1 Sulemanu a bɛ bona zĩ kɛ̀ pínki wɛ̃̀ kuri awɛɛ'aakↄ̃mɛ. 2 À kpɛ́ kũ òdi pi Lɛbana líkpɛ bò, a gbã̀na kà gã̀sãkuru basↄↄro, a yàasa kà gã̀sãkuru bupla akuri, a lei sↄ̃ baraakuri. A sida línↄ pɛ̀tɛpɛtɛ dↄ̀rↄ siikↄ̃, akũ à sida lí kũ ò ànↄ dàdańla 3 mɛ̀n bupla awɛɛsↄↄro, dↄ̀rↄ kũ dↄ̀rↄↄo gɛ̃rogɛ̃ro lɛu aakↄ̃, akũ à sida línↄ kpàkpa lí kũ ò kpàa pìnↄla. 4 À a wondonↄ bòbo didikↄ̃ana dↄ̀rↄ aakↄ̃kↄ̃, ń arɛ dↄdↄkↄ̃ana. 5 Kpɛ́ pì lɛ́nↄ lei kũ a yàasaao pínki lɛɛlɛmɛ. A lɛ́nↄ mɛ̀n aakↄ̃kↄ̃ dire kpa kũ la kpao, ń arɛ dↄdↄkↄ̃ana. 6 À lígbanↄ pɛ̀tɛpɛtɛ kpɛ́ pì kpɛ́lɛlɛa. Kpɛ́lɛlɛ pìi gbã̀na kà gã̀sãkuru bupla akuri, a yàasa sↄ̃ baraakuri. À gãnu bò lígba pìnↄ arɛ, akũ à lígbanↄ pɛ̀tɛpɛtɛ à èda dↄ̀ gãnu pì lɛ́a.

7 À a kíblegbaa dìtɛ gãnu pìn. Gwen àdi yã gↄ̃gↄ̃n, akũ òdi pi Yãkpatɛkɛkpɛ. À sida lí lɛ̀kɛtɛnↄ nàna a gbĩ̀ia zaa zĩtɛ ari a sakaa. 8 A kpɛ́ kũ àdi in kú arɛ. À bòkↄ̃a kũ gãnu pìio. Lɛn kpɛ́ kũ à dↄ̀ Firi'auna nɛ́nↄgbɛ̃ kũ à sɛ̀ nↄ ũnɛ de lɛ dↄ. 9 Kpɛ́ pìnↄ bona, gbɛ̀ mananↄn ò pɛ̀tɛo ari à gɛ̀ɛ pɛ́ a sakaa. Ò gbɛ̀ɛ pìnↄ yↄ̃̀ gbasa ò zↄ̃̀zↄ̃kↄ̃rɛ kũ sàkasakaao kpa plapla pínki. Lɛmɛ ↄn kpa de lɛ kũ bàai kpao. 10 Ò kpɛ́ pìnↄ ɛ̃ pɛ̀tɛ kũ gbɛ̀ gbɛ̃̀ntɛ̃ mananↄ, a kenↄ gbã̀na kà gã̀sãkuru kuri, a kenↄ sↄ̃ sↄraakↄ̃, 11 gbasa ò bò kũ gbɛ̀ mana kũ ò yↄ̃̀ ò ànↄ kũ sida lío. 12 À bĩni bò à lìka ↄn zↄ̃kↄ̃ↄ pìii, à gbɛ̀ kũ ò ànↄ vĩ didikↄ̃ana dↄ̀rↄ aakↄ̃, akũ sida lí kũ ò ànↄ kpákpa a musu, lákũ Dikiri kpɛ́ kũ a èdaao ↄn bĩni de nà.

13 Kína Sulemanu gbɛ̃nↄ zĩ̀ ò Huramu sísi zaa Taya, akũ ò sù kãao. 14 Huramu pì da bi Nafatali burimɛ, akũsↄ̃ gyaanↄmɛ. A de bi Taya gbɛ̃mɛ, akũsↄ̃ mↄ̀gotɛ̃ ↄzĩkɛriimɛ. Huramu pì ↄ̃ndↄ̃ kũ asãnsĩnio kũ dↄ̃naao vĩ mↄ̀gotɛ̃ zĩ sĩnda pínki gũn. Kũ à sù kína Sulemanu kĩnaa, akũ à zĩ kũ à dàarɛ kɛ̀ pínki. 15 À mↄ̀gba pì mɛ̀n pla kũ mↄ̀gotɛ̃o. A pínki lei kà gã̀sãkuru baro plansari, a lɛ́ yàasa kà kuri awɛɛpla. 16 À a fùraa pì kũ mↄ̀gotɛ̃o mɛ̀n pla à kùtɛ mↄ̀gba pìnↄ musu. Fùraa pìnↄ lei kà gã̀sãkuru sↄsↄↄro. 17 À mↄ̀kakↄ̃ananↄ pì, akũ à fĩ̀fĩ a fùraa pìnↄa lán mↄ̀wakarɛ bà, ò lokolokona mɛ̀n suppla. 18 À pↄ́nↄ pì lán bísi nɛ́nↄ bà à dↄ̀dↄ mↄ̀gba fùraa pìnↄa à lìkai dↄ̀rↄ pla, mↄ̀kakↄ̃anaa pìnↄ gɛ̃i kũ a musuo. A fùraa pìnↄn lɛɛlɛmɛ pínki. 19 À Dikiri kpɛ́ èdaa mↄ̀gba fùraa pìnↄ pì kũ dↄ̃naao lán tafetira vú bà. Tafetira vú pìnↄ lei kà gã̀sãkuru siisiikↄ̃. 20 Bísi nɛ́ pìnↄn dↄdↄ mↄ̀gba fùraa pìnↄ kũ̀dↄki musu mɛ̀n wàa dodo likana mↄ̀kakↄ̃anaa pìnↄi dↄ̀rↄdↄrↄ. 21 Akũ à mↄ̀gba pìnↄ pɛ̀tɛpɛtɛ kũ ò Dikiri kpɛ́ èda kũna. À tↄ́ kpà ↄpla pↄ́nɛ Ani Kátɛ, ↄzɛ pↄ́ sↄ̃ Gbãna Kúa. 22 Mↄ̀gba pìnↄ fùranↄ bò lán tafetira vú bà. Lɛn à mↄ̀gba pìnↄ pì lɛ pínki.

