Luda yã takada kũ Bisã yão LUKU 16

Aruzɛkɛ náanisari

1 Yesu pì a ìbanↄnɛ: Ɔgↄde ke mɛ́ à kun à bɛgwarii dìtɛ a zĩkɛrinↄnɛ. Akũ ò sù ò kↄrↄmↄtↄↄ kɛ̀nɛ ò pì, àtɛni a aruzɛkɛ kakatɛ. 2 Akũ à a sìsi à pìnɛ: Yã kũ ma mà n musu de deramɛɛ? Ǹ yã kũ ntɛn kɛ n bɛgwanaa gũn babamɛnɛ. Ĩni gↄ̃ de ma bɛgwari ũ doro. 3 Akũ bɛgwarii pìi ò a swɛ̃̀ɛ gũn: Ma dikiri tɛni ma bo zĩ gũn, mani kɛ deraa? Akũ dí mani fↄ̃ mà sɛ̃̀ waro, akũ barakɛna demɛnɛ wé'iyã ũ. 4 Má dↄ̃ yã kũ mani kɛ de gbɛ̃nↄ ma ditɛ ń bɛa, tó à ma bo zĩn. 5 Akũ à a dikiri fĩnadenↄ sìsi dodo, à gbɛ̃ káaku là à pì: Ń ma dikiri fĩna kũna ũgbamɛɛ? 6 À pì: Nísi gáruwa lɛ́ basↄↄromɛ. Akũ bɛgwarii pìi pìnɛ: N fĩna takadan la. Ǹ vutɛ ǹ kɛ̃ bupla akuri likalika. 7 Akũ à pì gbɛ̃ pãndenɛ: Mↄkↄ̃n sↄ̃, n fĩna ũgbamɛ? Akũ à pì: Ése asasa basↄↄromɛ. Akũ bɛgwarii pìi pìnɛ: N fĩna takadan la, ǹ a kɛ̃ basiikↄ̃mɛ. 8 Akũ dikirii pì bɛgwari náanisaride pì sáabu kpà wɛ́zɛ̃ kũ à kɛ̀ yã musu. Zaakũ andunia díkĩna gbɛ̃nↄ wɛ́ zɛ̃na de gupuradenↄla ń kↄ̃ tɛ̃nɛ yãkɛnaa gũn.

9 Makũ sↄ̃ matɛn oárɛ, à gbɛ̃nnanↄ wɛtɛ kũ andunia aruzɛkɛnↄ, de gↄrↄ kũ à làkaáwa, Luda ni gbãnakɛ kpáái bɛ kũ àdi lákaro gũn. 10 Gbɛ̃ kũ à náani vĩ kũ a fítio nigↄ̃ náani vĩ kũ a zↄ̃kↄ̃ↄomɛ se. Gbɛ̃ kũ à náani vĩ kũ a fítioro nigↄ̃ náani vĩ kũ a zↄ̃kↄ̃ↄo sero. 11 Tó adi kɛ á náani vĩ kũ andunia aruzɛkɛoro, Luda ni á náani kɛ kũ a yãpuradeo yá? 12 Tó adi kɛ á náani vĩ kũ gbɛ̃ pãnde pↄ́nↄro, Luda ni a zĩda pↄ́ kpááwa yá? 13 Zĩkɛrii dì fↄ̃ à zↄ̀ ble dikiri mɛ̀n planɛro, zaakũ ani zã gbɛ̃ dogu àgↄ̃ ye gbɛ̃ doi, ke ani na gbɛ̃ doa à gbɛ̃ do gya bo. Áni fↄ̃ àgↄ̃ zↄ̀ ble Ludanɛ kũ ↄgↄo lɛɛlɛro.

Ɔgↄde kũ Lazaruo

14 Farisinↄ ye ↄgↄi. Kũ ò yã pìi mà pínki, akũ òtɛn lɛ́zuki kɛ Yesua. 15 Yesu pìńnɛ: Adì yã nna kpá á zĩdaa bisãsirinↄ kĩnaamɛ, ama Luda á swɛ̃̀ dↄ̃. Yã kũ à zↄ̃kↄ̃ bisãsirinↄnɛn Luda dì a gya bo.

