔsi te, tɑ wɔru mɔ, mɑ win wɑsin sɑnsu su bururɑ, sɑɑ ye sɔɔrɑ yɑ̃ku kowo u koo nùn gɑrisi disigii. Bɑrɑ disigirɑ tɑ yɑrimɔ sɑɑ bwisi kpɑkɑ yen min di. 21 Adɑmɑ yɑ̃ku kowo ù n wɑ mɑ sɑn kpikisu sɑri mɔsi ten wɔllɔ, yen biru mɔsi te, tɑ ǹ wɔru mɔ, mɑ tɑ buriri fiiko, u koo durɔ wi kɛnusiwɑ dirɔ sɔ̃ɔ nɔɔbɑ yiru. 22 Mɔsi te, tɑ̀ n gɔnɑ yɑbi, yɑ̃ku kowo u koo nùn gɑrisiwɑ disigii domi bɑrɑ disigirɑ tɑ nùn deemɑ. 23 Adɑmɑ mɔsi te, tɑ kun yɑbi, tɑ sɑ̃ɑwɑ bwisi kpɑkɑ. Sɑɑ ye sɔɔ, yɑ̃ku kowo u koo gere mɑ yɛ̃ro kun disi mɔ.

24 Goo ù n dɔ̃ɔ mwɑɑrɑ mɑ yen boo kpɑkɑ sɔɔ bɑu kpiku gɑ yɑrɑ, ǹ kun mɛ bɑu sɔ̃ɔ, yɑ̃ku kowo u koo yɛ̃ro mɛɛriwɑ. 25 Gen sɑnsu sù n kuɑ kpikisu mɑ wɔru gɑ sɔ̃ɔsire gɔnɑ ye sɔɔ, sɑɑ ye sɔɔ bɑrɑ disigirɑ tɑ sɔ̃ɔsirɑ mi. Yɑ̃ku kowo u koo nùn gɑrisiwɑ disigii. 26 Adɑmɑ yɑ̃ku kowo ù n wɑ mɑ sɑn kpikisu sɑri bɑu ge sɔɔ, gɑ ǹ mɑɑ wɔru mɔ, mɑ gɑ buriri fiiko, u koo yɛ̃ro kɛnusiwɑ dirɔ sɔ̃ɔ nɔɔbɑ yiru. 27 Sɔ̃ɔ nɔɔbɑ yiruse te, u koo nùn mɛɛri. Ù n wɑ bɑu ge, gɑ yɑbi win gɔnɑ sɔɔ, u koo nùn gɑrisiwɑ disigii. Tɑ sɑ̃ɑwɑ bɑrɑ disigiru. 28 Adɑmɑ bɑu ge, gɑ kun yɑbi, mɑ gɑ bururɑ fem fem, dɔ̃ɔ mwɑɑrɑ kpɑkɑ yerɑ. Sɑɑ ye sɔɔ, yɑ̃ku kowo u koo nùn gɑrisiwɑ u dɛɛre.

