Luda yã takada kũ Bisã yão ƐSITA 6

Bɛ̀ɛrɛkarana Mↄdekainɛ

1 Gwãani birea kína dí fↄ̃ à i òro. Akũ à pì ò mↄ́ kũ a bùsu gĩayãkɛna takadao. Ò a kyó kɛ̀nɛ, 2 akũ ò Mↄdekai yã è gwe, lákũ kína dogari zɛ́dãkpãri gbɛ̃nↄn planↄ Bigitana kũ Tɛrɛsio lɛ́ kpàkũsũi nà, akũ Mↄdekai bòo. 3 Kína a ìbanↄ là à pì: Ò Mↄdekai bɛ̀ɛrɛɛ kàra ò a gbà gbãna yã pì yãi deramɛɛ? Ò wèa ò pì: Odi yãke kɛnɛro. 4 Akũ kína pì: Dí mɛ́ à kú ↄnn gwee? Gↄrↄ kũ̀a Amana gɛ̃̀ kínabɛ ↄnn gↄ̃̀nↄ de à Mↄdekai lokona lí kũ à pɛ̀tɛ pìia yã onɛ. 5 Akũ kína ìbanↄ wèa ò pì: Amana mɛ́ à kú ↄnn gwe. Akũ kína pì à gɛ̃. 6 Kũ à gɛ̃̀, kína a là à pì: Bↄ́n oni kɛ gↄ̃gbɛ̃ kũ má ye mà a karanɛɛ? Amana laasunn lɛ̀ à pì: Dín kína ye à bɛ̀ɛrɛ karanɛ de makũlaa? 7 Akũ à wèa à pì: Tó ń ye ǹ gbɛ̃ bɛ̀ɛrɛ kara, 8 oni kína arukĩmba kũ n dà yã sɛ́ ò mↄ́o kũ n sↄ̃ kũ ò kífuraa kùaao. 9 Ǹ arukĩmbaa pì kũ sↄ̃ pìio kpá n gbãnade bɛ̀ɛrɛdenↄ dokea, à arukĩmbaa pì da gbɛ̃ kũ ń ye ǹ a bɛ̀ɛrɛ karanɛ à a di sↄ̃a àgↄ̃ tɛ́ a arɛ wɛ̃tɛ zɛ́danↄ gũn àgↄ̃ pũtã àgↄ̃ pi: Lɛn kína dì kɛ lɛ gbɛ̃ kũ à ye à a bɛ̀ɛrɛ karanɛɛnɛ. 10 Akũ kína pìnɛ: Ǹ gɛ́ ǹ arukĩmbaa pì sɛ́ gↄ̃̀nↄ kũ sↄ̃o lákũ n ò nà, ǹ yã pì kɛ Yuda buri Mↄdekai kũ àdigↄ̃ vutɛna ma bɛ gãnu gũnnɛ. Ǹsun yã kũ n pì ò kɛnɛɛ pì ke tóro.

11 Amana gɛ̀ɛ à arukĩmbaa pìi sɛ̀ kũ sↄ̃ pìio à sùo. Akũ à arukĩmbaa pìi dà Mↄdekainɛ à a dì sↄ̃a, à tɛ́ a arɛ wɛ̃tɛ zɛ́danↄ gũn, àtɛn pũtã à pì: Lɛn kína dì kɛ lɛ gbɛ̃ kũ à ye à a bɛ̀ɛrɛ karanɛɛnɛ. 12 Kũ ò sù, Mↄdekai gɛ̀ɛ à vùtɛ kínabɛ gãnu gũn, akũ Amana ↄ kù a wɛ́a à tà bɛ kũ ↄ́ↄdↄo. 13 À yã kũ à a le bàba a nanↄ Zɛrɛsinɛ kũ a gbɛ̃nnanↄ ń pínki. Akũ a lɛ́dammarii pìnↄ kũ Zɛrɛsio pìnɛ: Zaakũ Mↄdekai kũ n gↄ̃ kpɛ a yãi pì bi Yuda burimɛ, ĩni a fↄ̃ doro, ĩnigↄ̃ kĩai ǹgↄ̃ gɛ́mɛ. 14 Gↄrↄ kũ òtɛn yã pì onɛ, kína dogari kũ ò ń fɛ̀rɛɛ kɛ̀nↄ kà, akũ ò a sɛ̀ likalika ò gɛ̀ɛ kãao pↄ́ble kũ Ɛsita kɛ̀ɛa.