23 À mↄ̀ↄ kàsa íkaki ũ bùkutu. A lɛ́ la kpa ari a lɛ́ dire kpa kà gã̀sãkuru kuri, a lei kà gã̀sãkuru sↄↄro, a lɛ́ yàasa sↄ̃ baraakuri. 24 À ↄzĩ kɛ̀ íkaki pìia lán tùrunↄ bà, à lìka a lɛ́i gɛ̃i dↄ̀rↄ pla, gã̀sãkuru do pínki tùru mɛ̀n kuri. À íkaki pìi kàsa lɛɛlɛ kũ tùru wãnzãnde pìnↄ. 25 Íkaki pì di zùsa mɛ̀n kuri awɛɛplanↄa. Zù mɛ̀n aakↄ̃nↄ mì dↄ gugbãnduru kpa, mɛ̀n aakↄ̃nↄ ifãlɛtɛ kpa, mɛ̀n aakↄ̃nↄ gɛ̀nↄmidↄki kpa, mɛ̀n aakↄ̃nↄ sↄ̃ ifãboki kpa. Íkaki pì di ń musu, akũsↄ̃ ń pↄ̀rↄnↄ dↄdↄ guragura. 26 Íkaki pìi gègetee kà ↄla yàasa ũ. A sã de lán oro sã bà, lán tafetira sã bà. Dirↄm lɛ́ wàa do ín àdi sí.

27 À tadibↄnↄ pì kũ mↄ̀gotɛ̃o mɛ̀n kuri. Ń pínki gbã̀na kà gã̀sãkuru siikↄ̃, a yàasa dↄ siikↄ̃, a lei sↄ̃ aakↄ̃. 28 Kũ ò tadibↄↄ pìnↄ pì, ò mↄ̀ lɛ̀kɛtɛnↄ kpà à gbánↄ dagura. 29 Akũ ò músu wãnzãnnↄ kɛ̀ mↄ̀ lɛ̀kɛtɛɛ pìnↄa pínki kũ zùsa wãnzãnnↄ kũ kɛrubu wãnzãnnↄo. Ò lávutãna wãnzãn kɛ̀ músuu pìnↄ kũ zùsa pìnↄ musu kũ a gɛ̃io. 30 Tadibↄↄ pìnↄ mↄ̀gotɛ̃ gére kũ gòoo vĩ mɛ̀n siisiikↄ̃. Ò gbá vĩ mɛ̀n siisiikↄ̃ dↄ. Gbá pìnↄ musun òdi ta din. Ò gbá pìnↄ kàsa, ò lávutãna wãnzãn kɛ̀ a kpa siikↄ̃a. 31 Tadibↄↄ pìnↄ lɛ́ wɛ̃na bùkutu, a lɛ́ kpa bona gã̀sãkuru do, akũsↄ̃ à lòkotoo kà ↄtã do. Ò wãnzãn kɛ̀ a lɛ́ kũ à bò musua dↄ. Tadibↄↄ pìnↄ mↄ̀ lɛ̀kɛtɛ kusurudenↄ vĩ, ò de bùkuturo. 32 Gére pìnↄn kú mↄ̀ lɛ̀kɛtɛɛ pìnↄ gɛ̃i. A gònↄ pɛ́pɛna tadibↄↄ pìnↄ gbánↄa. Gére pìnↄ lei kà gã̀sãkuru do kũ a kusuo. 33 Ò gére pìnↄ pì lán sↄ̃go pↄ́ bàmɛ. Ò a gònↄ kũ a gérenↄ kũ a mↄ̀tererenↄ kũ a oronↄ kàsa kũ mↄ̀gotɛ̃o pínki. 34 Tadibↄↄ pìnↄ kũki vĩ mɛ̀n siisiikↄ̃ a kusurunↄa. 35 Tadibↄↄ pìnↄ musu de bùkutu, a lei kà ↄtã do. A gbánↄ kũ a mↄ̀ lɛ̀kɛtɛnↄn na tadibↄↄ pìnↄ musu. 36 À kɛrubu wãnzãn kɛ̀ a gbánↄ kũ a mↄ̀ lɛ̀kɛtɛnↄa kũ músu wãnzãnnↄ kũ domina línↄ wãnzãnnↄo, gu kũ à lè pínki. À lávutãna wãnzãn kɛ̀ à lìkai dↄ. 37 Lɛn à tadibↄↄ pìnↄ pì lɛ. À kàsa pↄ́ dokↄ̃nↄ gũmmɛ, ń zↄ̃kↄ̃kɛ kũ ń bonaao lɛɛlɛmɛ.

