Luda yã takada kũ Bisã yão NAANAA 37

Yusufu nana'onaa

1 Yakubu kú Kanaanↄ bùsun gu kũ a de vùtɛn. 2 Yakubu burinↄ yãn dí. Yusufu bi kɛfɛnnamɛ. A wɛ̃̀ gɛ̃ro awɛɛplade gũn kũ àtɛn sãnↄ dã kũ a vĩ̀ninↄ, a de nↄnↄ Bila kũ Zilipao nɛ́nↄ, akũ à dà vãni kũ ò kɛ̀ɛ kↄrↄmↄtↄↄ kɛ̀ a denɛ. 3 Isaraila ye Yusufui de a nɛ́ kparanↄla kũ à a ì a zĩkũnaa gũn yãi, akũ à utagyabaa zↄ̃̀nɛ. 4 Kũ a vĩ̀ninↄ è ń de ye Yusufui deńla, akũ ò zã̀agu òdi we ò yã nna o kãaoro.

5 Yusufu nana ò, akũ à bàba a vĩ̀ninↄnɛ, akũ ò ɛ̀ra ò zã̀agu de zĩ pↄ́la. 6 À pìńnɛ: À nana kũ ma ò ma. 7 Ma è ótɛn ése yĩyĩ bura, akũ ma ése baka fùtɛ à zɛ̀. Á pↄ́nↄ lìkai, akũ ò nàtɛnɛ. 8 Akũ a vĩ̀ninↄ pìnɛ: Ĩni kí blewán yá? Ĩni gbãna ble wán yá? Akũ ò ɛ̀ra ò zã̀agu de yã pↄ́la nana kũ à òo pì yãi.

9 Yusufu ɛ̀ra à nana ò dↄ, akũ à bàba a vĩ̀ninↄnɛ à pì: Ma ɛra ma nana ò dↄ. Ma è ifãntɛ̃ kũ mↄvuraao kũ susunɛ mɛ̀n kuri awɛɛdonↄ tɛn natɛmɛnɛ. 10 À nana pìi bàba a denɛ dↄ, akũ a de pàtaa à pì: Nana kpate takan n ò lɛɛ? Makũ kũ n dao kũ n vĩ̀ninↄ, óni su ò kútɛ n arɛn yá? 11 A vĩ̀ninↄ nɛ̀sɛgↄ̃baa sɛ̀ kãao. A de sↄ̃ à nana pì yã kũna a nɛ̀sɛɛ gũn.

12 A vĩ̀ninↄ gɛ̀ɛ ń de sãnↄ dã Sɛkɛmu. 13 Akũ Isaraila pì Yusufunɛ: N vĩ̀ninↄ tɛn sã dã Sɛkɛmu. Mani n zĩ ń kĩnaa. À wèa à pì: Ma laka. 14 Akũ à pìnɛ: Ǹ gɛ́ ǹ n vĩ̀ninↄ gwa kũ sãnↄ, tó ò aafia. Ǹ ɛra ǹ sumɛnɛ kũ ń baaruuo. Akũ à a gbàrɛ, à bò Ɛblↄnu guvutɛn à gɛ̀ɛ Sɛkɛmu. 15 Àtɛn likara sɛ̃̀n, akũ gↄ̃gbɛ̃ ke dàalɛ à a là: Bↄ́n ntɛn wɛtɛɛ? 16 À wèa à pì: Matɛni ma vĩ̀ninↄ wɛtɛmɛ. Tó ń ń sãdãki dↄ̃, ǹ omɛnɛ. 17 Gↄ̃gbɛ̃ pìi pì: Kũ ò bò gu dín, ma mà ò pì òtɛn gɛ́ Dotãmɛ. Akũ Yusufu pɛ̀tɛńyĩ à ń lé Dotã.