29 Tɔn durɔ ǹ kun mɛ tɔn kurɔ ù n bɑu gɑgu mɔ win wirɔ, ǹ kun mɛ win tonkurorɔ, 30 yɑ̃ku kowo u koo gu mɛɛriwɑ. Gɑ̀ n wɔru mɔ mɑ gen sɑnsu su ǹ sinum mɔ, mɑ su swɛ̃rɑmɑ nge dɔm buuru, yɑ̃ku kowo u koo yɛ̃ro gɑrisiwɑ disigii. Yɑ sɑ̃ɑwɑ wii kpɑkɑ ye yɑ wɑ̃ɑ wirɔ, ǹ kun mɛ tonkurorɔ. 31 Yɑ̃ku kowo wi, ù n wɑ yɑ wɔru mɔ, mɑ sɑn wɔ̃kusu sɑri, u koo yɛ̃ro kɛnusiwɑ dirɔ sɔ̃ɔ nɔɔbɑ yiru. 32 Sɔ̃ɔ nɔɔbɑ yiruse te, u koo mɑɑ yɛ̃ro mɛɛriwɑ. Ù n deemɑ wii kpɑkɑ ye, yɑ ǹ yɑbi mɑ yɑ sɑnsu mɔ si su kɑ dɔm buuru weenɛ, mɑ su ǹ wɔru mɔ, 33 yɛ̃ro u koo win sɑnsu kɔniwɑ. Adɑmɑ u ǹ kpɑkɑ ye kɔnimɔ. Yen biruwɑ yɑ̃ku kowo u koo mɑɑ nùn kɛnusi dirɔ sɔ̃ɔ nɔɔbɑ yiru. 34 Sɔ̃ɔ nɔɔbɑ yiruse te, u koo ye mɛɛriwɑ. Wii kpɑkɑ ye, yɑ̀ kun yɑbi, mɑ yɑ ǹ tĩre yɑ gɔnɑ kere, yɑ̃ku kowo u koo nùn gɑrisiwɑ u dɛɛre. U koo win yɑ̃nu teɑ. Sɑɑ ye sɔɔ, u dɛɛrɑwɑ mi. 35 Adɑmɑ wii kpɑkɑ ye, yɑ̀ n dɑ̃kuru yɑbi, yɑ̃ku kowo u koo mɑɑ nùn mɛɛriwɑ. 36 Ù n wɑ yɑ yɑbi gɔnɑ ye sɔɔ, yɑ̃ku kowo u ǹ mɑɑ kɑsumɔ yɛ̃ro ù n sɑn dɔm buuru mɔ. U koo nùn gɑrisiwɑ disigii. 37 Wii kpɑkɑ ye, yɑ̀ kun yɑbi, mɑ yen sɑnsu tĩrɑ, yɛ̃ro u bɛkurɑwɑ mi. U ǹ mɑɑ disi mɔ. Yɑ̃ku kowowɑ u koo gere mɑ u dɛɛre.

38 Tɔn durɔ goo ǹ kun mɛ tɔn kurɔ goo ù n win gɔnɑ sɔɔ bɑu kpikisu wɑ, 39 yɑ̃ku kowowɑ u koo nùn mɛɛri. Ù n bɑusu gɑsu wɑ si su ǹ buriri sɑ̃ɑ sɑ̃ɑ, bɑu si, su ǹ sɛ̃. U koo yɛ̃ro gɑrisiwɑ u dɛɛre.

40 Goo ù kun seri mɔ wirɔ, wii kpɑrɑrugiiwɑ bɑ koo yɛ̃ro gɑrisi. U dɛɛrewɑ mi. 41 Ǹ n wuswɑɑ giɑn nɑ u ǹ seri mɔ, yɛ̃ro u sɑ̃ɑwɑ wii kpɑrɑrugii. Kɑ mɛ, yɛ̃ro u dɛɛrewɑ. 42 Adɑmɑ wii kpɑrɑ te sɔɔ, bɑu gɑgu gɑ̀ n sɔ̃ɔsirɑ gɑ sɔ̃ri, bɑrɑ disigirɑ tɑ torumɔ mi. 43 Yɑ̃ku kowowɑ u koo gu mɛɛri. Ù n deemɑ wii kpɑrɑ te, tɑ bɑu kpikisu mɔ su kɑ bɑrɑ disigiru weenɛ, wi u su mɔ mi, u bɑrɑ disigiru bɑrɔwɑ mi. U ǹ dɛɛre. 44 Yɑ̃ku kowo u koo nùn gɑrisiwɑ disigii win wii bɑu gen sɔ̃.

45 Wi u bɑrɑ disigiru mɔ kpuro, u koo yɑ̃nu dokewɑ ni nu gɛ̃ɛre, u ku furɔ doke, kpɑ u win wuswɑɑ wukiri kpɑ u n nɔɔgiru sue u n mɔ̀, disigii, disigii. 46 U ko n sɑ̃ɑwɑ disigii sere win bɑrɑ disigii te, tu kɑ kpe. Yen sɔ̃nɑ u ko n wɑ̃ɑ yeru mɔ bee tiɑ u n kɑ tɔmbu dɛsire.