38 Akũ à dàgaa pì kũ mↄ̀gotɛ̃o mɛ̀n kuri. A pínki dì í sí dirↄm lɛ́ siisiikↄ̃. Dàgaa pìnↄ yàasa kà gã̀sãkuru siisiikↄ̃. Kũ à dàgaa pìnↄ dìdi tadibↄ mɛ̀n kurii pìnↄa, 39 akũ à kàtɛ Dikiri kpɛ́ arɛ, mɛ̀n sↄↄro ↄplai, mɛ̀n sↄↄro ↄzɛi. À íkaki pìi dìtɛ ↄzɛ kpa Dikiri kpɛ́ kusuru kũ à kú ifãboki gɛ̀nↄmidↄki kpa sarɛ. 40 Akũ Huramu oro túbukabↄnↄ kũ a sɛ́tɛbↄnↄ kũ ta arusibↄnↄ pì dↄ. Lɛn à Dikiri ↄn zĩ kũ kína Sulemanu dàarɛ kɛ̀ lɛ, à a lakiti kɛ̀ pínki. 41 Zĩ kũ à kɛ̀ɛ pìnↄn dí: Mↄ̀gba mɛ̀n pla, a fùra kũ à bò lán lo bà kũ à kú mↄ̀gba pìnↄ musu mɛ̀n pla, mↄ̀kakↄ̃ana kũ à zã blèo a fùraa pìnↄa mɛ̀n pla, 42 bísi nɛ́ kũ à dↄ̀dↄ mↄ̀kakↄ̃anaa pìnↄa musu mɛ̀n wàa pla. À kɛ̀ ari dↄ̀rↄ pla zãblebↄ ũ mↄ̀gba fùraa pìnↄa. 43 Tadibↄↄ pìnↄ mɛ̀n kuri kũ a dàganↄ mɛ̀n kuri. 44 Íkaki mɛ̀n do kũ zùsa kũ à kú a zĩtɛnↄ mɛ̀n kuri awɛɛpla. 45 Túbukabↄↄ pìnↄ kũ a sɛ́tɛbↄnↄ kũ ta arusibↄnↄ. Pↄ́ kũ Huramu pì kína Sulemanunɛ Dikiri ↄn pↄ́ ũnↄ pínki, à ń pí kũ mↄ̀gotɛ̃ kũ ò lↄ̀lↄↄomɛ. 46 Kína tò ò pↄ́ pìnↄ kàsa kũ Yoda gbĩ̀io zaa Suko kũ Zarɛtão dagura. 47 Sulemanu dí tó ò pↄ́ kũ ò pì kũ mↄ̀gotɛ̃oo pìnↄ yↄ̃ kilooa à a tìkisi dↄ̃̀ro, kũ à kɛ̀ dasi yãi.

48 Sulemanu pↄ́ kũ à kú Dikiri kpɛ́ gũnnↄ pì dↄ, turaretitikpataki kũ ò kɛ̀ kũ wuraao kũ wura teburu kũ òdi Dikiri burodi kátɛaao 49 kũ fitiladibↄ kũ ò kàtɛ kpɛ́da gũn kpɛ́nɛ arɛ ↄplai kũ ↄzɛo mɛ̀n sↄsↄↄro. Ò pì kũ wuraao atɛ̃nɛ kũ a fitilanↄ kũ a kpàkonↄ pínki, ò lávu wãnzãn kɛ̀ḿma. 50 À wura tokonↄ pì dↄ kũ fitiladɛbↄnↄ kũ tanↄ kũ gↄ̃mbↄnↄ kũ tɛ́sibↄnↄ kũ kpɛ́nɛ kũ òdi pi Ludakuki gbà asigbenↄ kũ kpɛ́da pↄ́nↄ. 51 Kũ kína Sulemanu Dikiri ↄn zĩ pìi kɛ̀ à làka pínki, akũ à sù kũ wuraao kũ andurufuuo kũ pↄ́ kũ a de Dauda dìtɛ Dikiri pↄ́ ũnↄ, akũ à kà Dikiri ↄn aruzɛkɛkatɛkin.