Luda yã takada kũ Bisã yão YÃGƆ̃GƆ̃RINƆ 15

Samusi tɛ́sↄ̃na Filisitininↄ buraa

1 Kũ à kɛ̀ gↄrↄ pla, burapↄnↄ kɛkɛgↄrↄ kà, akũ Samusi blènɛ bↄ̀rↄↄ kũ̀ à gɛ̀ɛ a nↄ pì gwao. À pì: Má ye mà gɛ̃ ma nanↄi kpɛ́n. Akũ a nↄ pì de dí a gba zɛ́ro 2 à pì: Matɛn da n yeimɛro, akũ ma a kpà n gbɛ̃nnaa. A dakũna mana deala. Ǹ a sɛ́ a gɛ̃nɛ ũ. 3 Samusi pìńnɛ: Tó ma yã vãni kɛ̀ á Filisitininↄnɛ sà, manigↄ̃ taari vĩ doro.

4 Samusi gɛ̀ɛ à gbɛ̃gbonnↄ kũ̀kũ wàa do kũ basↄↄroo, akũ à sɛ̃̀ɛ yĩ̀yĩ térereterere. À gbɛ̃gbon pìnↄ vlã yĩ̀yĩkↄ̃a plapla, akũ à sɛ̃̀ɛ pìi yĩ̀yĩ ń vlã pìnↄa. 5 À tɛ́ nà sɛ̃̀ɛ pìnↄa, akũ à gbɛ̃gbon pìnↄ gbàrɛ Filisitininↄ bura. Ń pↄ́wɛnↄ tɛ́ kũ̀ pínki kũ ń pↄ́wɛ gbànↄ kũ ń geepi búnↄ kũ ń kùkpɛnↄ pínki. 6 Akũ Filisitininↄ pì: Dí mɛ́ à yã dí taka kɛ̀wɛrɛɛ? Akũ ò pì: Samusimɛ, Timina gbɛ̃ anzuree. A anzuree pì a nↄ sìamɛ, akũ à kpà a gbɛ̃nnaa. Akũ Filisitininↄ gɛ̀ɛ ò tɛ́ sↄ̃̀ nↄ pìia kũ a deo. 7 Samusi pìńnɛ: Zaakũ a kɛ̀ lɛ, mani kámma boro ari ma gɛ fĩna booáwa. 8 À sì ń tɛ́ à ń kɛ́ dúgudugu, ń dɛdɛnaa pì gɛ̃̀ onala, akũ à gɛ̀ɛ à vùtɛ Etamu gbɛ̀wɛɛn.

Filisitininↄ dɛdɛna kũ zaaki gɛrɛwao

9 Filisitininↄ gɛ̀ɛ ò bùraa kàtɛ Yudanↄ bùsun, ò dàgula ari Gɛrɛwa sarɛ. 10 Akũ Yudanↄ ń lá ò pì: Bↄ́yãi a suwái kũ zĩ̀ioo? Akũ ò pì: O su ò Samusi kũmɛ, de ò kɛnɛ lákũ à kɛ̀wɛrɛ nà. 11 Akũ Yudanↄ gbɛ̃nↄn dúbu aakↄ̃nↄ gɛ̀ɛ Etamu gbɛ̀wɛɛ kĩnaa ò pì Samusinɛ: Ń dↄ̃ kũ Filisitininↄ mɛ́ òtɛn kí blewároo? Bↄ́ yãn n kɛ̀wɛrɛ gwee? À wèḿma à pì: Pↄ́ kũ ò kɛ̀mɛnɛn ma kɛ̀ńnɛ. 12 Akũ ò pì: O su ò n yĩ ò n kpáḿma. Akũ Samusi pì: À la damɛnɛ kũ áni ma dɛ á zĩdaro. 13 Akũ ò pìnɛ: Oi! Óni n dɛro. Óni n yĩ kũ bàaomɛ ò n nańnɛ ń ↄĩ. Akũ ò a yĩ̀ kũ bà dufuo mɛ̀n pla ò bò kãao gbɛ̀wɛɛɛ pìi gũn. 14 Kũ ò kà kãao Gɛrɛwa, akũ Filisitininↄ sù ò daalɛ, òtɛn wiki lɛ́a. Dikiri Nini sù Samusia, akũ bà kũ ò a yĩ̀o a ↄnↄa mùna kũ̀, akũ bàa pìnↄ zↄ̃̀zↄ̃kↄ̃rɛ a ↄa. 15 À zaaki gɛ̀ dufu gɛrɛwa è, akũ à nàtɛ à sɛ̀ à gbɛ̃nↄn wàa sↄↄronↄ dɛ̀dɛo. 16 Samusi pì:

Zaaki gɛrɛwan ma gbɛ̃nↄn wàa sↄↄronↄ dɛ̀dɛo,

zaaki gɛrɛwan ma ń tↄ̃tↄ̃kↄ̃ao.

17 Kũ à yã pìi ò à làka, akũ à gɛrɛwa pìi zùkũna. Akũ ò tↄ́ kpà gu pìinɛ Gɛrɛwa Sĩ̀sĩi.

18 Ími a kũ̀ gbãna, akũ à ↄ́ↄ dↄ̀ Dikirinɛ à pì: N tò makũ n zↄ̀bleri ma zĩ̀i blè manamana, akũ ń ye mà ga kũ ímio mà lɛ́tɛ Filisitini gyↄfↄrↄdenↄ ↄĩ yá? 19 Luda Gɛrɛwa guwɛɛ lòkotoo pàra, akũ í bòn. Samusi mì, akũ a wɛ̃̀ndii sù à gbãna lè. Abire yãin òdi gu pì sísi Ɛnakore. À kú Gɛrɛwa ari kũ a gbãrao. 20 Samusi yã gↄ̃̀gↄ̃ Isarailanↄnɛ ari wɛ̃̀ baro Filisitininↄ kíblemmanagↄrↄ.