Disi gɔmi yɑ̃nu sɔɔ

47-49 Bɑ̀ n disi gɔmi gɛɛ wɑ yi sɔ̃ri ǹ kun mɛ yi sɑ̃ɑ nge wuru biresu yɑ̃nu gɑnu sɔɔ, ni bɑ kuɑ kɑ yɑ̃ɑ sɑnsu ǹ kun mɛ kĩɑ si bɑ kuɑ kɑ wɛ̃ɛ dɑmgii ǹ kun mɛ yɑɑ gɔnɑ, bɑu ge, yɑ̃ku kowo u koo gu mɛɛriwɑ. 50 Yɑ̃ku kowo wi, ù n yɑ̃ɑ ni mɛɛrɑ u koo nu yiwɑ sɔ̃ɔ nɔɔbɑ yiru. 51 Yen sɔ̃ɔ nɔɔbɑ yiruse te, u koo wure u mɑɑ yɑ̃ɑ ni mɛɛriwɑ. Ù n deemɑ disi gɔmi yi, yi yɑbi bɑɑmɑ, mɑ bɑ ǹ kpɛ̃ bu yi wĩɑ, sɑɑ ye sɔɔ, u koo nu gɑrisiwɑ yɑ̃ɑ disiginu. 52 Sɑɑ ye sɔɔrɑ yɑ̃ku kowo u koo yɑ̃ɑ ni dɔ̃ɔ mɛni. Bɑɑ bɑ̀ n nu kuɑ kɑ wɛ̃su ǹ kun mɛ kɑ wɛ̃ɛ dɑmgii ǹ kun mɛ kɑ yɑ̃ɑ sɑnsun wɛ̃ɛ ǹ kun mɛ kɑ mɑm gɔnɑ, kɑ mɛ, bɑ koo ye kpuro dɔ̃ɔ mɛniwɑ. Domi bɑ ǹ kpɛ̃ bu disi gɔmi yi wĩɑ. Dɔ̃ɔwɑ u koo ye go. 53 Adɑmɑ yɑ̃ku kowo ù n wɑ gɔmi yi, yi ǹ yɑbi yɑ̃ɑ ni sɔɔ, 54 u koo de bu nu teɑwɑ kpɑ bu mɑɑ nu diru kɛnusi sɔ̃ɔ nɔɔbɑ yiru. 55 Sɔ̃ɔ nɔɔbɑ yiruse te, u koo wure u mɑɑ nu mɛɛriwɑ. Ù n deemɑ disi gɔmi yi ǹ kɔsɑ, yi ǹ mɑɑ yɑbi, bɑ koo yɑ̃ɑ ni gɑrisiwɑ disiginu kpɑ bu nu dɔ̃ɔ doke. Domi disi gɔmi yi, yi nu di biruɔ ǹ kun mɛ wuswɑɑɔ. 56 Adɑmɑ yɑ̃ku kowo ù n deemɑ disi gɔmi yi, yi bururɑ, u koo ye wɔkɑwɑ yɑ̃ɑ nin min di. 57 Yen biru yì n mɑɑ wurɑmɑ yɑ̃ɑ ni sɔɔ, yi ko n sɑ̃ɑwɑ disi gɔmi. Bɑ koo yɑ̃ɑ ni dɔ̃ɔ mɛniwɑ.

58 Bɑ̀ n yɑ̃nu gɑnu teɑ ni nu disi gɔmi kpiɑ, mɑ disi gɔmi yi, yi wĩɑrɑ, bɑ koo wure bu mɑɑ nu teɑwɑ bu sere nu gɑrisi nu dɛɛre.

59 Yeniwɑ yɑ sɑ̃ɑ disi gɔmin woodɑ yi yi rɑ kpi yɑ̃nu sɔɔ ye bɑ kuɑ kɑ wɛ̃su ǹ kun mɛ kɑ wɛ̃ɛ dɑmgii ǹ kun mɛ kɑ gɔnɑ. Woodɑ yerɑ yɑ koo sɔ̃ɔsi yɑ̃ɑ ni nu dɛɛre kɑ ni nu kun dɛɛre.