Ɔgↄde kũ Lazaruo

(Mat 5:31-32, 11:12-13, Maa 10:11-12)

16 Musa doka kũ annabinↄ takadanↄ kun ari Yahaya gↄrↄa. Zaa gↄrↄ kũ̀a òtɛn kpata kũ à bò Luda kĩnaa baaru kpá, akũ gbɛ̃ sĩnda pínki tɛn wɛtɛ à gɛ̃n kũ gbãnao. 17 Ludambɛ kũ zĩtɛo gɛ̃tɛnaa araga de doka pìi wãnzãn fíti gogonala. 18 Gbɛ̃ kũ à gì a nanↄi à nↄ pãnde sɛ̀, ade zina kɛ̀mɛ. Gbɛ̃ kũ à nↄ kũ ò gìii sɛ̀ sↄ̃, à zina kɛ̀n gwe.

19 Gↄ̃gbɛ̃ ↄgↄde ke kun àdi pↄ́kasa mana ↄgↄdenↄ da, àdigↄ̃ pↄnna kɛ nnamanaa gũn gↄrↄ sĩnda pínki. 20 Barakɛri kũ òdi pinɛ Lazaru dìgↄ̃ wútɛna a bɛ gãnu gũn, bↄ̀nↄ dↄdↄ a mɛ̀ɛa. 21 Àdigↄ̃ pↄ́ble kũ àdi lɛ́tɛ ↄgↄde pì teburu zĩtɛ blena ni dɛ. Gbɛ̃danↄ mɛ́ òdigↄ̃ a bↄ̀ↄ pìnↄ sãsã. 22 Barakɛrii pìi gà, akũ malaikanↄ a sɛ̀ ò tà kãao Ibrahĩ kuru. Ɔgↄde pìi gà se, akũ ò a vĩ̀. 23 Kunna wɛ́tãmma gũn gyãwãn, kũ à wɛ́ sɛ̀ musu, akũ à Ibrahĩ è zã̀, Lazaru kú a sarɛ. 24 Akũ à lɛ́ zùi à pì: Baa Ibrahĩ, ǹ ma wɛ̃nda gwa, ǹ Lazaru zĩ à a ↄnɛ zↄ̃ ía, à mↄ́ à tↄ̃mɛnɛ ma nɛ́nɛa, zaakũ matɛn wãwã ma tɛ́vura díkĩna gũmmɛ. 25 Akũ Ibrahĩ pì: Ma nɛ́, ǹ tó nnamana kũ à lìkanyĩ n wɛ̃̀ndigↄrↄ yã dↄngu kũ takasi zↄ̃kↄ̃ kũ Lazaru kɛ̀ɛo. A laakari kpatɛna la sà, akũ ń kú wãwã gũn. 26 Abire gbɛra wɛ̀ɛ lòkoto kú ó dagura. Tó gbɛ̃ ye à bo la à gɛ́ á kĩnaa, ani fↄ̃ro, gbɛ̃ke ni fↄ̃ à bo gwe à su ó kĩnaa sↄ̃ro. 27 Akũ ↄgↄde pìi pì: N yã nna Baa, tó lɛmɛ, ǹ a zĩ ma de bɛa, 28 zaakũ má dakũnanↄ vĩ gbɛ̃nↄn sↄↄro. À gɛ́ lɛ́ daḿma, de òsun su gu wãwãde dí gũnlo. 29 Akũ Ibrahĩ pì: Ò Musa kũ annabinↄ takadanↄ vĩ, ò ń yã ma. 30 Akũ ↄgↄde pìi pì: Oi, Baa Ibrahĩ! Tó gbɛ̃ke bò gan à gɛ̀ɛ ń kĩnaa, oni ń nɛ̀sɛ litɛ. 31 Akũ Ibrahĩ pìnɛ: Tó odi Musa kũ annabinↄ yã maro, bee tó gbɛ̃ke bò gan, oni a yã síro.