18 Kũ ò a è zã̀ dire, ari àgↄ̃ gɛ́ ká ń kĩnaa, ò lɛ́ kpàkũsũi ò pì ò a dɛ. 19 Ò pìkↄ̃nɛ: À gwa, nana'ori tɛn su zã̀ dire. 20 À tó ò a dɛ ò a zu lↄ̀gↄ dínↄ doke gũn. Óni pi nↄ̀bↄ pãsĩ mɛ́ à a dɛ̀ à sò. Ɛ̃hɛ̃ óni e lákũ a nananↄ ni mì dɛ nà. 21 Kũ Rubɛni yã pìi mà, à ye à a mì sí, akũ à pì: Òsun a dɛro, 22 àsun aru boaro. À a zu lↄ̀gↄ díkĩnan gbárannan la. Àsun a dɛro. Rubɛni òńnɛ lɛ, kũ à ye à a mì sí à a kpá a dea yãimɛ. 23 Kũ Yusufu kà a vĩ̀ninↄ kĩnaa, ò a uta bò, a utagyaba mana pìi. 24 Akũ ò a sɛ̀ ò a zù lↄ̀gↄↄ pìn. Lↄ̀gↄↄ pì da korimɛ à í vĩro. 25 Akũ ò vùtɛ òtɛn pↄ́ ble. Kũ ò wɛ́ sɛ̀, ò Sumaila buri lagatarinↄ è, ò bò Giliada bùsun òtɛn gɛ́ Misila. Ń lakuminↄn do pↄ́nↄ kũ lí'ↄ ɛzɛo kũ lí'ↄ gbĩ nnao sɛna. 26 Akũ Yuda pì a gbɛ̃nↄnɛ: Tó o ó dakũna dɛ̀, akũ o a gɛ̀ɛ ùtɛ, bↄ́ àreen óni lee? 27 À tó ò a yía Sumaila buri pìnↄa. Òsun a dɛro, ó dakũnanloo? Ó aru dokↄ̃nↄmɛ. Akũ a gbɛ̃nↄ a yã mà. 28 Kũ Midiã lagatari pìnↄ tɛn su gɛ̃ zɛ́la, akũ ò Yusufu gà ò bò lↄ̀gↄn, ò a yìa Sumaila buri pìnↄa andurufu baro, akũ ò tà kãao Misila.

29 Kũ Rubɛni sù lↄ̀gↄↄ pì kĩnaa, adi Yusufu e gwe doro, akũ à a pↄ́kasanↄ gà à kɛ̃̀kɛ̃, 30 akũ à gɛ̀ɛ a dakũnanↄ kĩnaa à pì: Nɛ́ pì kú gwe doro. Mani gɛ́ má kũ abireoo? 31 Ò blèkofĩnii kũ̀ ò dɛ̀, akũ ò Yusufu uta pìi sɛ̀ ò màtɛ a aru gũn. 32 Akũ ò a utagyabaa pìi sɛ̀ ò gɛ̀ɛo ń denɛ ò pì: Pↄ́ kũ o èn dí. N nɛ́ utan yá, ke a pↄ́nlo? 33 À dↄ̃̀, akũ à pì: Ma nɛ́ utamɛ, nↄ̀bↄ pãsĩ mɛ́ à a sò. Waiyoo, ò ma nɛ́ Yusufu kɛ̀ yákiyakimɛ. 34 Akũ à a uta zↄ̃kↄ̃ↄ gà à kɛ̃̀ à pↄ́kasa sɛ̀ à dà, akũ à a nɛ́ pì wɛ̃nda kɛ̀ gìkɛna. 35 A nɛ́gↄ̃gbɛ̃nↄ kũ a nɛ́nↄgbɛ̃nↄ sù a laakari kpátɛnɛ ń pínki, ama à gì a laakari kpátɛi à pì: Manigↄ̃ ma nɛ́ pìi gɛ̀ ↄ́ↄ dↄmɛ ari mà gɛ́ táo a kĩnaa gyãwãn. Akũ àtɛn wɛ̃nda ↄ́ↄ dↄ a nɛ́ pì yã musu.

36 Midiã pìnↄ sↄ̃ ò Yusufu yìa Pↄtifaa Misila. Firi'auna ìba kemɛ, àkũmɛ a dogarinↄ gbɛ̃ zↄ̃kↄ̃ ũ.